Bakı Dövlət Universiteti (BDU) və Türkiyənin Bingöl Universiteti arasında anlaşma memorandumu imzalanıb.
SİA-nın AZƏRTAC-dan əldə etdiyi məlumata görə, BDU-dan bildirilib ki, imzalanma mərasimində çıxış edən rektor Elçin Babayev həm təbiət-dəqiq, həm də humanitar elmlər sahələrində hər iki universitetin böyük potensiala malik olduğunu qeyd edib. O bildirib ki, memorandum BDU və Bingöl Universitetinin tələbələri üçün yeni imkanlar açacaq, regionda təhsilin və elmin inkişafına mühüm töhfə verəcək. Xüsusilə biologiya, kimya, fizikanın müxtəlif istiqamətləri, arı xəstəlikləri, nanotexnologiyalar, iqtisadiyyat və qarşılıqlı maraq doğuran digər sahələrdə birgə elmi tədqiqatlar aparıla, ortaq elmi-tədqiqat laboratoriyası yaradıla bilər.
Bingöl Universitetinin rektoru Erdal Çelik BDU ilə uğurlu əməkdaşlığın Azərbaycan və Türkiyənin elmi inkişafında, beynəlxalq səviyyədə rəqabətədavamlı mütəxəssislər yetişdirilməsində mühüm önəm daşıdığını deyib.
Qeyd edək ki, memorandum çərçivəsində birgə layihələrin, ortaq beynəlxalq elmi seminar və konfransların keçirilməsi, tələbə və müəllim mübadiləsi proqramlarının təşkili nəzərdə tutulur. Bundan əlavə, memorandum universitetlərin tədris, tədqiqat və beynəlmiləlləşmə istiqamətlərində təcrübələrinin bölüşdürülməsi üçün yeni imkanlar yaradacaq.
Memorandumu BDU rektoru Elçin Babayev və Bingöl Universitetinin rektoru Erdal Çelik imzalayıblar.
Bütün xəbərlər Facebook səhifəmizdə
.jpg)
USD
EUR
GBP
RUB
