Media Təhlil Mərkəzinin (MTM) Dövlət Statistika Komitəsinin açıqladığı rəsmi rəqəmlər əsasında apardığı təhlilə görə, 2024-cü il ərzində ölkədə minik avtomobillərinin sayı 5,5% və ya 83 308 ədəd artaraq ilin sonunda 1 585 265 olub. SİA-nın məlumatına görə, minik avtomobilləri arasında ilk sıranı 408 426 ədədlə keçmiş SSRİ, indi isə Rusiya istehsalı olan “Lada” ( VAZ ) markalı minik avtomobilləri tutur. Bu minik avtomobilləri ölkədəki ümumi minik avtomobillərinin 25,8%-ni təşkil edir.
İkinci sırada isə 220 242 minik avtomobili ilə məşhur Almaniya brendi olan “Mercedes” markalı minik avtomobilləri yer alır. Onların sayı ölkədəki bütün minik avtomobillərinin 13,9%-ni təşkil edir.
İlk üçlüyə isə Cənubi Koreya istehsalı olan “Hyundai” markalı minik avtomobilləri daxildir. Rəsmi rəqəmlərə görə, bu avtomobillərin sayı 142 814 ədəd təşkil edir və ümumi minik avtomobili sayının 9%-nə bərabərdir.
Aparılan təhlil zamanı məlum olub ki, son 5 il ərzində ölkəyə gətirilən minik avtomobilləri arasında “Hyundai” markası ilk sırada yer alıb. Daha dəqiq desək, 2020-2024-cü illərdə ölkəyə 68 621 “Hyundai” markalı minik avtomobili gətirilib.
İkinci ən çox gətirilən minik avtomobili digər Cənubi Koreya brendi olan “KİA” markalı avtomobillər olub. Hesabat dövründə Azərbaycana 59 852 “KİA” markalı minik avtomobili gətirilib.
Dünyada ən çox satılan minik avtomobili adını alan “Toyota” üçüncü sırada yer alır. Belə ki, son 5 il ərzində ölkəmizə bu markaya məxsus minik avtomobillərindən 58 329 ədəd gətirilib.
Növbəti sıralarda dünyaca məşhur markalardan ardıcıl olaraq “Chevrolet” (34 451) “Opel” (23 060), “BMW” (17 057), “Mercedes” (16 749 ədəd), “Nissan” (14 627) yer alıb.
2020-2024-cü illərdə ölkəmizə gətirilən minik avtomobilləri arasında son vaxtlar məşhurlaşan Çin avtomobillərindən olan “Changan” markalı avtomobilin sayı 8 950 ədəd, “BYD” markalı nəqliyyat vasitəsinin sayı isə 4 083 ədəd olub
Ölkədə sayına görə birinci olan “Lada” markalı minik avtomobilləri isə son 5 ildə cəmi 7 824 ədəd artıb.
Son 5 il ərzində premium sinfə daxil olan minik avtomobillərindən “Rolls Royce” markalı minik avtomobilindən 74 ədəd, “Maserati” markalı avtomobillərdən 204 ədəd, “Bentley” markalı nəqliyyat vasitəsindən 371 ədəd, “Jaguar” markalı minik avtomobilindən 159 ədəd ölkəmizə gətirilib.
Azərbaycana gətirilən avtomobillərin ölkələr üzrə sayına baxsaq görərik ki, 2024-cü ilin sonunda ölkədə olan minik avtomobillərinin 488 646 ədədi və ya 30,8 %-i Rusiya , 371 708 ədədi və ya 23,4 %-i Almaniya, 252 023 ədədi və ya 15,9 %-i Cənubi Koreya, 222 566 ədədi və ya 14 %-i isə Yaponiya istehsalıdır. Qeyd edək ki, bu 4 ölkə istehsalı olan minik avtomobilləri ölkədəki bütün minik avtomobillərinin 84,2%-ni təşkil edir.
Qalan minik avtomobilləri arasında ABŞ istehsalı olan 87 053 minik avtomobili (5,5%) və Çin istehsalı olan 27 356 minik avtomobili (1,7%) siyahının ilk iki pilləsində yer alır.
Yerli istehsal minik avtomobillərinin sayı isə 13 512 ədəddir. Bu isə ölkədəki bütün avtomobillərin cəmi 0,9%-ni təşkil edir.
Son 5 il ərzində ölkədə ən çox Cənubi Koreya istehsalı olan minik avtomobillərinin sayı artıb. Bu müddət ərzində adıçəkilən ölkədən ölkəmizə 129 176 ədəd minik avtomobili gətirilib. Bu avtomobillərin böyük hissəsini məlum olduğu kimi “ Hyundai” və “KİA” markalı minik avtomobilləri təşkil edib.
İkinci sırada isə 84 907 minik avtomobili ilə Yaponiya yer alıb. Yapon markalarından isə “Toyota”, “Nissan”, “Mitsubishi” , “Lexus”, “Honda”, “Mazda” kimi markaları da görmək mümkündür.
Son 5 ildə ölkəyə ən çox gətirilən minik avtomobilləri siyahısında alman markaları 62 481 avtomobil ilə üçüncü sırada yer alıb. Bilməyənlər üçün qeyd edək ki, “Mercedes”, “BMW” “Wolkswagen”, “Audi” və “Porsche” alman markasıdır.
Əlavə məlumat üçün bildirək ki, son 5 ildə ölkəyə gətirilən Çin avtomobillərinin sayında 24 919 ədəd artım qeydə alınıb.
Bütün xəbərlər Facebook səhifəmizdə
.jpg)
.jpg "Formula 1 ölkəmizə nə qazandıracaq")
USD
EUR
GBP
RUB
