Azərbaycan Milli Elmlər Akademiyası Məhəmməd Füzuli adına Əlyazmalar İnstitutunun Elmi şurasının qərarı ilə Abbasqulu Ağa Bakıxanovun “Riyazül-Qüds” əsəri müasir əlifbada nəşr olunub.
SİA-nın AZƏRTAC-dan əldə etdiyi məlumata görə, institutdan bildirilib ki, əsəri əski əlifbadan transfoneliterasiya edib nəşrə hazırlayan Əlyazmalar İnstitutunun sabiq əməkdaşı, görkəmli əlyazmaşünas və tərcüməçi Arif Ramazanovdur.
“Riyazül-Qüds” XIX əsr görkəmli Azərbaycan maarifçisi, yazıçı, şair, ensiklopedik zəka sahibi Abbasqulu ağa Bakıxanovun ana dilində yazdığı irihəcmli bədii əsərlərindən biridir. Əsasən nəsrlə qələmə alınan, məqtəl nümunəsi olan bu əsərdə ərəb, fars və türk dillərində yazılmış nəzm parçaları verilib ki, onların çoxu A.Bakıxanovun öz qələminin məhsulu, ilk qələm təcrübəsidir.
Əsərin transfoneliterasiyasından əlavə, kitaba “Riyazül-Qüds”ün əlyazma nüsxəsinin fotofaksimilesi və Səadət Qarabağlının “Riyazül-Qüds” əsərlərinin əlyazma katibi Məşədi Ocaqverdi oğlu Mirzə Haqverdi Qarabaği haqqında məlumat” adlı məqaləsi də daxil edilib.
Qeyd edək ki, yeni nəşrin elmi redaktoru fəlsəfə elmləri doktoru Zəkiyyə Əbilova, “Ön söz” müəllifi akademik Möhsün Nağısoyludur. Kitabın cildində qeyd olunmuş ərəb qrafikalı yazılar Hacı Mustafa Mailoğlu tərəfindən yazılıb.
Bütün xəbərlər Facebook səhifəmizdə
USD
EUR
GBP
RUB