Yay fəslinin gəlişi ilə insanlar şəhərin səs-küyündən uzaqlaşaraq rayonlara, meşələrə, dağlara, çay kənarlarına üz tuturlar. Təbiətin qoynunda keçirilən bir neçə saatlıq istirahət insanın ruhunu dincəldir, ona yeni enerji verir. Ancaq təəssüf ki, hər kəs təbiətdən istifadə etməyi bacarsa da, onu qorumağın məsuliyyətini dərk etmir.
Bu gün istirahət məkanlarına gedənlərin ardınca qalan mənzərə heç də ürəkaçan deyil. Plastik butulkalar, sellofan torbalar, birdəfəlik qablar, siqaret kötükləri və müxtəlif məişət tullantıları meşələrin, çayların və yaşıllıqların üzərində qalır. İnsanlar bir neçə saat əyləndikləri məkana sanki öz vicdansızlıqlarının izini qoyub gedirlər. Halbuki təbiət bizim zibil qabımız deyil. O, gələcək nəsillərə ötürməli olduğumuz ən qiymətli sərvətlərdən biridir.
Daha təhlükəlisi isə bəzi insanların yandırdıqları ocaqları tam söndürmədən ərazini tərk etmələridir. Bir neçə köz parçası, bir siqaret kötüyü və ya küləyin təsiri ilə alovlanan quru otlar minlərlə ağacın məhv olmasına səbəb ola bilər. Bir anlıq səhlənkarlıq illərlə formalaşmış meşə ekosistemini yox edə, yüzlərlə canlı növünün yaşayış mühitini məhv edə bilər.
Meşə yanğınları təkcə ağacların yanması deyil. Bu, quşların yuvalarının külə dönməsi, heyvanların həyatını itirməsi, havanın çirklənməsi, torpağın məhsuldarlığının azalması və insanların nəfəs aldığı təmiz oksigen mənbələrinin məhv olması deməkdir. Bir ağacın böyüməsi üçün on illər lazımdır, onu məhv etmək üçün isə bir neçə dəqiqə kifayət edir.
Ən ağrılı məqam isə odur ki, təbiətə vurulan zərərin böyük hissəsi məhz insan məsuliyyətsizliyindən qaynaqlanır. Biz bəzən bir gün istirahət etdiyimiz məkana elə davranırıq ki, sanki bir daha ora qayıtmayacağıq. Halbuki çirkləndirdiyimiz təbiət də, yandırdığımız meşə də öz ölkəmizin sərvətidir.
Bu gün hər birimiz özümüzdən başlamalıyıq. Getdiyimiz ərazini təmiz saxlamalı, tullantılarımızı xüsusi yerlərə atmalı, ocaq qaladıqda isə onu tam söndürdüyümüzə əmin olmalıyıq. Çünki təbiəti qorumaq yalnız dövlət qurumlarının deyil, hər bir vətəndaşın borcudur.
Unutmayaq ki, təbiət bizə miras qalmayıb, onu gələcək nəsillərdən borc almışıq. Bu borcu isə yalnız onu qorumaqla qaytara bilərik.
Bütün xəbərlər Facebook səhifəmizdə
USD
EUR
GBP
RUB