"Bu gün beynəlxalq siyasətdə əsas məsələ görüşlərin sayı deyil, onların yaratdığı real nəticələrdir" - MİLLƏT VƏKİLİ
"Müasir beynəlxalq münasibətlər sistemində COP31 kimi qlobal platformalar artıq yalnız iqlim problemlərinin müzakirə olunduğu məkan deyil. Bu tədbirlər eyni zamanda dövlətlərin siyasi maraqlarının uzlaşdırıldığı, yeni iqtisadi tərəfdaşlıqların formalaşdırıldığı və gələcək geosiyasi əməkdaşlığın konturlarının müəyyən edildiyi mühüm diplomatik platformalara çevrilib".
Bu sözləri SİA-ya açıqlamasında Milli Məclisin Deputatı Vüqar İskəndərov deyib.
Onun sözlərinə görə, xüsusilə dövlət başçıları səviyyəsində keçirilən ikitərəfli görüşlər bir çox hallarda aylarla davam edən diplomatik danışıqlara yeni impuls verir:
"Azərbaycanın belə beynəlxalq tədbirlərdə fəal iştirakı ölkəmizin çoxşaxəli xarici siyasətinin mühüm istiqamətlərindən biridir. Prezident İlham Əliyevin rəhbərliyi ilə həyata keçirilən diplomatik siyasətin əsas xüsusiyyətlərindən biri də beynəlxalq platformaların yaratdığı imkanlardan konkret siyasi və iqtisadi nəticələr əldə etmək üçün istifadə olunmasıdır.
Burada mühüm bir məqama diqqət yetirməliyik. Azərbaycan artıq yalnız enerji resursları ilə tanınan dövlət deyil. Ölkəmiz Avropa ilə Asiyanı birləşdirən nəqliyyat-kommunikasiya xətlərinin mühüm iştirakçısı, enerji təhlükəsizliyində etibarlı tərəfdaş və beynəlxalq dialoq təşəbbüslərinin fəal iştirakçısı kimi çıxış edir. Bu isə müxtəlif dövlətlərin Azərbaycanla əməkdaşlıq maraqlarını genişləndirir.
COP31 çərçivəsində Azərbaycan, Türkiyə, Gürcüstan və Bolqarıstan arasında təmiz enerji sahəsində strateji tərəfdaşlıq sazişinin imzalanması bunun konkret nümunəsidir. Belə təşəbbüslər Azərbaycanın yaşıl enerji potensialının beynəlxalq bazarlara çıxarılması, yeni investisiyaların cəlb edilməsi və regional enerji əlaqələrinin genişləndirilməsi baxımından mühüm perspektivlər yaradır.
Digər mühüm istiqamət Orta Dəhliz, Zəngəzur bağlantısı və beynəlxalq logistika layihələridir. Qlobal ticarət marşrutlarının yenidən formalaşdığı bir dövrdə Azərbaycanın coğrafi mövqeyi ilə yaratdığı müasir infrastruktur bir-birini tamamlayır. İkitərəfli görüşlər bu imkanların yeni tərəfdaşlara təqdim edilməsi, investisiya və tranzit əməkdaşlığının genişləndirilməsi üçün əlverişli şərait yaradır.
COP31-in qardaş Türkiyədə keçirilməsi də xüsusi əhəmiyyət daşıyır. Azərbaycanın COP29-a ev sahibliyi təcrübəsinin Türkiyə ilə bölüşülməsi iki ölkə arasında əməkdaşlığın beynəlxalq müstəvidə də davam etdiyini göstərir. Bakı və Ankara arasında strateji müttəfiqlik münasibətləri enerji, nəqliyyat, iqlim diplomatiyası və regional bağlantılar sahəsində yeni layihələrin həyata keçirilməsi üçün geniş imkanlar açır.
Hesab edirəm ki, bu proseslərə yalnız diplomatik protokol çərçivəsində yanaşmaq düzgün olmazdı. Bu gün beynəlxalq siyasətdə əsas məsələ görüşlərin sayı deyil, onların yaratdığı real nəticələrdir. Yeni bazarlara çıxış, sərmayə qoyuluşu, texnologiya transferi, siyasi dialoqun genişlənməsi və uzunmüddətli iqtisadi layihələrin formalaşması həmin görüşlərin strateji əhəmiyyətini müəyyən edir.
Nəticə etibarilə, COP31 kimi platformalar Azərbaycan üçün həm mövcud tərəfdaşlıqları möhkəmləndirmək, həm də yeni siyasi və iqtisadi əməkdaşlıq istiqamətləri müəyyənləşdirmək imkanıdır. Müasir diplomatiyada güc yalnız beynəlxalq tədbirlərdə iştirak etməklə deyil, həmin iştirakın konkret milli maraqlara xidmət edən nəticələrə çevrilməsi ilə ölçülür. Azərbaycanın da qarşısında duran əsas hədəflərdən biri məhz bu imkanları uzunmüddətli siyasi və iqtisadi dividendlərə çevirməkdir".
Bütün xəbərlər Facebook səhifəmizdə
USD
EUR
GBP
RUB