...Beynəlxalq tədqiqatçılar qrupu bütün “sağlam vərdişlərin” iş yerində xroniki stressin idarə olunmasında eyni dərəcədə təsirli olmadığını müəyyən edib. Ən təsirli qoruyucu amillər keyfiyyətli yuxu və qidalanma idi, fiziki fəaliyyət isə ümumi sağlamlıq faydalarına baxmayaraq belə bir təsir göstərmədi. Alimlər bu nəticəyə on il ərzində 2871 Kanadalı işçinin məlumatlarını təhlil etdikdən sonra gəliblər.
SİA xəbər verir ki, bu barədə The Conversation bildirib.
İş yerində stress yaşayan insanlara adətən daha çox hərəkət etmək, düzgün qidalanmaq, kifayət qədər yatmaq və pis vərdişlərdən imtina etmək tövsiyə olunur.
Lakin tədqiqatçılar bu amillərdən hansının iş stressinin sağlamlığa təsirini azaltmağa kömək etdiyini sınaqdan keçirmək qərarına gəliblər.
Bunu etmək üçün onlar beş vərdiş - yuxu keyfiyyəti, qidalanma, fiziki fəaliyyət, spirtli içki qəbulu və siqaret çəkmək - ilə iştirakçıların ümumi sağlamlığı arasındakı əlaqəni araşdırıblar.
Yuxunun ən güclü qoruyucu amil olduğu sübut edilib. Tədqiqat müəlliflərinə görə, yaxşı yuxu diqqəti, emosional sabitliyi, bərpanı dəstəkləyir və həmçinin digər sağlam vərdişlərin qorunmasına kömək edir.
Tədqiqatçılar qeyd edirlər ki, yuxu yalnız sağlam həyat tərzinin bir elementi deyil, həm də onun təməlidir.
Qidalanma da əhəmiyyətli təsir göstərib. Alimlər balanslı qidalanmanın uzunmüddətli stress zamanı bədənin fiziki və psixoloji resurslarını qorumağa kömək etdiyini irəli sürürlər. Fiziki fəaliyyətin nəticələri gözlənilməz olub.
Daha tez-tez idman edən insanlar ümumi sağlamlıqlarını daha yaxşı qiymətləndirsələr də, idman iş stressinin bədənə təsirini yuxu və qidalanma qədər effektiv şəkildə azaltmayıb. Müəlliflər sağlam olmaq və stressdən qorunmaq həmişə eyni şey olmadığını vurğulayırlar.
Tədqiqatçılar həmçinin xatırladırlar ki, sağlam vərdişlər zəif təşkil olunmuş işin vurduğu zərəri tamamilə kompensasiya edə bilməz.
Onlar hesab edirlər ki, şirkətlər işçilərin iş yükünü azaltmalı, iş saatlarından kənar ünsiyyəti məhdudlaşdırmalı və düzgün istirahət üçün şərait yaratmalıdırlar.
Əli Babayev
Bütün xəbərlər Facebook səhifəmizdə
USD
EUR
GBP
RUB
