8 Noyabr – Azərbaycan xalqının yaddaşına qızıl hərflərlə yazılmış, milli qürur və dövlətçilik tariximizin ən parlaq səhifələrindən biridir. Zəfər Günü xalqımızın uzun illər boyu qəlbində yaşatdığı Qarabağ həsrətinin sona çatdığı, milli birliyimizin, sarsılmaz iradəmizin və güclü dövlətimizin təntənə etdiyi möhtəşəm tarixdir. Bu gün Azərbaycan xalqı öz tarixinin ən şərəfli günlərindən birini böyük fəxarət hissi ilə qeyd edir.Otuz ilə yaxın davam edən işğal dövründə Azərbaycan xalqı öz doğma torpaqlarına qayıtmaq ümidini heç zaman itirmədi. Qarabağ nisgili hər bir azərbaycanlının qəlbində yaşayan ağrıya çevrilsə də, xalqımızın torpaqlarımızın azadlığına olan inamı sarsılmadı. Ulu Öndər Heydər Əliyevin müəyyən etdiyi dövlətçilik strategiyası, milli maraqlara əsaslanan siyasi xətt və güclü Azərbaycan dövlətinin formalaşdırılması gələcək Zəfərimizin möhkəm təməlini yaratdı.Prezident, Müzəffər Ali Baş Komandan İlham Əliyevin rəhbərliyi ilə Azərbaycan ötən illər ərzində böyük inkişaf yolu keçərək siyasi, iqtisadi və hərbi qüdrətini əhəmiyyətli dərəcədə artırdı. Ordumuzun müasirləşdirilməsi, müdafiə potensialının gücləndirilməsi və beynəlxalq mövqelərimizin möhkəmləndirilməsi torpaqlarımızın azad olunması üçün zəruri şərait yaratdı. 2020-ci il sentyabrın 27-də başlayan Vətən müharibəsi isə Azərbaycan xalqının tarixi ədaləti bərpa etmək əzmini bütün dünyaya nümayiş etdirdi. 44 gün davam edən Vətən müharibəsində Azərbaycan Ordusu misilsiz qəhrəmanlıq və peşəkarlıq göstərərək torpaqlarımızı işğaldan azad etdi. Hər bir döyüş, hər bir qələbə xalqımızın birliyinin və əsgərimizin Vətən sevgisinin təcəssümü oldu. Şəhidlərimizin qanı, qazilərimizin fədakarlığı və hərbçilərimizin igidliyi hesabına yazılan bu tarix Azərbaycan xalqının yaddaşında əbədi yaşayacaq. Noyabrın 8-də Şuşanın azad edilməsi isə Zəfərimizin zirvəsinə çevrildi. Müzəffər Ali Baş Komandan İlham Əliyevin Şəhidlər xiyabanından Azərbaycan xalqına müraciət edərək Şuşanın azad olunduğunu bəyan etməsi hər bir azərbaycanlının qəlbində unudulmaz sevinc və qürur hissi yaratdı. Bu xəbər yalnız hərbi qələbənin deyil, həm də milli ruhun, tarixi yaddaşın və mənəvi gücün təntənəsi idi. Şuşanın azadlığı ilə Azərbaycan xalqı öz mədəniyyətinin, tarixinin və milli kimliyinin ayrılmaz parçasına qovuşdu.Zəfər Günü bizə bir daha göstərdi ki, xalqın birliyi, dövlətin gücü və liderin qətiyyəti qarşısında heç bir maneə dayana bilməz. Bu Qələbə Azərbaycan dövlətinin qüdrətini, xalqımızın sarsılmaz iradəsini və ordumuzun döyüş qabiliyyətini bütün dünyaya nümayiş etdirdi. Eyni zamanda, Azərbaycan yalnız öz ərazi bütövlüyünü bərpa etmədi, beynəlxalq hüququn norma və prinsiplərinə əsaslanan tarixi ədaləti də təmin etdi.Bu gün azad edilmiş torpaqlarımızda genişmiqyaslı bərpa və quruculuq işləri həyata keçirilir. Qarabağ və Şərqi Zəngəzur yenidən qurulur, şəhər və kəndlərimiz dirçəlir, doğma yurdlarından didərgin düşmüş soydaşlarımız öz evlərinə qayıdırlar. Böyük Qayıdış prosesi Zəfərimizin davamı, dövlətimizin gələcəyə hesablanmış inkişaf strategiyasının mühüm istiqamətidir. Bu torpaqlarda yenidən həyatın canlanması, məktəblərin, yolların, yaşayış məntəqələrinin qurulması Qələbəmizin əbədi və dönməz xarakter daşıdığının göstəricisidir. Zəfər Günü həm də gələcək nəsillər qarşısında böyük mənəvi məsuliyyətimizi xatırladır. Biz bu şanlı tarixi yalnız qeyd etməməli, onun hansı çətinliklər, fədakarlıqlar və qurbanlar bahasına qazanıldığını gənc nəslə çatdırmalıyıq. Şəhidlərimizin qəhrəmanlığı, qazilərimizin Vətən sevgisi və xalqımızın həmrəyliyi daim təbliğ olunmalı, milli yaddaşımızın ayrılmaz hissəsi kimi qorunmalıdır. Azərbaycan xalqı bu Qələbə ilə haqlı olaraq fəxr edir və fəxr edəcək. Çünki 8 Noyabr sadəcə təqvimdə qeyd olunan bir gün deyil, milli qürurumuzun, müstəqilliyimizin və dövlətçilik əzmimizin rəmzidir. Bu tarix sübut etdi ki, Azərbaycan xalqı öz taleyini özü müəyyənləşdirən, milli maraqlarını qorumağa qadir olan güclü xalqdır.Əminliklə demək olar ki, Zəfər Gününün yaratdığı qürur hissi nəsildən-nəslə ötürüləcək, bu şanlı tarix xalqımızın yaddaşında daim yaşayacaq. Gələcək nəsillər 8 Noyabrı Azərbaycanın gücünün, birliyinin və tarixi Qələbəsinin təcəssümü kimi xatırlayacaqlar. Bu şanlı tarix bizimlə əbədi olacaq! Azərbaycan xalqı öz qəhrəmanları, müzəffər ordusu və qazandığı tarixi Zəfərlə hər zaman fəxr edəcəkdir.
YAP Qəbələ rayon təşkilatının sədri Abil Ağasəfov
Bütün xəbərlər Facebook səhifəmizdə
USD
EUR
GBP
RUB
