Avqustun 12-də Beynəlxalq Muğam Mərkəzində Ümummilli Lider Heydər Əliyevin anadan olmasının 100-cü ildönümünə həsr olunmuş “MədəniyyətimİZ” layihəsi çərçivəsində Xalq artistləri Gülyaz və Gülyanaq Məmmədova ilə görüş keçirilib.
SİA AZƏRTAC-a istinadən xəbər verir ki, “İrəli” İctimai Birliyinin təşkilatçılığı, Mədəniyyət Nazirliyinin dəstəyi ilə həyata keçirilən tədbirin əvvəlində Ulu Öndər Heydər Əliyev və Vətənimizin azadlığı və suverenliyi uğrunda canından keçən şəhidlərimizin əziz xatirəsi bir dəqiqəlik sükutla anılıb.
Tədbirdə çıxış edən “İrəli” İctimai Birliyinin əməkdaşı Riad Cəbrayılov “MədəniyyətimİZ” layihəsinin Beynəlxalq Muğam Mərkəzində keçirilməsinə görə mərkəzin rəhbərliyinə təşəkkürünü bildirib. O qeyd edib ki, tədbirin 12 avqust - Beynəlxalq Gənclər Günündə keçirilməsi də təsadüfi deyil. Gənclərə bu əlamətdar gün münasibətilə təbriklərini çatdıran Riad Cəbrayılov deyib ki, Ulu Öndərin ölkə rəhbərliyinə gəlişi ilə bütün sahələrdə quruculuq və tərəqqi prosesinin əsası qoyulub. Hazırda bu siyasət Prezident İlham Əliyevin rəhbərliyi ilə uğurla davam etdirilir.
Sonra Xalq artistləri Gülyaz Məmmədova və Gülyanaq Məmmədova geniş təqdimatla çıxış ediblər.
Görüş zamanı diqqətə çatdırılıb ki, respublikamızda son illərdə həyata keçirilən müxtəlif irimiqyaslı layihələr, muğam televiziya müsabiqələri, festivallar, istedadlı gənclərin yaradıcılıq fəaliyyətinin stimullaşdırılması istiqamətində görülən tədbirlər ölkədə bu sahənin inkişafını şərtləndirən bariz nümunələrdəndir.
Xalq artistləri tədbirin davamında Ulu Öndər Heydər Əliyevlə olan xatirələrindən, dahi rəhbərin mədəniyyət xadimlərinə göstərdiyi diqqət və qayğıdan söhbət açıblar. Görüşdə vurğulanıb ki, 1998-ci ildə Ümummilli Lider Heydər Əliyevin müvafiq Sərəncamı ilə Gülyaz və Gülyanaq bacılarının eyni vaxtda “Azərbaycan Respublikasının Əməkdar artisti” fəxri adı ilə təltif olunması müasir mədəniyyət tarixində bir ilk idi.
Tədbir “Azərbaycan milli musiqisi, muğam və milli vokal ifaçılığı sənətinin inkişaf perspektivləri”, “Müasir gənclərin maarifləndirilməsində milli musiqi mədəniyyətinin rolu” və “Yaradıcı sənayenin təşkilində klassik ifaçılıq tərzinin əhəmiyyəti” mövzularında panel müzakirə ilə davam edib, auditoriyanın çoxsaylı sualları cavablandırılıb.
Bədii hissədə Xalq artistləri Gülyaz Məmmədova və Gülyanaq Məmmədovanın, həmçinin tələbələri – Məftun Səfərli və Əvəzxan Əzizovun ifasında milli musiqi nümunələri təqdim olunub.
Qeyd edək ki, “MədəniyyətimİZ” layihəsinin əsas məqsədi “Heydər Əliyev İli” çərçivəsində Ümummilli Lider Heydər Əliyevin həyat fəaliyyətinin öyrənilməsi, habelə ölkə mədəniyyətinin inkişafı istiqamətində gənclərin iştirakçılığını artırmaqdır.
Bütün xəbərlər Facebook səhifəmizdə
.jpg)
USD
EUR
GBP
RUB