"İmzalanan memorandum münasibətlərin inkişafına töhfə verəcək” - YAP Sədrinin müavini açıqladı

Azərbaycan və Ukraynanın hakim partiyaları arasında əməkdaşlıq memorandumunun imzalanması iki ölkə münasibətlərinin inkişafına töhfə verəcək. SİA xəbər verir ki, bunu Ukraynada səfərdə olan Yeni Azərbaycan Partiyası (YAP) Sədrinin müavini - Mərkəzi Aparatın rəhbəri Tahir Budaqov söyləyib.

Tahir Budaqov bildirib ki, Azərbaycanla Ukrayna çoxillik dostluq münasibətlərinə malikdir, dövlətlərimiz bir-birinin ərazi bütövlüyünü daim dəstəkləyib.

“Azərbaycan-Ukrayna münasibətlərinin yaranmasında ümummilli lider Heydər Əliyevin misilsiz xidmətləri olub. Hazırda isə Azərbaycan və Ukrayna prezidentləri İlham Əliyev və Vladimir Zelenskinin münasibətləri hər iki ölkənin milli maraqlarına əsaslanır. Dövlətlər arasında əməkdaşlıq strateji tərəfdaşlıq prinsipləri çərçivəsində inkişaf edir. Sözsüz ki, hakim Yeni Azərbaycan Partiyası ilə Ukraynanın “Xalqın Xidmətçisi” Partiyası arasında əlaqələrin qurulması ümumilikdə dövlətlərimiz, xalqlarımız arasında dostluq münasibətlərinin inkişafına öz töhfəsini verəcək”, - deyə YAP Sədrinin müavini əlavə edib.

Tahir Budaqov bildirib ki, imzalanan memorandum qarşılıqlı səfərlərin təşkili, eyni zamanda, təcrübə mübadiləsi, partiyaların gəncləri, diasporlar, vətəndaş cəmiyyətləri arasında münasibətlərin inkişafını, informasiya mübadiləsinin gücləndirilməsini nəzərdə tutur.

YAP

Bütün xəbərlər Facebook səhifəmizdə

loading...