Bu gün kimi dindirsən, çox bilikli, savadlı, diribaş, cəsarətli şəxs olmasından söhbət açacaq. Deyəcək ki, yeri gəlsə əlinə külüng alıb Fərhad kimi dağları yarar, qayaları parçalayar. Həm də söyləyəcək ki, "kim mənim səmimiyyətimə inanmırsa, istənilən TV-də onunla debata çıxmağa, müzakirələr qurmağa, hətta güləşməyə hazıram". Bu yerdə xoruzun quyruğu görünür.
Məlum olur ki, məxluqun heç bir istedadı, talantı yoxdur, sadəcə, məqsəd və məramı hay-küyü vasitəsilə TV-lərə çıxmaqdır. O TV-lərə ki, lağ-lağı, dedi-qodu şəbəkəsinə çevrilib. Kim kimi söyüb təhqir etmək, hörmətdən-izzətdən salmaq istəyirsə TV-lərdə rol alıb, istəyini həyata keçirir. Qeyri-peşəkar aparıcı məxluqlar ailə dəyərlərindən, əxlaq norma və prinsiplərindən xəbərsiz olan zəif iradəli insanları verilişlərə çıxarıb, onları kukla kimi oynadır, ictimaiyyətin gözü önündə təhqir edib, gözdən salmağa çalışırlar. Bir aparıcı cəmiyyətin heysiyyətinə toxunan fikir söyləyir, deyir ki, "atasız qızı oğluma almaram".
Adama deyən lazımdır ki, sən özün kimsən axı? Azərbaycandan kənara çıxdığın zaman özünü normal aparmısanmı? Başqa bir kişi aparıcı qadın müğənniyə "a...z gəlib, səni boğaram", - deyə qadınlarsayağı əllərini yellədir. Birisi var, işi -gücü olan bir fağırı 4-5 aydır ki, gətirib verilişində "mənim hekayəm, mənim hekayəm" deyib oynadır. Qoymur biçarə gedib bir parça çörəyini qazansın. Bu cür biabırçılıqlar fonunda diqqətçəkən məqamlardan biri də ondan ibarətdir ki, TV-lər siyasi şərhçi, politoloq və bu kimi "istedadlar" da üzə çıxarıb, onları cəmiyyətə təqdim etməyə çalışırlar. Bu baxımdan, son vaxtlar "istedadlı" məxluqların sayı çoxalıb. "İstedadlı" məxluqlardan kimi dindirsən deyir ki, "mən politoloqam və növbəti parlament seçkilərində namizədliyimi irəli sürüb, deputat olacam".
Elələri də var ki, mətbuata yenicə çıxıb, amma "həmkarları"nı bəyənmir. Ancaq bu "say-seçmə politoloqlar" anlamırlar ki, ictimaiyyətin siyasi biliklərinin və intellektual bacarıqlarının artırılmasında politoloq müstəsna imkanlara malikdirlər. Politologiya siyasətin elmi tədqiqidir. Bir növ tədqiqatçıdır. Politoloqların proqnozları, təhlilləri cəmiyyətlərin inkişafına töhfə verməklə yanaşı, insanların maarifləndirilməsinə xidmət etməlidir. Analitiklərin gəldikləri qənaətə görə, siyasi elmdə bir neçə nəzəriyyə mövcuddur ki, onlardan da ən aktualı təsviri səviyyə, izahlı səviyyə, proqnozlaşdırıcı səviyyə və nəzəri səviyyədir. Özlərini cəmiyyətə politoloq kimi təqdim etməyə çalışanlar bu prinsipləri və qaydaları mənimsəmədən hadisələrə və proseslərin gedişi barədə təhlillərini və proqnozlarını irəli sürmələri yanlışdır.
Təəssüf ki, politoloq qismində özlərini təqdim edənlər ağına-bozuna baxmadan hadisələrin gedişi haqqında cəfəng, heç bir informasiya yükü olmayan fikirlər səsləndirirlər. Bəzən şərhlər verərkən elə ifadələr seçirlər ki, adamın ayağından yer qaçır. Nədi-nədi TV-lərdə dostu, tanışı çalışır, saytlara çıxış imkanları var. Belə demək mümkünsə politogiya sahəsində at izi, it izinə qarışıb, hərə ağlına və ağzına gələni danışır. Dediklərinin fərqinə varan, məsuliyyətini anlayan da yoxdur. Dərk etmirlər ki, açıqladıqları yanlış fikir cəmiyyətdə çaşqınlıq yarada bilər. O gün internet TV-lərin birinə açıqlama verən əndərəbadi bir politoloq deyir ki, regionda yeni müharibənin baş verəcəyi gözlənilir. Başqa birisi isə iddia edir ki, Tramp Rusiyanın agentidir və ifşa oluna biləcəyindən qorxduğu üçün Ukrayna prezidenti Zelenskini sülh danışıqlarına getməyə məcbur edir. Deyən və başa salan lazımdır ki, haradan bilirsən? Bəlkə Mişel Nostradamısın ruhu bədəninə girib öncəgörən olmusan? Hər şeyin sərhədi olduğu kimi, xəbərin verilməsində və proqnozların irəli sürülməsində də sərhəd olmalıdır. Əks təqdirdə cəmiyyətdə ziddiyyətli fikir formalaşar ki, bundan da məkrli xarici qüvvələr əleyhimizə istifadə edə bilərlər.
İLHAM ƏLİYEV
Bütün xəbərlər Facebook səhifəmizdə
.jpg)
USD
EUR
GBP
RUB