Azərbaycanlı rəssam Aydan Salahovanın “Qadın” rəsm əsərini “Azərxalça” ASC-nin yaradıcı qrupu xalça üzərinə köçürüb
İyunun 14-də “Azərxalça” ASC- nin İçərişəhərdə yerləşən xalça nümayişi salonunda limitli və eksklüziv “Qadın” triptixi, xalça kolleksiyasının təqdimatı keçirilib. Bu dəfə rəssam, heykəltəraş, qrafik dizayner, qalereya sahibi və pedaqoq, beynəlxalq incəsənətin müasir və tanınan nümayəndəsi, azərbaycanlı rəssam Aydan Salahovanın “Qadın” rəsm əsərini “Azərxalça” ASC-nin yaradıcı qrupu xalça üzərinə köçürüb.
SİA AZƏRTAC-a istinadən xəbər verir ki, nəticədə iki ədəd 230:111, bir ədəd 230:170 ölçüsündə xalçalardan ibarət “Qadın” triptix xalça kolleksiyası ərsəyə gəlib. Kolleksiya limitlidir, ümumilikdə 10 xalça üçlüyündən ibarətdir. Kolleksiya 2 ay müddətində “Azərxalça” ASC-nin Nardaran emalatxanasında 8 toxucu tərəfindən ərsəyə gəlib.
Mərasimdə başda “Azərxalça” ASC- nin İdarə Heyətinin sədri, Əməkdar İncəsənət xadimi Emin Məmmədov olmaqla, Aydan Salahova, yaradıcı qrup, yerli incəsənət nümayəndələri, ictimai, siyasi xadimlər, media nümayəndələri və xarici qonaqlar iştirak ediblər.
Açılışda çıxış edən “Azərxalça” ASC- nin İdarə Heyətinin sədri Emin Məmmədov qeyd edib ki, milli-mənəvi sərvətlərimizin hər biri qorunmaqla yanaşı müasirliyə, müasir həyata uyğunlaşmağa çox münasibdir və xalçaçılıq sənəti də istisna deyil. E.Məmmədov bildirib ki, “Azərxalça” ASC xalçaçılıq üzərində daim müsbət reaksiyalara səbəb olan çalışmalar aparır və bu yolda istedadlı, müasir, Vətənini sevən hər bir yaradıcı insanın əməyindən istifadə edir, onlara öz ideyalarını həyata keçirməyə imkan yaradır. İdarə Heyətinin sədri diqqətə çatdırıb ki, Aydan Salahovanın “Qadın” əsərinin xalça üzərinə köçürülməsi də çox böyük marağa səbəb olub, bu səbəbdən istedadlı rəssam ilə ortaq işlərin davam edəcəyi də vurğulanıb. Onun sözlərinə görə, layihə üzərində iş bir il davam edib və rəssam toxucularla daim təmasda olub. Emin Məmmədov triptix xalçasının yaradılması prosesində iştirak edənlərin hamısına təşəkkürünü bildirib. "Milli ənənələrimizi qorumaqla yanaşı, müasir incəsənət yaradaraq və gənc rəssamlarla əməkdaşlıq edərək irəliləməyin vacibliyini dərk edirik", - deyə o əlavə edib.
Aydan Salahova öz növbəsində Azərbaycanı, onun gözəl mədəniyyəti və xalçaları çox sevdiyini vurğulayaraq, əsərdə qadınlarla bağlı istək və arzularını, ümid və gümanlarını çox detallı şəkildə göstərməyə çalışdığından söz açıb. “Xalça xaricindəki naxışlar sosial münasibətləri və gözləntiləri, daxilindəki boşluq isə insanın əsl mənliyini simvollaşdırır. Ornamentlərlə örtülmüş qadın fiquru xarici təsirlərin onu necə əhatə etdiyini nümayiş etdirir, lakin yalnız daxilində onun əsl mahiyyəti üçün yer var. Daxili boşluq insanın xarici təsirlərdən azad olan həqiqi mənliyini simvollaşdırır”, - deyə rəssam qeyd edib.
Sonda isə Aydan Salahova ona əsərini gözəl xalça formasında təqdim etməyə kömək etdikləri üçün “Azərxalça” ASC-nin yaradıcı qrupuna minnətdarlığını bildirib.
Daha sonra qonaqlar triptix xalça kolleksiyası ilə tanış oldular.
Qeyd edək ki, Azərbaycanın milli- mənəvi sərvəti olan xalçaçılıq sənətinin inkişafı, müasir dövrə, tələblərə uyğunlaşdırılması və müasir incəsənətin bir qoluna çevrilməsi yolunda “Azərxalça” ASC gənc, müasir, yerli və xarici incəsənət nümayəndələri ilə birgə əməkdaşlıq edir.
Bütün xəbərlər Facebook səhifəmizdə
USD
EUR
GBP
RUB