"Karbon emissiyasının azaldılması, iqlim dəyişikliyi ilə mübarizə üçün bərpa olunan enerji mənbələrinə keçid, enerji səmərəliliyi, elektrikli nəqliyyatın təşviqi və meşə örtüyünün bərpası kimi tədbirləri əhatə edir. Karbon emissiyasının (atmosferə buraxılan karbon qazı və digər istixana qazlarının) azaldılması üçün dünyada və bir çox ölkədə konkret planlar hazırlanır. Bu planların əsas məqsədi iqlim dəyişikliyini yavaşlatmaqdır".
Bu sözləri SİA-ya açıqlamasında Səma və Ekososial-İqtisadi İnkişafa Yardım İctimai Birliyinin sədri İradə Həsənova deyib.
.jpg)
Onun sözlərinə görə, bu istiqamətdə əsas beynəlxalq sənədlərdən biri Paris Sazişidir: "Bu razılaşmaya qoşulan ölkələr emissiyaları azaltmaq üçün milli planlar hazırlayırlar.
İqlim dəyişikliyi XXI əsrin ən ciddi qlobal problemlərindən biridir. Atmosferə buraxılan karbon emissiyalarının artması qlobal istiləşməyə, quraqlıqların və ekstremal hava hadisələrinin çoxalmasına səbəb olur. Bu səbəbdən Azərbaycan da iqlim dəyişikliyinin təsirini azaltmaq üçün konkret tədbirlər həyata keçirməyə çalışır. Ölkənin bu istiqamətdə əsas beynəlxalq öhdəliklərindən biri Paris Sazişi çərçivəsində götürülmüşdür. Həmin razılaşmaya əsasən Azərbaycan istixana qazı emissiyalarının azaldılması istiqamətində mərhələli tədbirlər görməyi qarşısına məqsəd qoyub.
Karbon emissiyasının azaldılması üçün ilk və ən vacib addımlardan biri enerji sektorunun transformasiyasıdır. Azərbaycan son illərdə bərpa olunan enerji mənbələrinin inkişafına xüsusi diqqət yetirir. Günəş və külək enerji potensialının yüksək olduğu bölgələrdə yeni layihələrin həyata keçirilməsi planlaşdırılır.
Karbon emissiyasının azaldılmasında ikinci mühüm istiqamət enerji səmərəliyinin artırılmasıdır. Sənaye müəssisələrində və yaşayış binalarında enerji itkilərinin azaldılması həm iqtisadi, həm də ekoloji baxımdan böyük əhəmiyyət daşıyır. Müasir texnologiyaların tətbiqi, istilik izolyasiyasının yaxşılaşdırılması və enerji qənaətli avadanlıqlardan istifadə karbon emissiyalarının azalmasına ciddi təsir göstərə bilər.
Nəqliyyat sektoru da emissiyaların formalaşmasında mühüm paya malikdir. Böyük şəhərlərdə avtomobil sayının artması havanın çirklənməsini artırır. Bu baxımdan ictimai nəqliyyatın inkişafı, elektrik və hibrid avtomobillərin istifadəsinin təşviqi, velosiped və piyada infrastrukturlarının genişləndirilməsi ekoloji vəziyyətin yaxşılaşdırılmasına kömək edə bilər.
Meşələrin qorunması və yaşıllıq sahələrinin genişləndirilməsi də karbon emissiyalarının azaldılması üçün mühüm vasitədir. Meşələr karbon qazını udaraq atmosferin təmizlənməsinə töhfə verir. Buna görə də yeni meşə zolaqlarının salınması, şəhərlərdə yaşıllıq sahələrinin artırılması və mövcud ekosistemlərin qorunması dövlət siyasətinin vacib istiqamətlərindən biri olmalıdır.
Eyni zamanda tullantıların idarə olunması və təkrar emal sisteminin inkişafı da emissiyaların azalmasına müsbət təsir göstərir.
Nəticədə karbon emissiyalarının azaldılması yalnız dövlət siyasəti ilə deyil, həm də cəmiyyətin bütün səylərinin iştirakı ilə mümkün ola bilər. Enerji siyasətində yeniliklər, ekoloji təmiz texnologiyaların tətbiqi və əhalinin ekoloji məsuliyyətinin artırılması Azərbaycanın daha dayanıqlı və sağlam ekoloji gələcəyinin formalaşmasına xidmət edəcək".
Bütün xəbərlər Facebook səhifəmizdə
.jpg "Bakıda “Ferrari” qaydaları belə pozdu")
.jpg "Prezident Nəyi Açıqladı! - Şok!")
USD
EUR
GBP
RUB