...Qara dənizin İstanbul Boğazına açıldığı Anadolu Fənəri bugünkü turumuzun ilk dayanacağıdır.
Anadolu Fənəri yarımadada inşa edilmiş möhtəşəm Boğaz mənzərəsi və sahildə sıra ilə düzülmüş kiçik evləri ilə gözəl balıqçı qəsəbəsidir. Anadolu Fənəri bizi ləzzətli və təzə dəniz məhsullarının dadına baxa biləcəyiniz restoranları və adına uygun olaraq dəniz fənəri ilə Qara dənizdən Boğaza gələnləri qarşılayır.
Anadolu Fənərindən yolumuza davam edərək Poyrazköyə gəlirik. Bu, Boğazın ən gözəl kəndlərindən biridir. Qələbəlikdən uzaq, sakit məkanda vaxt keçirmək istəyənlər üçün ideal yerdir. Bir müddət sonra sahildəki balıqçı qayıqlarının və yaraşıqlı kənd evlərinin yanından keçəcəyik. Burada Genuyalılar dövrünə aid bir qala var. Bizans və Osmanlının nəzarətinə keçən Poyrazköy qalası Qara dənizdən Boğaza keçidləri nəzarətdə saxlamaq və Boğazın təhlükəsizliyini təmin etmək üçün tikilib.
İndi marşrutumuzda başqa bir balıqçı qəsəbəsi var. İstanbulun ən sakit balıqçılıq bölgələrindən biri olan Anadolu Kavağına gedirik. “Səyyahı” körpüdə lövbərləyib köhnə taxta evləri, çoxəsrlik çinarları və heyrətamiz Boğaz mənzərəsi ilə Anadolu Kavağını gəzəcəyik.
Anadolu Kavağı Boğazın ən gözəl yerlərindən biridir. Bura Qara dənizi Aralıq dənizi ilə birləşdirən ticarət yolunun kəsişməsində yerləşir. Bu, təkcə ticarətdə deyil, həm də müdafiədə vacibdir. Çünki hər dövrdə Boğazın müdafiəsinə böyük əhəmiyyət verilirdi. Bu strateji mövqeyə görə Anadolu Kavağı Bizanslılar, Genuyalılar və Osmanlılar arasında davamlı olaraq əldən- ələ keçib.
Bir azdan görəcəyimiz Yoros qalası Qara dəniz tərəfdən İstanbula girişə nəzarət etmək üçün İmros qalası ilə birlikdə inşa edilib. Yoros qalası Genuya qalası kimi tanınır. Çünki qala uzun müddət genuyalıların əlində olub. Lakin divarlarındakı gözəçarpan yazılar qalanın Şərqi Roma İmperiyası dövründə tikildiyini göstərir. Əhatə etdiyi ərazi baxımından qala İstanbuldakı bütün qalaların ümumi sahəsindən daha böyükdür. Gəlin “Səyyah”ı doka bağlayıb qalaya doğru addımlayaq. YUNESKO-nun Müvəqqəti İrs Siyahısına daxil olan Yoros qalasının daxili divarları hələ də yaxşı vəziyyətdədir və olduqca diqqəti cəlb edir. Lakin qazıntı və bərpa işləri davam etdiyi üçün qalaya giriş qadağandır. Ona görə də biz ancaq qalanın qapısına gedib oradakı kafelərin birində bir stəkan çaydan udumlayıb Boğazın mavi sularını seyr edəcəyik. Bu mənzərədən ayrılmaq çətindir, amma Anadolu Kavağı meydanında görülməyə dəyər tikililər var. Diqqətçəkən tarixi binalar arasında yaşı beş yüz ildən çox olan Midilli Əli Rəis Məscidi və oyma işləri ilə diqqət çəkən Cevriyə Xatun Çeşməsi var.
İndi İstanbulun ikinci ən yüksək təpəsi olan Yuşa Təpəsinə gedirik. Bu yer qədim zamanlardan müxtəlif inanclara sahib sivilizasiyalar tərəfindən müqəddəs sayılıb. Bu gün bütün dinlərdən olan turistlərin ziyarət etdiyi bir məkandır. Məlumdur ki, Zevs məbədi qədim zamanlarda tikilib, sonralar kilsəyə çevrilib. Təəssüflər olsun ki, İstanbulda yüz illər boyu baş verən zəlzələlər nəticəsində bu tikililərdən günümüzə qədər gəlib çatmış heç bir qalıq yoxdur. Yuşa Təpəsinin adı Musa peyğəmbəri səfərlərində müşayiət etdiyi güman edilən Yeşua peyğəmbərin adından götürülüb. Bu təpənin Boğazı bütün əzəməti ilə görməyə imkan verən qeyri-adi mənzərəsi var.
Qeyd edək ki, SİA bu barədə Tükiyə saytlarına istinad etdi.
Bütün xəbərlər Facebook səhifəmizdə
USD
EUR
GBP
RUB
