Çinin inkişafına rəhbərlik etmək, gələcəyi birlikdə qurmaq
.jpg)
1 iyul 2026-cı il tarixində Çin Kommunist Partiyası yaradılmasının 105-ci ildönümünü qeyd edib. 1921-ci ildə yarandığı gündən etibarən Çin Kommunist Partiyası həmişə özünün böyük təsisçilik ruhunu yaşadıb və inkişaf etdirib. Bu ruh həqiqətə və ideallara sadiqlik, ilkin məqsədə bağlılıq və üzərinə düşən missiyanı yerinə yetirmək, fədakarlıq və qəhrəmancasına mübarizəyə hazır olmaq, partiyaya sədaqət göstərmək və xalqın etimadını doğrultmağa çalışmaq kimi dəyərləri özündə birləşdirib.
Hazırda 100 milyondan çox üzvü olan Çin Kommunist Partiyası dünyanın ən böyük hakim partiyasına çevrilib. O, 1,4 milyarddan artıq əhalisi olan böyük bir ölkəyə rəhbərlik edir və dünya miqyasında mühüm nüfuza malikdir.
Çin xalqına rəhbərlik edən Çin Kommunist Partiyası dünyada nadir rast gəlinən iki böyük uğura imza atıb: dinamik iqtisadi inkişaf və uzunmüddətli sosial sabitlik.
Çin Kommunist Partiyası insan sivilizasiyasının yeni bir formasını yaradaraq, Çin tipli modernləşməni irəli aparır. Bu model inkişaf etməkdə olan ölkələr üçün modernləşməyə aparan yeni yollar açıb.
Partiya bəşəriyyətin vahid taleyi birliyi konsepsiyasının formalaşdırılmasına töhfə verib, bəşəriyyətin qarşısında duran ən mühüm problemlərin həlli üçün Çin müdrikliyini, həll yollarını və gücünü ortaya qoyub.
1 iyul tarixində Çin Kommunist Partiyası Mərkəzi Komitəsinin Baş katibi və Çin Xalq Respublikasının Sədri Si Cinpin mühüm bir nitqlə çıxış edib. O, çıxışında Çin Kommunist Partiyasının şərəfli keçmiş yolunu xatırladıb və partiyanın, eləcə də xalqın inkişafının parlaq gələcəyinə nəzər salıb.
Si Cinpin partiyanın bütün üzvlərini və ölkənin çoxmillətli xalqını modernləşdirilmiş sosialist dövlətinin tam şəkildə qurulması və Çin xalqının böyük dirçəlişinə nail olunması kimi möhtəşəm məqsədə doğru əminliklə irəliləməyə səfərbər edib.
Baş katib Si Cinpin çıxışında bildiribildirib ki, Çin Kommunist Partiyası digər siyasi partiyalar və qüvvələr arasında analoqu olmayan görkəmli xüsusiyyətlərə malikdir və o, Çin Kommunist Partiyasının uğurunun əsas sirrini açıqlayıb
Birincisi, Çin Kommunist Partiyası həqiqətə can atmaq əzmindədir və irəliyə doğru hərəkətin düzgün istiqamətini müəyyən edir. Partiya düşüncə azadlığını təşviq etməyə davam edir, məsələlərə realist yanaşır, dövrün tələbləri ilə ayaqlaşır, həqiqəti axtarır və praktik fəaliyyətə üstünlük verir.
İctimai ziddiyyətlərlə bağlı proseslərdə həqiqətin üzə çıxarılmasına və tətbiqinə xüsusi əhəmiyyət verən partiya, həqiqəti praktika vasitəsilə yoxlamağa və inkişaf etdirməyə qadirdir. O, yeni nəzəriyyənin köməyi ilə yeni praktikaya istiqamət verir və partiyanın, eləcə də xalqın fəaliyyətinin düzgün inkişaf yolunu təmin edir.
İkincisi, Çin Kommunist Partiyası xalqın dərin etimadına söykəndiyi üçün həmişə möhkəm təmələ malikdir. Partiya daim yadda saxlayır ki, ölkə xalqdır, xalq isə ölkədir. O, belə bir prinsipə əsaslanır ki, partiya ümumi rifah naminə yaradılıb və hakimiyyətdə xalqın mənafeyi naminə fəaliyyət göstərir.
Partiya öz əsas məqsədini – xalqa fədakarcasına xidmət etmək prinsipini şüurlu şəkildə həyata keçirir.
Üçüncüsü, Çin Kommunist Partiyası tarixi missiyanı cəsarətlə öz üzərinə götürür və strateji təşəbbüsü daim öz əlində saxlayır. Kommunizmi böyük bir ideal hesab edərək və özünü Çin xalqının əbədi böyük işinə həsr edərək, tarixin və xalqın üzərinə qoyduğu ağır məsuliyyəti qətiyyətlə daşıyır.
Partiya uzunmüddətli məqsədlərlə mərhələli vəzifələrin vəhdətinə sadiq qalır, düzgün siyasi xətti, kursu və siyasəti hazırlayıb həyata keçirir, həmçinin öz fəaliyyətinin inkişafında rəhbərlik və təşəbbüs hüququnu daim öz əlində saxlayır.
Dördüncüsü, inkişaf meyillərinə uyğun hərəkət edən Çin Kommunist Partiyası həmişə dövrün avanqardında yer alır. Partiya güclü tarixi şüura malikdir və hadisələrə qlobal baxışla yanaşır. O, Çinin mövcud reallıqlarını və zamanın aktual çağırışlarını aydın şəkildə dərk edir.
Partiya dəyişiklikləri vaxtında aşkar etməyə, onlara çevik reaksiya verməyə və islahatlara can atmağa qadirdir. O, zamanın tələblərini əks etdirən, eyni zamanda obyektiv inkişaf qanunauyğunluqlarına uyğun gələn partiya fəaliyyətini davamlı şəkildə inkişaf etdirmək və irəli aparmaq əzmindədir.
Ölkəni və xalqı irəliyə apararaq, tarixin inkişaf meyillərinə və dövrün çağırışlarına uyğun hərəkət edən Çin Kommunist Partiyası dövrün layiqli avanqardına və Çin xalqının əsas dayağına çevrilib.
Beşincisi, mübarizəni cəsarətlə apararaq və mübarizə aparmaq bacarıq və vərdişlərini daim təkmilləşdirərək, Çin Kommunist Partiyası hər zaman qələbəyə inamını qoruyub saxlayır.
Partiya fədakarlıq və qəhrəmanlıq mübarizəsi ruhuna daim sadiq qalır və onu inkişaf etdirir. Xalqın, dövlətin, millətin, eləcə də öz ideallarının və əqidəsinin naminə o, bütün maneələri dəf edib və əzmlə irəliləyib.
Dəmir iradəyə malik olan partiya ölkə xalqını bir qələbədən digər qələbəyə doğru aparıb.
Altıncısı, özünü gücləndirməyə xüsusi diqqət yetirən Çin Kommunist Partiyası daim həyat enerjisi və inkişaf potensialı ilə seçilir. O, aydın şəkildə dərk edir ki, “dəmiri döymək üçün əvvəlcə özün möhkəm olmalısan.”
Partiya dövrün inkişaf tələblərinə uyğun olaraq öz fəaliyyətinə tənqidi yanaşmağa, daim ayıq-sayıq olmağa və inqilabi özünüyeniləmə ruhu ilə özünü təkmilləşdirməyə qadirdir.
O, özünü möhkəmləndirməyə və daxili quruculuğa böyük əhəmiyyət verir, inqilabi sınaqlardan keçərək daha da güclənir.
Baş katib Si Cinpin qeyd edib:
“Çin Kommunist Partiyasının 105 illik şərəfli tarixi qürur duymağa layiqdir. Lakin biz əldə etdiklərimizlə kifayətlənməməli və yerimizdə saymamalıyıq. Bu əsrin ortalarınadək Çin Xalq Respublikasının yüzilliyi münasibətilə qarşıya qoyulmuş – tam şəkildə modernləşdirilmiş sosialist dövlətinin qurulması məqsədinə nail olmalıyıq. Zaman heç kəsi gözləmir! Tarix heç kəsi gözləmir!”
Bu məqsədlə o, Çin Kommunist Partiyasının bütün üzvlərini özünəinam hissini daha da möhkəmləndirməyə və ardıcıl mübarizə aparmağa çağırıb. Onlar partiyanın əsas nəzəriyyəsinə, xəttinə və strategiyasına sadiq qalmalı, xalqa möhkəm arxalanaraq böyük tarixi nailiyyətlər əldə etməli, qarşıdakı yolda yaranan risk və çağırışlara fəal şəkildə cavab verməli, bəşəriyyətin vahid taleyi birliyinin qurulmasına daim töhfə verməli, həmçinin partiyadaxili idarəetmənin hərtərəfli şəkildə daha da gücləndirilməsi istiqamətində yorulmadan çalışmalıdırlar. Bütün bunlar dövrə və xalqa layiq yeni uğurlar qazanmaq məqsədinə xidmət etməlidir.
Çinin inkişafı dünyadan ayrılmazdır, dünyanın tərəqqisi isə Çinin iştirakına ehtiyac duyur.
Mövcud qeyri-sabit beynəlxalq vəziyyət və çoxsaylı qlobal çağırışlar fonunda Çin Kommunist Partiyası bundan sonra da sülh, inkişaf, əməkdaşlıq və qarşılıqlı fayda bayrağını yüksək tutacaq, bəşəriyyətin ümumi dəyərləri olan sülhü, inkişafı, bərabərliyi, ədaləti, demokratiyanı və azadlığı təşviq edəcək.
Partiya qarşılıqlı hörmət, ədalət və faydalı əməkdaşlıq prinsiplərinə əsaslanan yeni tip beynəlxalq münasibətlər sisteminin formalaşdırılmasını irəli aparacaq.
O, Qlobal İnkişaf Təşəbbüsü, Qlobal Təhlükəsizlik Təşəbbüsü, Qlobal Sivilizasiya Təşəbbüsü və Qlobal İdarəetmə Təşəbbüsünün həyata keçirilməsinə dəstək verməyə davam edəcək ki, bütün dünyada sülhün və inkişafın möhkəmlənməsinə daha çox müsbət töhfə versin.
Çin və Azərbaycan yaxşı dost və etibarlı tərəfdaşlardır. Son illərdə Çin Xalq Respublikasının Sədri Si Cinpin və Azərbaycan Respublikasının Prezidenti İlham Əliyevin strateji rəhbərliyi altında Çin–Azərbaycan münasibətləri hərtərəfli şəkildə inkişaf edərək tarixdə ən yüksək səviyyəyə – hərtərəfli strateji tərəfdaşlıq səviyyəsinə yüksəlib, bununla da iki ölkə arasında münasibətlər və əməkdaşlıq tarixində yeni bir səhifə açılıb.
Hər iki ölkənin hakim partiyaları olan Çin Kommunist Partiyası və Yeni Azərbaycan Partiyası dövlətin inkişafında mühüm rəhbər rol oynayırlar.
Tərəflər uzun illər ərzində sıx və müntəzəm əlaqələr mexanizmini qoruyub saxlayıb, iki ölkə liderlərinin əldə etdiyi mühüm razılaşmaları fəal şəkildə həyata keçirib, dövlət idarəçiliyi sahəsində təcrübə mübadiləsini dərinləşdirib, hər iki partiyanın kadrları, kütləvi informasiya vasitələri və analitik mərkəzləri arasında əməkdaşlığı təşviq edib, bununla da ikitərəfli hərtərəfli strateji tərəfdaşlığın davamlı inkişafına mühüm töhfə veriblər.
Geridə qalan 105 ilə nəzər saldıqda demək olar ki, Çin Kommunist Partiyası dövrün tələblərinə uyğun fəaliyyət göstərib, Çinin və Çin xalqının taleyini və inkişaf perspektivlərini köklü şəkildə dəyişdirib.
Gələcəyə baxdıqda isə, Çin Kommunist Partiyası artıq yeni yüzillik yürüşünə başlayıb. O, Çin xalqının böyük dirçəlişinə və xalqın rifahına xidmət etməyə davam edəcək, həmçinin bəşəriyyətin vahid taleyi birliyinin qurulmasına və daha yaxşı bir dünyanın birgə yaradılmasına töhfə vermək məqsədilə ölkələrin bütün siyasi partiyaları ilə qarşılıqlı etimadı və əlaqələri daha da möhkəmləndirməyə hazırdır.
Çin Xalq Respublikasının Azərbaycandakı fövqəladə və səlahiyyətli səfiri Lu Mey
Bütün xəbərlər Facebook səhifəmizdə
USD
EUR
GBP
RUB