ADNSU-da ağacəkmə aksiyası keçirilib - FOTOLAR

Aprelin 30-da Azərbaycan Dövlət Neft və Sənaye Universitetində (ADNSU) 30 aprel faciəsinin 15-ci ildönümü münasibəti ilə ağacəkmə aksiyası keçirilib. Universitetin rektor əvəzi, dosent Vazeh Əskərovun, universitetin professor-müəllim heyəti və qətliam zamanı həyatını itirənlərin yaxınlarının iştirak etdiyi tədbir 30 aprel faciə qurbanlarının xatirəsinə qoyulmuş barelyefin önünə əklil qoyulması və gül dəstələrinin düzülməsi ilə başlanılıb. Sonra universitetin həyətində faciə nəticəsində həyatını itirənlərin əziz xatirəsinə ağac əkilib. SİA xəbər verir ki, ağacın önündə quraşdırılmış lövhədə QR kod vasitəsi ilə universitetin web saytına giriş edib 30 aprel qətliamı zamanı həyatını itirənlər və zərərçəkənlər haqqında ətraflı məlumat almaq mümkündür. Ağacəkmə aksiyası başa çatdıqdan sonra anım tədbiri universitetdə çay süfrəsi arxasında davam edib.

ADNSU-nun rektor əvəzi, dosent Vazeh Əskərov çıxış edərək 30 aprel qətliamından danışıb. O bildirib ki, universitetin çox dəyərli müəllim və tələbələrinin həyatına son qoyulduğu bu hadisə təkcə ADNA (ADNSU) tələbələrinə və əməkdaşlarına qarşı yox, Azərbaycan təhsilinə, insanlığa qarşı törədilmiş qətliam idi. Dosent Vazeh Əskərov onu da qeyd edib ki, artıq 15-ci ildir ki, hər il aprelin 30-da universitetdə anım tədbiri keçirilir, faciə zamanı həyatını itirənlərin ailə üzvlərinin və yaxınlarının da iştirakı ilə onların xatirəsi yad olunur, bu hər zaman da belə olacaq. Sonra hadisə şahidi və zərərçəkmiş, ADNSU-nun “Sənaye maşınları” kafedrasının dosenti Zemfira Hüseynli, faciə zamanı həyatını itirən universitetin əməkdaşı Şəfa Məmmədovanın valideyni Xuraman Məmmədova, həlak olmuş tələbələrin valideynləri və faciənin şahidi olan universitet əməkdaşları çıxış edərək həmin qanlı gün haqqında təəssüratlarını bölüşüblər. Faciə qurbanlarının yaxınları onların həlak olmuş əzizlərinin xatirəsinin daim anıldığına görə ADNSU-nun rəhbərliyinə, müəllim və tələbə heyətinə təşəkkürlərini bildiriblər.