Ketogenik pəhriz kişilər və qadınlar üzərində fərqli təsir göstərə bilər. SİA-nın xarici mətbauata istinadən verdiyi məlumata görə, Texas Sağlamlıq Universitetinin San-Antonio kampusunda aparılmış və “Cell Reports” jurnalında dərc olunmuş tədqiqat göstərib ki, erkək siçanlarda bu pəhriz hüceyrələrdə yaşlanma əlamətlərinin toplanmasına səbəb olur. Dişilərdə isə bu effekt müşahidə olunmayıb.
Ketogenik pəhriz yüksək yağ və aşağı karbohidrat tərkibinə əsaslanır və 2-ci dərəcəli diabet xəstələrində şəkərin səviyyəsinin tənzimlənməsi və epilepsiyanın müalicəsi üçün istifadə olunur. Lakin yeni məlumatlar göstərir ki, erkək siçanlarda bu pəhriz yalnız hüceyrə yaşlanmasını deyil, həm də oksidləşdirici stresin artmasını təşviq edir.
Burada əsas rolu estrogen hormonu oynayır. Dişilərdə estrogen bu təsirlərdən qoruyur, erkəklərdə isə estrogen yeridilməsi ilə mənfi nəticələr ortaya çıxır. Üstəlik, dişilərə estrogenin fəaliyyətini bloklayan tamoksifen verildikdə, onların hüceyrələrində erkək siçanlardakı ilə eyni yaşlanma əlamətləri müşahidə olunub.
Tədqiqatın müəllifləri vurğulayırlar ki, ketogenik pəhrizə qarşı ortaya çıxan reaksiyadakı fərqlər cinsi hormonlarla bağlıdır və bu, fərdi qidalanma tövsiyələrinin hazırlanması üçün yeni perspektivlər açır.
Bütün xəbərlər Facebook səhifəmizdə
USD
EUR
GBP
RUB