Avtomobili qadınlar yoxsa kişilər yaxşı idarə edir? - ARAŞDIRMA

Qadınların pis sürücü olduğuna dair əsassız və birmənalı qarşılanmayan baxış var. Qadın sürücü qəzaya düşəndə ​​xəbərlərdə "Qadın sürücü qəza keçirdi" deyilir. Amma kişi sürücü qəza törədərkən onun kişi olduğunu bildirməyə ehtiyac yoxdur. Elmi araşdırmalara görə, qadınların sürücülükdə kişilərdən daha zəif olduğu hissələr var, ancaq kişilərdən daha güclü olduqları yerlər də var.

İki cinsin maşın sürməsinin səbəbi təkamül biologiyası ilə izah olunur. Kişi və qadın arasındakı fiziki fərqlər sürücülük bacarıqlarında düşündüyünüzdən daha böyük rol oynayır. Kişi hormonu testosteron sürücülük qabiliyyətinə çox güclü təsir göstərir.

Yaxşı avtomobil idarə etmək üçün güclü vizual emal bacarıqlarına malik olmalısınız. Testosteron kişilərdə məkan məlumatlılığını artırır və dayanacaq kimi işlərdə onlara daha çox üstünlük verir. Məsafəni, ətrafdakı obyektləri və simvolları daha yaxşı başa düşməyə yardım edir. Bu şəkildə yol şəraiti daha tez şərh olunur. Tədqiqatçılar müəyyən görmə qabiliyyətlərini itirməyə başlayan yaşlı kişilərin testosteron dozası qəbul etdikdə vizual işləmə sürətlərində artım yaşadıqlarını təsbit etdilər. Buna görə testosteronun payı olduqca böyükdür.

Yenə də bəzi tədqiqatlar göstərdi ki, yüksək testosteron səviyyələri avtomobillərə və ya yolda cisimlərə çırpılmadan sürə bilmək üçün həyati əhəmiyyət kəsb edən məkan fərqindəliyini artırır.

Testosteronun mənfi cəhətlərini də nəzərə almaq lazımdır. Bu hormonun təcavüzlə əlaqəli olduğunu bilirik. Testosteron kişiləri avtomatik olaraq təcavüzkar etməz, ancaq kişi sürücülərin daha çox risk almasına və özünə güvənməsinə səbəb ola bilər.

Testosteron səviyyəsinin ən yüksək illər olduğu üçün 20-35 yaşlarında kişilər olan gənclərin avtomobil qəzasında daha çox ölməsinin səbəbi budur. Buna görə də testosteron bəzən bir üstünlük, bəzən də mənfi cəhət ola bilər.

Testosteron kimi, estrogen də avtomobil idarə etməyə təsir edə bilər. Estrogen, qadınların avtomobil idarə edərkən kişilərdən daha yaxşı konsentrasiya etməsinə imkan verir.

Sürücülərin bir anlıq uzaqlara baxması nəticəsində baş verən qəzalar olduqca çoxdur. Həmin bu "diqqət" mövzusunda qadınların üstünlük təşkil etməsi estrogen konsentrasiyasını artırır. Qadınlar asanlıqla diqqətini yayındırmır, qarşıdakı yola daha çox diqqət yetirirlər.

Yaxşı sürücü olmaq üçün yaddaş da mühüm rol oynayır. Marşrutu xatırlamaq, çatma vaxtı kimi elementlər yaddaşla əlaqədardır. Araşdırmalar göstərir ki, qadınlar kişilərə nisbətən daha yaxşı yaddaşa malikdirlər və yaşla əlaqədar yaddaş itkisi qadınlarda kişilərdən daha gec başlayır. Bəlkə də "gələndə çörək al" deyilən bir adamın çörəksiz evə gəlməsinin səbəbi bu vəziyyətlə bağlıdır.

Kişi testosteron hakimiyyəti ilə qadın estrogen dominantlığı arasındakı ən böyük fərq davranışdır. Çox vaxt estrogenləri empati ilə əlaqələndiririk. Qadınların sevgi nümayiş etdirməsinin yeganə səbəbi bu deyil, amma bu, mühüm rol oynayır. Bu səbəbdən qadın sürücülər daha çox yol qaydalarına əməl edirlər, digər sürücülərlə mübahisə etmirlər və lazımsız risklərə getmirlər.

Kişilər daha yaxşı istiqamət anlayışına malikdirlər, qadınlar isə marşrutları daha yaxşı xatırlayır. Bu səbəbdən kişilər asan yol istəmirlər, buna yeganə səbəb eqo deyil. Beynin bu hissəsi insanlara zehni xəritələr yaratmağa və itmədən şəhər küçələrində gəzməyə imkan verir və araşdırmalar göstərdi ki, kişilər maşın sürərkən beynin bu hissəsindən daha çox istifadə edirlər.

Digər tərəfdən, qadınlar marşrutları və obyektləri daha yaxşı xatırlayır, bu da marşrutu daha yaxşı xatırlamağa imkan verir. Qadınlar, işləmə yaddaşında əhəmiyyətli rol oynayan frontal loblarında daha çox əlaqəyə sahib olduqları üçün bundan istifadə edirlər.

Kişilər daha duyğularla, xüsusən də mənfi (qəzəb, qorxu, təcavüz) ilə əlaqəli bir badam şəkilli beyin quruluşuna malikdirlər. Təhlükəli və ya stresli vəziyyətlərə məruz qaldıqda, beyin "işıq saçır" və kişi sürücüləri hərəkətə keçməyə təşviq edir. Bu, sürücüyə qəzəbli reaksiya vermək kimi vəziyyətlərə səbəb ola bilər.

Qadınlarda kişilərə nisbətən daha sürətli olqunlaşan daha böyük bir prefrontal korteks var. Beynin bu hissəsi insanlara duyğularını və davranışlarını tənzimləmək qabiliyyətini verir. Bu, "hər şeyi düşünərkən" hərəkətə keçən hissədir. Bu, qadınların kişilərdən daha az risk aldığını izah edir, çünki bu bölgənin sahəsi daha böyükdür.

İngiltərədəki bir araşdırma, qadın sürücülərin sürücülük vəsiqəsi imtahanından keçmə ehtimalının kişilərə nisbətən daha yüksək olduğunu və yaş artdıqca bu nisbətin artdığını göstərdi.

Bu araşdırmanın nəticələri:

17 yaşlı qadın sürücülərin sürücülük vəsiqəsi testindən keçmə ehtimalı kişilərə nisbətən 7% çoxdur.

Bu nisbət 20 yaşında imtahan verən qadınlar üçün 15% -ə yüksəlir.

30 yaşına çatanda qadınlar kişilərdən 25% daha çox uğursuz olurlar.

35 yaşında bu rəqəm 41%-ə yüksəlir.

50 yaşında qadınlar, bu yaşdakı kişilərə nisbətən 50% daha çox uğursuz olurlar.

Sürücülük vəsiqəsi imtahanında kişilər daha çox uğur qazanırlar, ancaq qadınlardan daha çox qəza keçirirlər.

Kişilər qadınlara nisbətən ömürlük sığorta haqqı olaraq 15.000 dollar daha çox ödəyirlər. 25 yaşdan kiçik kişilər bu mövzuda liderlik edirlər. Bunun səbəbi kişilərin, xüsusən də, gənclərin maşın sürməkdə aqressiv olmalarıdır.

Vizual, məkan və motor emalı kimi idrak üstünlüklərinə baxmayaraq, kişilərin ölümcül və ya ciddi qəzalara daha çox məruz qalmaları ehtimal olunur. Kişilərin də yol nişanlarını, işıqlarını pozaraq, sürət həddini aşma halları daha çox olur. Kişilər qadınlardan iki dəfə çox yol hərəkəti qaydalarını pozurlar. Başqa sözlə, qadın sürücünün idarə etdiyi avtomobildə olsanız, özünüzü daha təhlükəsiz hiss etməlisiniz.

Qadınlar maşın sürərkən mesajlara kişilərdən 5% daha çox cavab verir.

Qadınların sükan arxasında qəlyanaltı etmək ehtimalı kişilərə nisbətən 11% daha çoxdur.

Nəticədə həm kişilər, həm də qadınlar maşın sürərkən təhlükəli vərdişlərə qapıla bilərlər. Fərq onların etdiklərindədir.

SİA məsələ ilə bağlı araşdırma apararaq nəqliyyat eksperti, psixoloq və şəhər sakinlərinin fikirlərini öyrənib.

Psixoloq Aytən Ələkbərova: “Təbiidir ki, istər qadınlar, istərsə də kişilər avtomobil idarəetmədə, yəni, müdafiə sektorunda dürüstlüyünün təmin edilməsinə mütləq şəkildə diqqət etməlidir. Burada söhbət avtomobili idarə edərkən nəyə görə məhz dürüstlüyü biz önə çıxarırıq? Ön yarğıda bunu ona görə qeyd edirik ki, sabah hər hansısa bir avtomobil digər bir avtomobillə qəza şəraiti törəndiyi zaman mütləq şəkildə hər kəs özünün dürüst olduğunu sübuta yetirmək istəyir. Amma bəzən də baxırıq ki, bu çox lazımsız bir şeydir. Çünki şükürlər olsun ki, artıq texnologiya o qədər gözəl inkişaf edib ki, hər bir tərəf kameralardır. Bəzən düzdür olur, hətta bu yaxınlarda mənim öz başıma da gələn bir hadisə də olmuşdu ki, yəni avtomobili bir bəy vurub qaçmışdı. Amma buna baxmayaraq, hələ ki, o tapılmayıb.

Digər tərəfdən isə avtomobil idarəetmədə qadın və yaxud kişinin daha gözəl idarə etməsindən söhbət gedirsə, burada qadın-kişi faktoru yoxdur. Hər ikisi eyni əllərdir, eyni ayaqdır, eyni gözdür və düşünən beyindir. Yəni, burada qadın-kişi faktorunu kənara qoymalıyıq.

Təbiidir ki, elə bir manevrlər var ki, bizim bəylərimizin etdiyi o manevrləri mən, qadın olaraq haradasa öz xanımlığıma yaraşdırıb etmərəm. Amma qəza şəraiti törənən vaxt artıq burada xanımlıq və bəylik kənarda qalır. Deməli, idarəetmədə daha çox sən diqqətli olmalısan ki, həmin anda olacaq törənəcək qəza vəziyyətindən çıxmağı bacara biləsən. Bunun üçün də mütləq şəkildə insanın birinci psixoloji immuniteti güclü olmalıdır. Bütün əsəb sistemi buna imkan yaratmalıdır.

Bəzən görürsünüz ki, 19 yaşlı bir bəydir. 19 yaşlı gənclikdir, beyni qandır. Amma görürsünüz ki, hər hansısa bir hadisə baş verdi və neçə-neçə insanların evində göz yaşları oldu, neçə-neçə insanlar dünyasını dəyişdilər və hal-hazırda bədənlərində olacaq travmalardan əziyyət çəkirlər. Sonu necə olacaq hələ ki, bəlli deyil. Deməli, burada faktor qadın-kişi yox, düzgün oxuyub prava almaqdır. Yəni, sürücülük vəsiqəsini almaqdır. Bunun üçün də bizim çox gözəl təlim mərkəzlərimiz var. Bunlara sürücülük məktəbləri deyilir. Eyni zamanda, da yəni hal-hazırdaki təlim kursları ayrıca, fərdi şəkildə hər kəs gedib hazırlaşa bilər. O zaman biz, bu qadın-kişi faktorlarını kənara qoyacağıq və daha gözəl sürücülər yetişəcək ki, ən azından yolda olacaq yol mədəniyyətini, tıxac mədəniyyətini psixoloji olaraq sağlam şəkildə beyinlərində sürdürə bilsinlər ki, yəni bu tıxacdır, “yarım saat öncə çıxa bilərəm, 40 dəqiqə qabaq çıxa bilərəm, ola bilər ki, işdə gedərəm 10 dəqiqə tez gözləyərəm, amma hər hansısa bir təhlükədən uzaq olaram”.

Burada düşünən beyindir bunun qadın-kişi olmağının fərqi yoxdur. Allah-təala bir tək fərq olaraq bizi bir-birimizdən ayıran fərqlər müəyyən orqanizmimizdə olacaq müxtəlif orqan dəyişikliyi ola bilər. Yoxsa ki, düşünən beyin qadında da güclü ola bilər, kişilərdə də. Təbiidir ki, kişilərin sağ və sol yarımkürəsi qadınlara nisbətən daha çox inkişaf edib. Məsələn, qadınlarda bir yarımkürə inkişaf edirsə, kişilərdə hər iki yarımkürə inkişaf edir və avtomobil sürən qadınların da əksəriyyəti psixoloji testdən keçən zaman onların sağ və sol beyin yarımkürələrinin hər ikisi işlək vəziyyətdə olduğuna görə onlar bunu idarə edə bilirlər. Ona görə də gəlin daha diqqətli olaq. Təbiidir ki, amma bəylərimizin sürdüyü avtomobil bir balaca da olsa qadınlardan üstün olur”.

Nəqliyyat eksperti Elməddin Muradlı: “Qadın-kişi sürücülər arasında müqayisə gender balansı baxımından düzgün deyil. Amma hər iki tərəfin özünün spesifik xüsusiyyətləri və spesifik yanaşmaları var. Avtomobillə davranış, avtomobilə texniki qulluq, idarəetmə və s. kimi məsələlərdə hər iki tərəfin özünün yanaşması var və ümumilikdə baxanda düzdür, kişi sürücülər daha çoxdur. Qadın sürücülərimizin sayı təxminən 50-60 min arasıdır. Yəni, rəsmi sürücülük vəsiqəsi alanlardır. Təbii ki, onların hamısı bu dəqiqə maşın sürmür. İntizamlı qadın sürücülərimiz çoxdur. Amma manevr, sürət, parklanma, geriyə hərəkət məsələsində xanım sürücülər nədənsə çox əziyyət çəkir. Demək olar ki, əksəriyyəti parklanmanı, geriyə hərəkəti düzgün yerinə yetirə bilmir. Manevr qaydalarıdır, zolaqlar üzrə hərəkətdir bu məsələlərdə əziyyət çəkirlər, gec qavrayırlar.

Digər tərəfdən həm parklanmada, həm manevr məsələsində qayda pozuntularına çox yer verdikləri üçün maşınları tez-tez qəzalı vəziyyətə düşür. Bu gün xanım sürücülərin idarə etdiyi avtomobillərə nəzər saldıqda elə mənzərə təxminən bizə aydın olur. Əksəriyyətinin arxa tərəfi, yan qapıları sürtülmüş, əzilmiş vəziyyətdədir. Yəni, artıq o sürücü haqqında müəyyən təəssüratlar yaranır. Xanım sürücülər arasında məsələn, təhlükəsizlik kəmərindən istifadə edənlər çoxdur, yəni ilkin təcrübələrdən görürsünüz ki, təhlükəsizlik kəmərinə maraqlıdılar, çünki daha məsuliyyətli yanaşmağa çalışırlar. Avtomobillərə texniki qulluq məsələsində biraz zəifdirlər. Məsələn, avtomobilin elə detalı var ki, onu bilmirlər. Adicə şüşəsilənlərin suyu hardan dolur və yaxud da yağdəyişmə, yağa baxmaq və s. məsələlərdə çox zəifdilər və heç öyrənmək də istəmirlər. Əslində, mən çox istərdim ki, bunu öyrənsinlər. Çünki həyat yoldaşına, qardaşına, atasına, sevgilisinə arxayın olur ki, o baxacaq. Amma bir də görürsünüz ki, elə bir situasiya yarana bilir ki, orda özü-özünə çarə tapmalıdır, vəziyyətdən çıxmaq üçün bir iş görməlidir. Amma bəzən görürsünüz ki, bu alınmır. Sürət həddinə gəldikdə məsələn, kişi sürücülər daha çox sürət həddini aşmağa görə cəzalanırlar, amma xanım sürücülərdə bu göstərici biraz aşağıdır. Çünki xanım sürücülər yüksək sürətə maraqlı deyillər. Spirtli içkinin, narkotik vasitələrin təsiri altında daha çox kişilər maşın sürür. Amma çox təəsüf ki, son vaxtlar spirtli içkinin təsiri altında maşın sürən qadınlara, narkotik aludəçisi olan qadın sürücülərə də rast gəlirik. Əvvəl tək-tük olurdusa, bu gün daha çox rast gəlinir, daha geniş yayılmış bir hala çevrilib. Bu da çox təhlükəli və təəssüf doğuran bir haldır. Ən azından bizim mental xüsusiyyətlərimiz və s. məsələlər göz önünə gələndə bu hallar bizdə təəssüf doğurur ki, bizim xanımlarımız abırlı, ismətli, ailəcanlı olur.

Spirtli içki qəbul etmək və bu vəziyyətdə sükan arxasında olmaq çox təhlükəlidir. Bütün dünya alimləri bunu deyir ki, qadınların sükan arxasında reaksiyası kişilərə nisbətən saniyənin üçdə biri qədər gecikir və bu zaman və bu məsafə kifayət qədər qəza baş verməsi üçün kifayət edəcək bir zamandır. Yəni, qadınlar kişilərə nisbətən hadisələrə daha gec reaksiya verirlər. Tutaq ki, qəzadır, sən bunu görürsən, qavrayırsan, dərhal ayağını tormoza atırsan və kişilərə nisbətdə qadınlar bu funksiyanı yerinə yetirməkdə gecikirlər. Qadınlar daha tez panikaya düşürlər, özlərini itirirlər, situasiyadan çıxış üçün daha çevik ola bilmirlər. Bu məsələləri bilə-bilə spirtli içki, narkotik vasitə istifadə edib sükan arxasına keçmək isə o deməkdir ki, ümumiyyətlə, reaksiya sıfır vəziyyətindədir, çox aşağı həddədir və bu da yol-nəqliyyat hadisələrinə, kobud qayda pozuntularına gətirib çıxarır, başqaları üçün təhlükəyə səbəb olur.

Ona görə düşünürəm ki, bu məsələlərlə bağlı ciddi təbliğat işi aparılmalıdır, elmi əsaslı məqalələr, təbliğat xarakterli materiallar ictimailəşdirilməlidir. Televiziyalarda, radiolarda, elektron kütləvi informasiya vasitələrində, sosial şəbəkələrdə geniş şəkildə yayılmalıdır, təhlil edilməlidir. Bunu siz, mən edirik. Mən dedim siz də yazırsınız. Amma bunu aidiyyəti qurumlar etsə daha faydalı olar. Sosial çarx şəklində mütəxəssislərin iştirakı ilə bir ictimai müzakirələrin keçirilməsi, canlı nümunələri cəmiyyətə təqdim etmək və s. kimi bunları etmək lazımdır”.

Məsələyə şəhər sakinləri də öz fikirlərini bildirib:

Şəhər sakini Nicat Ələkbərov: “Məncə, sürücülük qabiliyyəti cinsiyyətə əsaslanan bacarıq deyil. Bu, tamamilə təcrübə və məlumatlılıq məsələsidir. Təbii ki, hər cinsin özünəməxsus faktorları var ki, bu özəlliklərin az da olsa bu sahədə rolu var. Məsələn, kişilər bəzi vəziyyətlərdə qadınlara nisbətən daha tez qərar verir, daha riskli davranır. Qadınların üstünlüklərindən biri isə tez düşünmə və ətraflı analiz bacarıqlarının olmağıdır. Amma, ümumilikdə cinsindən asılı olmayaraq, istənilən insan bacarığı və bir müddət sonra təcrübəsini birləşdirərək yaxşı sürücü ola bilər”.

Şəhər sakini Aliyə Qarayeva: “Mənim fikrimcə, kişilər qadınlara nisbətən daha dəqiq, daha diqqətli və rahat şəkildə avtomobil idarə edirlər. Qadınların əksəriyyəti yol hərəkəti qaydalarını yaxşı bilmir, kor-koranə şəkildə avtomobil idarə edirlər. Onlar gərək yol hərəkəti qaydalarını yaxşı bilsinlər, sürət həddini aşmasınlar, digər sürücülərə və piyadalara da çətinlik yaratmasınlar. Kişi sürücülərin əksəriyyəti düzgün şəkildə avtomobil idarə edirlər. Xanımların da düzgün avtomobil idarə edənləri var, amma çox azdır. Xanım sürücülərin avtomobil idarə etməsinə də çox yaxşı münasibətim var. Amma əgər o xanımın yol mədəniyyəti, davranış mədəniyyəti varsa, avtomobili düzgün idarə edirsə, niyə də olmasın?! Bəli, çox yaxşı ki, müasir dövrdə qadınlar da avtomobil idarə edir”.

Şəhər sakini Aytac Ali: “Məncə, qadınlar maşını daha ehtiyatlı sürürlər. Mən də bir xanım olaraq, gələcəkdə maşın sahibi olmaq istəyirəm. Açığı, tərəddüdlərim var. Lakin inanıram ki, əksər qadınlar kimi bunu bacara bilərəm. Bu istəyimin hardan gəldiyini soruşsaz, onu deyə bilərəm ki, ilk olaraq can rahatlığı üçün istəyirəm. Digər bir səbəb isə, sükan arxasında qadın sürücü gördükdə, çox xoşuma gəlməsidir. Zənnimcə, maşın qadınlara kişilərdən daha çox yaraşır. Amma təəssüflər olsun ki, bir mənfi xüsusiyyətimiz var, ona səliqəli baxa bilmirik. Kişilər bizdən fərqli olaraq avtomobillərinə gözbəbəyi kimi baxıb, özən göstərirlər”.

Şəhər sakini Nərgiz Xəlilli: “Məncə, mübahisəli mövzudur. Qadınlar yaxşı sürmür fikri artıq köhnəlib. Artıq kifayət qədər yaxşı maşın sürən qadınlar var və bu sevindirici haldır. Ümumiyyətlə, hər hansı bir işi kişi və ya qadın olaraq bölünməsinin tərəfdarı deyiləm. Məncə, hər kəs öyrənə bilər”.

Şəhər sakini Aysun Məmmədova: “Mənim fikrimcə, qadınlar daha yaxşı sürücü ola bilir. Çünki məsuliyyətli davranırlar. Yol hərəkəti qaydalarına həmişə əməl edirlər, ehtiyatlı davranırlar. Qəza törədən qadınların sayı məncə barmaqla sayılacaq qədər azdı. Regionlarda avtomobil idarə edən qadınlar az bəlkə də yox səviyyəsində olsa da, mərkəzdə kifayət qədər çoxdur. Qadın hər şeyi bacarmalıdır. Bir müəllimim var idi. Müasirliyə qarşı idi. Qızların saç rənginə, geyiminə, dırnaqlarına qarışırdı və bunun düz olmadığını deyirdi. Amma o belə qadının maşın idarə etməsinə qarşı deyildi. Deyirdi ki, kaş həyat yoldaşım bacarardı, uzun yola çıxanda növbəli şəkildə idarə edərdik. Yəni, bu yaxşı haldır. Qadın toxunuşu olan hər şey səliqəli görünür. Məncə nəqliyyatımızın da səliqəli, nizamlı görünməsi üçün qadın sürücülərə ehtiyac var”.

Şəhər sakini Nüşabə Nəcməddinova: “Sürücülük haqqında əsas qaydalara kim bələddirsə, o, yaxşı sürücüdür. Həm qadınların, həm də kişilərin maşın sürməsi arzuolunandır. Qadın maşın sürə bilməz və ya bu iş onda alınmaz deyən hər kəs yanlış fikirdədir. Hər bir insanın azad yaşamaq haqqı olduğu kimi, öz iradəsi ilə istədiyi hər şeyi etməkdə də özgürdür. Məhz, buna görə qadınların da maşın sürməsində bir maneə yoxdur”.

Şəhər sakini Türkan Məmmədova: ““Aslanın erkəyi, dişisi olmaz" deyimi ilə sözə başlasam, daha düz olar. Hər sahədə qadınların da öz yeri olduğunu görürük. Buna görə qadınların da maşın sürməsinə təəccüblənməmək lazımdır. Maşın sürməkdə kişilər çoxluq təşkil etdiyi üçün yaxşı maşın sürənlər kişilərdir deyilir. Lakin dediyim kimi qadınlarda isə səliqə, ehtiyatlılıq payı daha çox olur. Bunu demək olmaz ki, kişilər ya qadınlar yaxşı maşın sürür. Çünki kişilər güc göstərişində və s.kimi qadınlar isə daha çox ehtiyac və cəmiyyətdə gedən proseslərə görə istifadə edir. Nəyə görə belə dedim? Ona görə ki, övladı olan qadın övladını, ictimai nəqliyyatda aparmağa narahat olur. Yaxud kişilərin özləri həyat yoldaşlarını digər ictimai nəqliyyatdan istifadəsinə narahat olur. Buna görə qarşılıqlı anlaşmaq lazımdır. Heç kimi qınamaq olmaz. Bir sözlə, hər kəs özünə məsuliyyət daşıyır. Hər bir fərd empati yaradaraq maşın sürməlidir ki, heç kimin həyatına son qoyub, ailəsini söndürməsin. Ehtiyatlı olmaq öz əlimizdədir. Çalışaq cəmiyyətdə yaxşı maşın sürən sürücü statusuna malik olaq”.

Ayşən Vəli

Bütün xəbərlər Facebook səhifəmizdə

loading...