Honq-Konqda məhkəmə 1989-cu ildə Pekində Tiananmen meydanında baş vermiş hadisələrin ildönümü ilə bağlı anım mərasimləri təşkil edən iki demokratiya fəalını milli təhlükəsizlik ittihamları üzrə təqsirli bilib. Onlar 10 ilədək həbs cəzası ilə üzləşə bilərlər.
SİA-nın xarici mətbuata istinadən verdiyi məlumata görə, Honq-Konq məhkəməsi demokratiya fəalları Li Çek-Yan və Çou Han-Tunqu milli təhlükəsizliyə qarşı təxribat törətməyə təhrik etməkdə təqsirli bilib.
69 yaşlı Li Çek-Yan və 41 yaşlı Çou Han-Tunq vaxtilə Çində Vətənpərvər Demokratik Hərəkatları Dəstəkləyən Honq-Konq Alyansının rəhbərləri olublar. Onlar 1989-cu ildə Pekində Tiananmen meydanında baş vermiş qanlı hadisələrin qurbanlarının xatirəsinə şamlarla anım mərasimlərinin təşkilində iştirak ediblər.
Fəallar 2021-ci ildə ittiham olunub və məhkəmə qarşısında təqsirlərini qəbul etməyiblər. Məhkəmənin cümə günü çıxardığı qərara əsasən, onlar “təxribatçılığa təhrik” ittihamı üzrə təqsirli sayılıblar.
Onları 10 ilədək həbs cəzası gözləyir. Cəzanın müddəti ilə bağlı qərarın daha sonra açıqlanacağı bildirilir.
Prokurorluq tərəfi fəalların insan hüquqları adı altında “milli təhlükəsizliyə təhlükə yaratdığını” iddia edib.
İnsan hüquqları üzrə vəkil olan və məhkəmədə özünü müdafiə edən Çou Han-Tunq may ayında çıxışı zamanı qanunun özünün məhkəmə qarşısında olduğunu bildirib.
Honq-Konqda söz və ifadə azadlığının məhdudlaşdırılmasını tənqid edən hüquq müdafiəçiləri məhkəmənin qərarına etiraz ediblər.
Honq-Konqda Azadlıq Komitəsinin rəhbəri Mark Klifford hökmün gözlənilməz olmadığını bildirib. Onun sözlərinə görə, məhkəmə sistemi bu şəxslərin taleyini hələ 2021-ci ildə müəyyənləşdirib.
Klifford Li Çek-Yan və Çou Han-Tunqu “əsl çinli vətənpərvərlər” adlandıraraq onların hakimiyyətə qarşı həqiqəti söylədikləri üçün susdurulduğunu iddia edib.
Tiananmen anım mərasimlərinə qadağa qoyulub.
Çin hakimiyyətinin 1989-cu ildə Tiananmen meydanında demokratiya tərəfdarlarının etirazlarını hərbi qüvvələrin köməyi ilə dağıtmasından sonra Honq-Konqda üç onillik ərzində bu hadisələrin qurbanlarının xatirəsinə genişmiqyaslı anım mərasimləri keçirilib.
Şamlarla keçirilən mərasimlər hər il on minlərlə insanı bir araya gətirirdi. Lakin tədbir 2020-ci ildə qadağan edildi. Bu qərar COVID-19 pandemiyasının ilk ilində, Pekinin 2019-cu ildə Honq-Konqda baş vermiş kütləvi hökumətə qarşı etirazların qarşısını almaq məqsədilə milli təhlükəsizlik qanununu tətbiq etməsindən bir neçə həftə əvvəl qəbul olunub.
Alyansın rəhbərləri ittiham olunduqları vaxtdan etibarən həbsdə saxlanılır.
“Human Rights Watch” təşkilatının Asiya üzrə direktoru Eleyn Pirson bildirib ki, Çou və Li Çin hökumətinin keçmişdə baş vermiş hadisələrin yaddaşından narahatlığını üzə çıxarıblar. O, dünya hökumətlərini Pekini Honq-Konqda azadlıqların məhdudlaşdırılmasına görə məsuliyyətə cəlb etməyə çağırıb.
Çou həbsxanadakı rəftarından danışıb.
Çou Han-Tunq hökm elan edilməzdən əvvəl yayımladığı şəxsi bloq yazısında həbsxanada ona qarşı rəftar barədə də məlumat verib.
O, məhbusların müşayiəti zamanı özünü “ipə bağlanmış it kimi” aparıldığını, biləklərinin, belinin və ayaqlarının qandallandığını bildirib.
Çou xüsusi qandalların tətbiqinin uzunmüddətli həbs zamanı ciddi ağrıya səbəb olduğunu qeyd edib. Onun sözlərinə görə, istifadə edilən qandallar bədənin qeyri-təbii vəziyyətdə saxlanmasına gətirib çıxarıb.
Çou Han-Tunq Honq-Konqda həbsdə olan və hakimiyyətə qarşı açıq şəkildə danışmağa davam edən azsaylı tanınmış siyasi məhbuslardan biridir.
1989-cu ilin iyununda Çin hökuməti Pekinin mərkəzində yerləşən Tiananmen meydanında toplaşan demokratiya tərəfdarı nümayişçilərin etirazlarını tank və hərbi qüvvələrin köməyi ilə dağıdıb.
Hadisələr zamanı yüzlərlə, bəzi qiymətləndirmələrə görə isə minlərlə insanın öldürüldüyü, çox sayda şəxsin yaralandığı bildirilir.
Pekin sonrakı illərdə Çində Tiananmen hadisələri barədə məlumatların yayılmasını və hadisənin ictimai şəkildə müzakirə olunmasını məhdudlaşdırıb.
Bütün xəbərlər Facebook səhifəmizdə
USD
EUR
GBP
RUB