Azərbaycan Tibb Universiteti (ATU) Bakıda keçirilən BMT-nin Ümumdünya Şəhərsalma Forumunun 13-cü Sessiyasında (WUF13) həm yerli və xarici tələbə, həm də inzibati mütəxəssis heyəti ilə yüksək səviyyədə, fəal təmsil olunub. Universitetin Müalicə-profilaktika, Stomatologiya, Əczaçılıq və İctimai səhiyyə fakültələrinin tələbələri qlobal tədbirdə “First Aid”, “Dispeçer”, “Medical Data Operator” və “Medical Supply Team” kimi müxtəlif istiqamətlər üzrə könüllü fəaliyyət göstərərək forumun təşkilati və tibbi dəstək işlərinə töhfə veriblər. Bununla yanaşı, ATU Tələbə Həmkarlar İttifaqı Komitəsinin aktiv nümayəndələri də həm komanda üzvü, həm də könüllü qismində tədbirdə iştirak edərək yüksək təşkilatçılıq və operativlik nümayiş etdiriblər.
Gələcəyin həkimləri olan bu tələbələr kliniki mühitdən kənara çıxaraq ictimai səhiyyə, şəhər dayanıqlılığı və ekoloji təhlükəsizliyin kəsişmə nöqtələrinə dair dialoqlarda yer alıblar. Tədbir əməliyyatlarına struktur dəstəyi verməklə yanaşı, gənclərə yönəmiş panel müzakirələrində də fəallıq göstərən ATU tələbələri müasir şəhərsalma planlamasının icma rifahına və səhiyyə infrastrukturuna birbaşa təsirini diqqət mərkəzində saxlayıblar. Tələbə nümayəndəliyindən başqa, ATU-nun inzibati heyəti də qlobal tədbirin strateji sessiyalarında yaxından iştirak edib. Universitetin İnnovasiya və keyfiyyətin idarə olunması şöbəsinin nümayəndələri, o cümlədən şöbə müdiri, dosent Aygün Babayeva, mütəxəssislər Aynurə Cəfərova və Leyla Abbasova WUF13-də rəsmi nümayəndə qismində təmsil olunublar.
WUF13 çərçivəsində gənclərin beynəlxalq tədbirdə iştirakı onların peşəkar inkişafı və praktiki təcrübə qazanması baxımından da mühüm əhəmiyyət daşıyıb. Eyni zamanda ATU tələbələrinin və əməkdaşlarının fəal iştirakı Azərbaycanda artan mühüm bir tendensiyanı nümayiş etdirir: beynəlxalq şəbəkələr qurmaq, multidissiplinar tədqiqatları təşviq etmək və gələcəyin qlobal vətəndaşlarını yetişdirmək üçün qlobal tədbirlərdən səmərəli istifadə olunur.
Ümumdünya Şəhərsalma Forumu müasir dünyanın üzləşdiyi ən aktual məsələlərdən birini – sürətli şəhərsalmanı və onun icmalar, şəhərlər, ölkələr, iqlim dəyişməsi və siyasi kurslara təsirini araşdırmaq məqsədilə 2001‑ci ildə Birləşmiş Millətlər Təşkilatı tərəfindən təsis edilib. BMT‑nin Məskunlaşma Proqramı (UN‑Habitat) tərəfindən təşkil olunan bu Forum dayanıqlı şəhərsalma problemlərinin həllinə həsr olunmuş yüksək səviyyəli, açıq və inklüziv platformadır.
“Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri’ mövzusuna həsr olunmuş WUF13 qlobal mənzil çağırışlarını ön plana çəkərək mənzil təminatını inklüzivlik və davamlılığın əsas amili kimi araşdırır və Yeni Şəhər Gündəliyinin icrasının formalaşdırılmasına töhfə verir.
Mətləb Salahov
Bütün xəbərlər Facebook səhifəmizdə
USD
EUR
GBP
RUB