Beynəlxalq Türk Mədəniyyəti və İrsi Fondunun Qazaxıstanın Mədəniyyət və İdman Nazirliyi ilə birgə əməkdaşlığı çərçivəsində ölkənin Türküstan vilayətinin Otrar bölgəsində “Böyük İpək Yolu üzərində toxuculuq və zərgərlik” mövzusunda beynəlxalq sənət sərgisi açılıb.
SİA-nın əldə etdiyi məlumata görə, sərgidə 6 türk ölkəsindən - Azərbaycan, Qazaxıstan, Türkiye, Qırğızıstan, Özbəkistan və Türkmənistandan gələn el sənətkarları iştirak ediblər.
Tədbir türk xalqlarının mədəni-mənəvi irsini təbliğ etmək, nəsillərə ötürmək, türk birliyini və əməkdaşlığını gücləndirmək məqsədilə həyata keçirilib.
Sərgidə Beynəlxalq Türk Mədəniyyəti və İrsi Fondunun Qazaxıstan nümayəndəsi, layihə rəhbəri Talgat Muxanov, Qazaxıstanın Mədəniyyət və İdman Nazirliyinin mədəniyyət komitəsinin sədri Kumis Seyitova, Otrar bölgəsinin Valisi Saken Sultanxanov, Mərkəzi Asiya və Sakit Okean Ölkələri Sənətkarlar Şurasının vitse-prezidenti, “Bizim irs” İctimai Fondunun prezidenti, Qazaxıstan Sənətkarlar İttifaqının sədri Ayjan Bekkulova çıxış ediblər.
Qeyd edək ki, Beynəlxalq Türk Mədəniyyəti və İrsi Fondu Türk dünyasının çoxəsrlik maddi-mənəvi sərvətləri ilə bağlı layihələrə dəstək verərək, türk dövlətləri ilə yanaşı, dünyanın müxtəlif ölkələrində ümumtürk irsini tanıdır.
Bütün xəbərlər Facebook səhifəmizdə
USD
EUR
GBP
RUB