“Azərbaycan-Böyük Britaniya əməkdaşlığı tranzit və logistika imkanlarını genişləndirir” - MİLLƏT VƏKİLİ

“Azərbaycan-Böyük Britaniya əməkdaşlığı tranzit və logistika imkanlarını genişləndirir” - MİLLƏT VƏKİLİ

“Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında Strateji Tərəfdaşlıq haqqında Birgə Bəyannamənin imzalanması ölkəmizin xarici siyasətində və beynəlxalq əlaqələrinin inkişafında mühüm hadisədir”.

Bu sözləri Milli Məclisin Təbii ehtiyatlar, energetika və ekologiya komitəsinin sədr müavini Fatma Yıldırım SİA-ya açıqlamasında bildirib.

Onun sözlərinə görə, noyabrın 12-də Dublində Möhtərəm Prezidentimiz cənab İlham Əliyev və Böyük Britaniyanın Baş naziri Endi Börnhem tərəfindən imzalanan bu sənəd iki ölkə arasında uzun illər ərzində formalaşmış əməkdaşlığın yeni mərhələyə yüksəldilməsini ifadə edir:

“Bu hadisəyə, ilk növbədə, Azərbaycanın müstəqil və milli maraqlara əsaslanan xarici siyasətinin nəticəsi kimi yanaşıram. Möhtərəm Prezidentimiz cənab İlham Əliyevin həyata keçirdiyi praqmatik və çoxşaxəli siyasət ölkəmizə dünyanın aparıcı dövlətləri ilə qarşılıqlı etimada və ortaq maraqlara əsaslanan münasibətlər qurmaq imkanı yaradıb.

Bəyannamənin ən mühüm siyasi məqamlarından biri Azərbaycanın suverenliyinə, müstəqilliyinə və ərazi bütövlüyünə, beynəlxalq səviyyədə tanınmış sərhədlərinin toxunulmazlığına hörmət prinsiplərinin bir daha təsdiq edilməsidir. Ermənistanla münasibətlərin normallaşdırılması və 2025-ci il 8 avqust tarixli Vaşinqton Sülh Zirvəsinin əhəmiyyətinin vurğulanması da Azərbaycanın regionda davamlı sülhün təmin olunmasına yönəlmiş siyasəti baxımından diqqətəlayiqdir.

Sənədin əhəmiyyətini yalnız siyasi bəyanatlarla məhdudlaşdırmaq düzgün olmazdı. Çünki burada müdafiə və təhlükəsizlikdən tutmuş iqtisadiyyat, enerji, nəqliyyat, təhsil və innovasiyaya qədər geniş əməkdaşlıq istiqamətləri müəyyən edilib.

Xüsusilə Böyük Britaniya ilə 30 ildən artıq tarixə malik enerji əməkdaşlığının yeni istiqamətlər üzrə inkişaf etdirilməsi diqqətəlayiqdir. Azərbaycanın ənənəvi enerji sahəsində qazandığı mövqeyin bərpaolunan enerji, yaşıl maliyyələşdirmə və müasir texnologiyalarla tamamlanması iqtisadiyyatımızın şaxələndirilməsi baxımından yeni imkanlar yaradır.

Digər mühüm istiqamət Orta Dəhlizin inkişafıdır. Azərbaycanın coğrafi mövqeyi, nəqliyyat infrastrukturu və artan tranzit imkanları ölkəmizi beynəlxalq ticarət və logistika sistemində mühüm tərəfdaşlardan birinə çevirir. Bu sahədə Böyük Britaniya ilə əməkdaşlığın genişlənməsi həm iqtisadi, həm də strateji baxımdan əhəmiyyətlidir.

Eyni zamanda, müdafiə sənayesi, sərhəd təhlükəsizliyi və hüquq-mühafizə sahələrində əməkdaşlığın nəzərdə tutulması müasir geosiyasi şəraitdə təhlükəsizlik məsələlərinin aktuallığını göstərir. Təhsil, süni intellekt, rəqəmsallaşma və innovasiya sahələrində əlaqələrin genişləndirilməsi isə gələcək inkişafımız üçün vacib olan insan kapitalının gücləndirilməsinə xidmət edəcək.

Bəyannamənin əsas siyasi mesajlarından biri Azərbaycanın beynəlxalq münasibətlər sistemində öz milli maraqlarına əsaslanan, etibarlı və bərabərhüquqlu tərəfdaş kimi mövqeyini daha da möhkəmləndirməsidir.

Eyni zamanda, strateji tərəfdaşlığın real nəticələri imzalanmış sənəddə müəyyən edilən istiqamətlərin konkret layihələrə, investisiyalara və qarşılıqlı faydalı təşəbbüslərə çevrilməsi ilə ölçüləcək.

Hesab edirəm ki, bu sənəd Azərbaycan-Böyük Britaniya münasibətlərinin inkişafına yeni dinamika gətirəcək, ölkəmizin iqtisadi və siyasi imkanlarının genişlənməsinə töhfə verəcək”.

Müəllif: Günay Hacıyeva

Bütün xəbərlər Facebook səhifəmizdə