“Prezident İlham Əliyevin Naxçıvan Muxtar Respublikasına səfəri çərçivəsində Azərbaycan Televiziyasına verdiyi müsahibə yalnız daxili sosial-iqtisadi inkişaf kursunun nümayişi kimi deyil, eyni zamanda beynəlxalq hüququn təməl prinsiplərinə, regional təhlükəsizlik arxitekturasına və geostrateji reallıqlara əsaslanan konseptual dövlət siyasətinin təzahürü kimi dəyərləndirilməlidir. Müsahibədə xüsusi olaraq vurğulanan hərbi gücün artırılması və yeni komando birləşmələrinin yaradılması faktı Birləşmiş Millətlər Təşkilatının Nizamnaməsinin 51-ci maddəsində təsbit olunmuş özünümüdafiə hüququnun və dövlət suverenliyinin qorunmasının praktiki təzahürü olmaqla yanaşı, Naxçıvanın eksklav coğrafi konfiqurasiyası nəzərə alınaraq Əlahiddə Ümumqoşun Qoşun Ordusunun potensialının modernləşdirilməsi vasitəsilə regional təhdidlərin neytrallaşdırılmasına və Azərbaycan Respublikasının Konstitusiyasında nəzərdə tutulmuş dövlət ərazisinin bölünməzliyinin təmin olunmasına xidmət edir”. Bu sözləri SİA-ya açıqlamasında deputat Bəhruz Məhərrəmov deyib.
Onun sözlərinə görə, İkinci Qarabağ müharibəsindən sonra formalaşmış yeni geosiyasi reallıqlar kontekstində Zəngəzur dəhlizinin açılması məsələsi xüsusi önəm kəsb edir ki, bu da beynəlxalq hüququn tranzit nəqliyyat azadlığı və kommunikasiyaların blokadadan çıxarılması prinsiplərinə uyğun olaraq 10 noyabr 2020-ci il tarixli Üçtərəfli Bəyanatın hüquqi öhdəliklərinin icrası baxımından prioritet xarakter daşıyır:
“Sözügedən dəhliz Azərbaycanın əsas ərazisini onun ayrılmaz tərkib hissəsi olan Naxçıvanla birbaşa quru yolu ilə birləşdirməklə yanaşı, Mərkəzi Asiyadan Avropaya uzanan Orta Dəhlizin geosiyasi çəkisini və strateji əhəmiyyətini əhəmiyyətli dərəcədə artıraraq regional inteqrasiyaya hüquqi və iqtisadi zəmin yaradır.
Bununla yanaşı, Naxçıvanda yeni istilik və Günəş elektrik stansiyalarının təməlinin qoyulması, sənaye parklarının yaradılması və transtatik enerji mübadiləsi sazişləri sayəsində Muxtar Respublikanın enerji müstəqilliyinin tam təmin edilməsi dövlətlərarası iqtisadi hüquq müstəvisində ölkənin xarici ticarət balansına, eləcə də dayanıqlı inkişaf məqsədlərinə xidmət edən strateji addımdır. Eyni zamanda Möminə xatun məqbərəsi və digər tarixi-mədəni abidələrin bərpasına dair vurğulanan fikirlər UNESCO-nun mədəni irsin qorunmasına dair konvensiyalarının tələblərinə tam uyğun olaraq milli identikliyin hüquqi müstəvidə mühafizəsini təmin edir.
Yekun olaraq, Naxçıvanda DOST və "ASAN xidmət" mərkəzlərinin fəaliyyətinin genişləndirilməsi inzibati hüququn "yaxşı idarəçilik" (good governance) prinsipinə uyğun olaraq vətəndaşların sosial-hüquqi müdafiəsini gücləndirir. Müsahibədə səslənən fikirlər beynəlxalq hüququn suverenlik, ərazi bütövlüyü və regional sabitlik prinsiplərinə söykənərək Azərbaycanın təhlükəsizlik və nəqliyyat qovşağı kimi artan rolunun qlobal miqyasda qəbul edildiyini praktik formada göstərir”.
Bütün xəbərlər Facebook səhifəmizdə
USD
EUR
GBP
RUB