Dünyanın ən böyük kriptovalyuta birjası hesab edilən Binance bazar günü fəaliyyətini bərpa etdikdən sonra istifadəçiləri platformadan 3,6 milyard dollar (2,7 milyard funt sterlinq) dəyərində aktiv çıxarıblar. Bu hadisə tarixdə indiyədək qeydə alınmış ən böyük haker hücumu hesab olunur.
SİA-nın xarici mətbuata istinadən verdiyi xəbərə görə, hadisədən sonra şirkət bütün əməliyyatları müvəqqəti dayandırıb. Kiberhücum nəticəsində ümumilikdə 6,3 milyard dollar dəyərində rəqəmsal aktiv zərər görüb.
ABŞ Federal Təhqiqatlar Bürosu (FBI) da daxil olmaqla bir sıra nüfuzlu qurumlar kiberhücumun arxasında Şimali Koreyanın dayandığını bildiriblər.
Şirkətin açıqlamasına görə, hücum nəticəsində oğurlanan aktivlərin təxminən 95 faizi artıq kompensasiya edilib. Qalan məbləğin əldə olunması isə daha uzun vaxt tələb edə bilər. Binance hücumla əlaqədar yaranan bütün itkiləri qarşılayacağını dəfələrlə bəyan edib.
Binance sosial şəbəkə hesabında (X) bildirib:
"1 noyabr tarixində saat 06:00-dan 15:30-dək (Qrinviç vaxtı ilə) 4,649 milyard dollar məbləğində vəsaitin çıxarılması və 1,01 milyard dollar məbləğində vəsaitin yatırılması əməliyyatlarını həyata keçirmişik. Nəticədə xalis vəsait axını təxminən 3,64 milyard dollar təşkil edib".
Şirkətin bildirdiyinə görə, ilkin mərhələdə vəsait çıxarılmasında kəskin artım müşahidə olunsa da, sonradan bu göstərici azalıb və gözlənildiyi kimi sabitləşməyə başlayıb.
Binance qeyd edib ki, bazar günü qeydə alınan xalis vəsait çıxarılması şirkətin idarə etdiyi 171 milyard dollar dəyərində aktivlərin cəmi 2 faizindən bir qədər çoxunu təşkil edir.
Şirkət ötən həftə hücumun nəticələrinin aradan qaldırılması üçün 6,3 milyard dollardan çox vəsait ehtiyatı yaratdığını açıqlamışdı.
Bütün xəbərlər Facebook səhifəmizdə
USD
EUR
GBP
RUB