"Qarşılıqlı investisiyalar Türk dövlətləri arasında iqtisadi inteqrasiyanı dərinləşdirə bilər" - İQTİSADÇI
.jpg)
"Qarşılıqlı investisiyaların artırılması Türk dövlətləri arasında iqtisadi inteqrasiyanın dərinləşməsinə ciddi təkan verə bilər. Çünki investisiya yalnız kapital axını deyil, eyni zamanda istehsal, texnologiya, logistika, xidmət və yeni biznes əlaqələrinin bir ölkədən digərinə keçməsi deməkdir. Türk dövlətlərinin bir-birinin iqtisadiyyatına daha çox sərmayə yatırması ortaq layihələrin sayını artırmaqla yanaşı, milli iqtisadiyyatların bir-birini tamamlamasına şərait yarada bilər". Bu sözləri SİA-ya açıqlamasında Liberal İqtisadçılar Mərkəzinin sədri, kənd təsərrüfatı üzrə ekspert Akif Nəsirli deyib.
Onun sözlərinə görə, burada xüsusilə nəqliyyat, enerji, kənd təsərrüfatı, rəqəmsal iqtisadiyyat, sənaye, logistika və turizm sahələri böyük potensiala malikdir: "Məsələn, Orta Dəhliz boyunca logistika infrastrukturuna, limanlara, dəmir yollarına və istehsal müəssisələrinə qarşılıqlı investisiyaların yönəldilməsi təkcə ayrı-ayrı ölkələrin deyil, bütün Türk dünyasının vahid iqtisadi məkan kimi imkanlarını genişləndirə bilər.
Bununla yanaşı, inteqrasiyanın sürətlənməsi üçün yalnız investisiya fondlarının yaradılması və kapital qoyuluşlarının artırılması kifayət deyil. İnvestorların hüquqlarının qorunması, gömrük prosedurlarının sadələşdirilməsi, vergitutmanın uyğunlaşdırılması, valyuta və ödəniş mexanizmlərinin təkmilləşdirilməsi, sərmayələrin hərəkəti qarşısındakı inzibati maneələrin azaldılması da vacibdir. Əks halda, investisiya imkanları olsa belə, real iqtisadi inteqrasiya gözlənilən sürətlə inkişaf etməyə bilər.
Türk Dövlətləri Təşkilatı çərçivəsində mövcud fond və maliyyə mexanizmlərinin daha fəal işləməsi də əhəmiyyətlidir. Xüsusilə özəl sektorun prosesə daha geniş cəlb olunması lazımdır. Dövlətlərarası sazişlər biznes üçün real və uzunmüddətli investisiya imkanlarına çevrilərsə, qarşılıqlı investisiyalar Türk dövlətləri arasında iqtisadi əlaqələri sadə ticarət münasibətlərindən ortaq istehsal və dəyər zəncirlərinə keçirə bilər.
Bu baxımdan, qarşılıqlı investisiyaların artması iqtisadi inteqrasiyanın yeni mərhələsinə keçidi sürətləndirə biləcək əsas amillərdən biridir. Əsas məsələ investisiyanın həcmini artırmaqla yanaşı, onu uzunmüddətli, istehsalyönümlü və regional dəyər yaradan layihələrə istiqamətləndirməkdir.
Bütün xəbərlər Facebook səhifəmizdə
USD
EUR
GBP
RUB
