“Avtomobil nəqliyyatı haqqında” qanuna edilən son dəyişikliklər Azərbaycanda sərnişindaşıma infrastrukturunun daha sistemli, idarəolunan və standartlaşdırılmış şəkildə qurulması baxımından mühüm addımdır. Xüsusilə dayanacaq məntəqələri ilə bağlı müddəaların dəqiq şəkildə tənzimlənməsi uzun illər nəqliyyat sektorunda mövcud olan boşluqların aradan qaldırılmasına xidmət edir". Bu sözləri SİA-ya açıqlamasında nəqliyyat üzrə ekspert Aslan Əsədov deyib.
Onun sözlərinə görə, dayanacaq məntəqələrinin yerlərinin müəyyən edilməsi, quraşdırılması və idarə edilməsi ilə bağlı səlahiyyətlərin konkret icra hakimiyyəti orqanına həvalə olunması nəqliyyat axınının planlı şəkildə tənzimlənməsinə imkan yaradacaq: "Çünki şəhəriçi hərəkətdə ən böyük problemlərdən biri dayanacaqların nizamsızlığı, bəzi hallarda isə nəqliyyat vasitələrinin qeyri-rəsmi dayanacaq kimi istifadə etdiyi nöqtələrin mövcudluğudur. Yeni dəyişiklik bu kimi xaotik halların qarşısını almağa yönəlib və dispetçer nəzarətinin güclənməsinə səbəb olacaq. İnfrastruktur obyektlərinin təyinatının dəyişdirilməsi və yenidən qurulması zamanı rəyverici orqanın rolunun artırılmasıdır. Bu o deməkdir ki, hər hansı nəqliyyat infrastrukturu layihəsi sərnişin və yük axınlarının real statistikası və tələbatı nəzərə alınmadan həyata keçirilə bilməz. Bu addım planlama prosesini daha elmi və funksional edir. Xüsusən də sürətlə urbanizasiya gedən şəhərlərdə infrastrukturun mütəmadi yenilənməsi vacibdir və bu dəyişiklik həmin prosesi daha çevik idarə etməyə imkan verəcək.
Həmçinin 40.6-cı maddəyə elektron əmtəə-nəqliyyat qaiməsinin əlavə edilməsi yükdaşımaların rəqəmsallaşması istiqamətində mühüm yenilikdir. Bu, həm logistika prosesində şəffaflığı artıracaq, həm də yük axınının izlənməsini asanlaşdıracaq. Rəqəmsal sənəd dövriyyəsi həm sahibkarlar, həm də nəqliyyat şirkətləri üçün xərclərin azaldılmasına və əməliyyatların sürətlənməsinə şərait yaradır. Ümumilikdə, bu dəyişikliklərin tətbiqi şəhərsalma, nəqliyyat planlaması və sərnişin daşımalarının koordinasiyası arasında daha sıx inteqrasiyanı təmin edəcək. Beləliklə, sərnişinlərin rahatlığı, təhlükəsizliyi və xidmət keyfiyyəti yüksələcək, qanunsuz dayanma və qeyri-rəsmi dayanacaq problemləri isə minimuma enəcək. Nəticə olaraq demək olar ki, qanuna edilən dəyişikliklər nəqliyyat sektorunda idarəetmənin institusional gücləndirilməsinə, xidmət keyfiyyətinin standartlaşdırılmasına və infrastruktura dair qərarların daha rasional əsaslarla verilməsinə yönəlib. Bu, həm şəhər nəqliyyatı, həm də ölkə üzrə sərnişin və yükdaşımaların ümumi idarəetmə modelinin təkmilləşməsinə güclü təkan verəcək".
Bütün xəbərlər Facebook səhifəmizdə
.jpg)
.png "Əli Kərimlinin evində Mehdiyev FAKTLARI - ÜZƏ ÇIXDI!")
USD
EUR
GBP
RUB