Fransa və Səudiyyə Ərəbistanı Paris yaxınlığında 7 milyard dollarlıq əyləncə parkının tikintisi ilə bağlı razılığa gəlib.
SİA-nın xarici mətbuata istinadən verdiyi xəbərə görə, layihə Səudiyyə Ərəbistanının vəliəhdi Məhəmməd bin Salmanın Parisə səfəri zamanı enerji, müdafiə, süni intellekt və turizm də daxil olmaqla müxtəlif sahələr üzrə imzalanan bir sıra sazişlərdən biridir.
Fransa Prezidenti Emmanuel Makron ilə Səudiyyə Ərəbistanının vəliəhdi Məhəmməd bin Salmanın Yelisey sarayında keçirdiyi görüşdən sonra iki ölkə Paris yaxınlığında 6 milyard avro (7 milyard dollar) dəyərində əyləncə parkı kompleksi yaradılması planını açıqlayıb.
Razılaşma Makron və Məhəmməd bin Salmanın iki ölkə arasında iqtisadi və müdafiə əlaqələrini gücləndirmək səyləri çərçivəsində bazar ertəsi imzalanan bir sıra sənədlər arasında yer alıb.
Fransa Prezidentinin ofisinin məlumatına görə, layihə Parisdən təxminən 30 kilometr şimal-qərbdə, Serji-Pontuaz yaxınlığında üç tematik parkın tikintisini nəzərdə tutur. Onlardan biri manqa mövzusunda olacaq. Layihənin təxminən 22 min yeni iş yeri yaratması gözlənilir. Parkların idarə olunmasını Səudiyyə Ərəbistanının dövlət sərvət fondunun investisiya qolu olan Qiddiya həyata keçirəcək.
Makron layihəni “möhtəşəm” adlandıraraq, onun “Disneyland Paris” miqyasında yeni qlobal turizm məkanı yaradacağını bildirib. O, Qiddiya və Səudiyyə Ərəbistanına fransız potensialına göstərdikləri “etimada” görə təşəkkür edib. Makron layihəni xarici investisiyaları və yeni iş yerlərinin yaradılmasını təşviq edən “Fransanı seç” təşəbbüsünün uğurlarından biri kimi qiymətləndirib.
“Biz dünyanı təəccübləndirməyə davam edəcəyik. Bu uğurla çox qürur duyuram”, - deyə Makron əlavə edib.
Layihənin əsası 2024-cü ilin dekabrında Riyadda Makron və Məhəmməd bin Salman arasında keçirilən görüş zamanı qoyulub. Görüş zamanı onların manqa və xüsusilə “Dragon Ball Z”yə olan “ortaq maraqları”nı kəşf etdikləri bildirilib. Bu barədə Fransa prezidentinin müşaviri jurnalistlərə məlumat verib.
Makron və Məhəmməd bin Salmanın iştirakı ilə keçirilən mərasimdə imzalanan digər sazişlər enerji, süni intellekt, aviasiyanın maliyyələşdirilməsi, nəqliyyat və səhiyyə sahələrini əhatə edib.
Bernard Smit bildirib ki, müdafiə sahəsində əməkdaşlığın gücləndirilməsini, kibertəhlükəsizlik, süni intellekt üzrə təlim və hərbi hazırlıq sahələrində təcrübə mübadiləsini nəzərdə tutan niyyət məktubu da imzalanıb.
“Yeni strateji tərəfdaşlar axtaran Səudiyyə Ərəbistanı Fransa müdafiə sənayesi üçün mühüm bazardır. Fransa hökuməti Səudiyyə Ərəbistanının müdafiə sahəsində əməkdaşlığında iştirakını davam etdirmək istəyir”, - deyə müxbir qeyd edib.
Fransa Prezidentinin ofisi həmçinin Səudiyyə vəliəhdinin səfəri zamanı fransız şirkətləri ilə daha iki müqavilənin imzalandığını açıqlayıb. Onlardan biri Səudiyyə Ərəbistanının Qırmızı dəniz sahilində yerləşən Ciddə İslam Limanının inkişafına dəstək göstərilməsi məqsədilə dəniz-logistika şirkəti CMA CGM ilə imzalanan 434 milyon dollarlıq müqavilədir. Digər müqavilə isə Ər-Riyad metrosu üçün vaqonların tədarükünü nəzərdə tutan Fransanın Alstom şirkəti ilə imzalanmış 580 milyon dollarlıq sazişdir.
Bu, Vəliəhd Məhəmməd bin Salmanın Fransaya üçüncü rəsmi səfəridir. Səfər Səudiyyə Ərəbistanının ənənəvi tərəfdaşlıq əlaqələrindən kənara çıxaraq yeni təhlükəsizlik tərəfdaşlıqları qurmaq səyləri fonunda baş tutub. Bu, həmçinin vəliəhdin bu ayın əvvəlində Türkiyə və Pakistanla imzaladığı üçtərəfli Məkkə Birgə Müdafiə Sazişindən sonra ilk xarici səfəri olub.
Makron və Məhəmməd bin Salman iqtisadiyyat və müdafiə məsələləri ilə yanaşı, regiondakı gərginlik ocaqları ilə bağlı da birgə bəyanat yayıblar.
Tərəflər ABŞ və İran arasında münaqişənin danışıqlar yolu ilə başa çatdırılmasına çağırıb və Hörmüz boğazında normal dəniz nəqliyyatının bərpa edilməsini tələb ediblər. Onlar həmçinin ABŞ-ın vasitəçiliyi ilə əldə olunan HƏMAS-ın tərksilah edilməsi razılaşmasını alqışlayıb və İsrailin Qəzzaya qarşı müharibəsində davamlı atəşkəsin təmin olunmasına çağırış ediblər.
İki ölkə Fələstin dövlətinə dəstəklərini bir daha təsdiqləyib və İsrailin Livan ərazisindən çıxmasını tələb edib. Bundan başqa, Yəməndəki husilərin Səudiyyə Ərəbistanına və ticarət gəmilərinə qarşı hücumlarını pisləyiblər. İki lider Suriyanın sabitliyi və bərpasına dəstəklərini də ifadə edib.
Bütün xəbərlər Facebook səhifəmizdə
USD
EUR
GBP
RUB