"İndi konkret qərar və cəsarətli addım zamanıdır” - ŞƏRH OLUNDU

15:53 | 998

“Ermənistanın sülhə münasibəti hələ də ziddiyyətlidir və bu ziddiyyətlər Paşinyan hakimiyyətinin daxili və xarici balans axtarışından qaynaqlanır. Rəsmi İrəvan bəzən sülh tərəfdarı kimi görünür, amma ardınca elə addımlar atır ki, bu təsəvvürü dağıdır”. Bu sözləri SİA-ya açıqlamasında politoloq Tural İsmayılov deyib.

Deputat bildirib ki, Paşinyan hökuməti sülh prosesini həm daxili sabitlik, həm də beynəlxalq imic üçün alətə çevirib: “Onlar Brüssel və Vaşinqtonla münasibətlərini gücləndirmək istəyir, lakin Moskvanın təsirini də tam itirməkdən çəkinirlər. Bu, Ermənistan diplomatiyasını ikibaşlı vəziyyətə salıb — nə Qərbə tam yaxınlaşa, nə də Rusiyadan uzaqlaşa bilir. Sülh müqaviləsi imzalanarsa, Ermənistan üçün yeni regional reallıq başlayacaq, amma Paşinyan bunu cəmiyyətinə izah edə bilmir. Daxildə köhnə siyasi qüvvələr, xüsusilə revanşist dairələr, bu sənədi “təslim aktı” kimi təqdim edir. Ona görə də hökumət hər dəfə sülh danışıqlarında “hazırıq” desə də, praktik addımlar atmaqdan yayınır. Əslində, Ermənistanın sülhü uzatması, onun iqtisadi və təhlükəsizlik maraqlarına da zərbə vurur. Sülh sənədinin imzalanması regionda yeni nəqliyyat və iqtisadi imkanlar açacaq, bu da Ermənistan üçün ciddi qazancdır. Azərbaycan prosesi emosiyasız, mərhələli və beynəlxalq hüquq prinsiplərinə uyğun şəkildə aparır. Bakı üçün əsas məqsəd dayanıqlı sabitlik və qarşılıqlı tanınmadır. Ermənistan isə bu reallığı qəbul edib əməkdaşlıq modelinə keçərsə, həm regional təcriddən çıxar, həm də Qərb və Şərq arasında körpü rolunu gücləndirər. Bu gün İrəvan üçün sülhdən qaçmaq siyasi yox, strateji yanlışlıqdır. Hər ötən ay Ermənistan üçün itirilmiş fürsət deməkdir. Əgər Paşinyan real sülh istəyirsə, bunu bəyanatlarla yox, imzalarla sübut etməlidir. Region artıq yorulub — indi konkret qərar və cəsarətli addım zamanıdır”.