Bakı Dövlət Universitetinin (BDU) Tarix fakültəsi Azərbaycan Ordusunun Qarabağ iqtisadi rayonunda həyata keçirdiyi antiterror tədbirlərinin birinci ildönümü və Dövlət Suverenliyi Günü münasibətilə tədbir təşkil edib.
SİA-nın AZƏRTAC-dan əldə etdiyi məlumata görə, universitetdən bildirilib ki, tədbirdə Tarix fakültəsinin dekanı professor İbrahim Zeynalov tariximizə qızıl hərflərlə yazılan böyük Zəfərimizdən və onun məntiqi davamı olan antiterror tədbirlərindən söz açıb.
Professor qeyd edib ki, Ermənistanın yeni işğalçılıq planlarına, növbəti hərbi təcavüz cəhdinə və ardıcıl təxribatlarına cavab olaraq 2020-ci il sentyabrın 27-də başlanan 44 günlük Vətən müharibəsindəki parlaq Qələbə nəticəsində tarixi Azərbaycan torpaqları 30 illik işğaldan azad edilib. 2023-cü il sentyabrın 19-da isə Azərbaycanın Qarabağ iqtisadi rayonunda ermənilər tərəfindən törədilən genişmiqyaslı təxribatların qarşısının alınması və erməni silahlı qüvvələrinin qalıqlarının tərk-silah edilərək torpaqlarımızdan çıxarılması, həmin ərazidə Azərbaycanın Konstitusiya quruluşunun bərpa edilməsi məqsədilə antiterror tədbirləri həyata keçirilib. Cəmi 23 saat davam edən əməliyyat nəticəsində dövlət suverenliyimiz tam bərpa edilib. Azərbaycanın bütün ərazisində qanunun aliliyinin təmin olunduğunu və dövlət suverenliyinin bərpa edildiyini nəzərə alan Prezident İlham Əliyev bu il sentyabrın 19-da Azərbaycanda Dövlət Suverenliyi Gününün təsis edilməsi haqqında Sərəncam imzalayıb. Sərəncama əsasən, hər il sentyabrın 20-si Azərbaycan Respublikasında Dövlət Suverenliyi Günü kimi qeyd ediləcək.
BDU-nun Tarix fakültəsinin Qədim dünya və orta əsrlər tarixi kafedrasının müdiri akademik Yaqub Mahmudov, Azərbaycan tarixi (təbiət fakültələri üzrə) kafedrasının müdiri dosent Mehman Abdullayev Qarabağdakı erməni hərbi birləşmələrinin darmadağın edilməsi, Xocalı, Xocavənd, Ağdərə, Xankəndi və Əsgəran kimi şəhər və yaşayış məntəqələrimizin işğaldan azad edilməsi nəticəsində Azərbaycanın suverenliyinin və Konstitusiya quruluşunun tamamilə bərpa edilməsinin tarixi əhəmiyyətindən danışıblar.
Bildiriblər ki, Azərbaycan tarixinin 200 illik dövründə qazanılan ən böyük Qələbənin davamı ötən il sentyabrın 19-20-də yaşanıb. Antiterror tədbirləri düşmən qüvvələrinin məğlubiyyətini başa çatdıraraq, bu torpaqların əzəli və əbədi olaraq Azərbaycana aid olduğunu bütün dünyaya nümayiş etdirib.
Bütün xəbərlər Facebook səhifəmizdə
USD
EUR
GBP
RUB