"İqtisadi sabitlik pozulduqda insanların gündəlik xərcləmə vərdişləri də dəyişməyə başlayır. İlk növbədə, ailə büdcələrində prioritetlər yenidən qurulur. Əhali mədəni tədbirlər, əyləncə, kitab alışları, kinoya və teatra getmək kimi xərcləri “ikincili” hesab edərək bu sahələrə ayırdığı maliyyəni azaldır və əsas diqqəti ərzaq, kommunal xidmətlər, tibbi xidmətlər və digər zəruri sahələrə yönəldir". Bu sözləri SİA-ya açıqlamasında iqtisadçı ekspert Emin Qəribli deyib.
.jpg)
Onun sözlərinə görə, bu dəyişiklik sadəcə fərdi həyat tərzinin yox, ümumilikdə cəmiyyətin mədəni səviyyəsinin və yaradıcılıq potensialının zəifləməsinə səbəb olur. İnsanların mədəni tədbirlərdən uzaq düşməsi sosial izolyasiyanı artırır, ictimai dialoqu zəiflədir və cəmiyyətin rifahına təsir edən mədəni dinamikanı ləngidir: "Mədəni fəaliyyətlərin azalması həmçinin bu sahədə çalışan insanların - aktyorlar, musiqiçilər, yazıçılar, rəssamlar və sairənin gəlirlərinə mənfi təsir edir. Bununla paralel olaraq, bu sahədə xidmət göstərən müəssisələr də müştəri azlığı səbəbindən fəaliyyətlərini məhdudlaşdırmaq və ya tamamilə dayandırmaq məcburiyyətində qalırlar. Uzunmüddətli dövrdə bu vəziyyət cəmiyyətin intellektual və yaradıcı potensialının azalmasına, xüsusilə gənc nəslin mədəniyyətə marağının zəifləməsinə səbəb ola bilər. Halbuki mədəniyyət və sosial həyat yalnız əyləncə vasitəsi deyil, həm də insanların düşüncə tərzini formalaşdıran, onları maarifləndirən və cəmiyyət daxilində birliyi möhkəmləndirən vacib bir amildir.
Nəticə olaraq, iqtisadi siyasət hazırlanarkən yalnız makroiqtisadi göstəricilər deyil, eyni zamanda cəmiyyətin mədəni və sosial ehtiyacları da nəzərə alınmalıdır. Hökumət və qeyri-hökumət sektorları bu istiqamətdə dəstək proqramları həyata keçirməli, iqtisadi böhran dövrlərində belə mədəniyyətin yaşaması və inkişafı üçün zəruri addımlar atmalıdır".
Bütün xəbərlər Facebook səhifəmizdə
.jpg)
USD
EUR
GBP
RUB
