"Ərazilərin minalardan təmizlənməsi məsələsi təkcə humanitar problem deyil, eyni zamanda milli təhlükəsizlik və dövlət quruculuğu məsələsidir. Azərbaycan post-münaqişə mərhələsində qarşısında duran ən ciddi çağırışlardan biri geniş ərazilərin mina və partlamamış hərbi sursatlardan təmizlənməsidir".
Bu sözləri SİA-ya açıqlamasında hərbi ekspert Ramil Məmmədli deyib.
Onun sözlərinə görə, bu problem həm insan təhlükəsizliyinə birbaşa təhdid yaradır, həm də sosial-iqtisadi bərpa prosesini ləngidir: "Minalar ilk növbədə mülki əhalinin həyat və sağlamlığı üçün təhlükə mənbəyidir. Böyük Qayıdış proqramının həyata keçirilməsi, keçmiş məcburi köçkünlərin doğma torpaqlarına qayıtması məhz təhlükəsiz mühitin formalaşdırılmasından asılıdır. Əgər torpaqlar tam şəkildə təmizlənməzsə, infrastruktur layihələrinin icrası, kənd təsərrüfatının bərpası, yaşayış məntəqələrinin yenidən qurulması mümkün olmaz. Bu baxımdan mina təmizləmə prosesi iqtisadi dirçəlişin ilkin və fundamental mərhələsidir. Digər tərəfdən, bu məsələ beynəlxalq hüquq və humanitar hüquq kontekstində də xüsusi əhəmiyyət daşıyır. Azərbaycan mina xəritələrinin tam və dəqiq təqdim edilməməsini ciddi problem kimi qiymətləndirir və bu mövzunu beynəlxalq platformalarda gündəmə gətirir. Mina təhlükəsi faktiki olaraq münaqişənin nəticələrinin davam etməsi deməkdir və regionda dayanıqlı sülhün formalaşmasına maneə yaradır. Bu sahədə fəaliyyət göstərən əsas dövlət qurumu Azərbaycan Respublikasının Minatəmizləmə Agentliyi (ANAMA) genişmiqyaslı əməliyyatlar həyata keçirir. Bununla yanaşı, bir sıra beynəlxalq təşkilatlar və tərəfdaş ölkələr texniki və maliyyə dəstəyi göstərirlər. Mina təmizləmə prosesi həm də Azərbaycanın beynəlxalq əməkdaşlıq imkanlarını genişləndirir və post-münaqişə bərpa modelini dünya üçün nümunəyə çevirmək potensialına malikdir.
Geosiyasi baxımdan isə ərazilərin minalardan təmizlənməsi Cənubi Qafqazda kommunikasiyaların açılması, nəqliyyat dəhlizlərinin bərpası və regional inteqrasiyanın gücləndirilməsi üçün əsas şərtdir. Təhlükəsiz mühit olmadan nə investisiya axını, nə də uzunmüddətli iqtisadi layihələrin reallaşması mümkündür. Bu baxımdan mina problemi həm təhlükəsizlik, həm iqtisadiyyat, həm də diplomatiya məsələsidir. Nəticə olaraq qeyd etmək olar ki, minalardan təmizləmə prosesi Azərbaycanın suverenliyinin real təminatı, Böyük Qayıdışın əsas şərti və regionda davamlı sülhün formalaşması üçün strateji əhəmiyyət daşıyır. Bu proses nə qədər sürətli və sistemli aparılarsa, post-münaqişə dövrünün sabitliyi bir o qədər möhkəm olacaq".
Bütün xəbərlər Facebook səhifəmizdə
.jpg "Makron Avropanı satdı - XƏYANƏT")
.jpg "ABŞ-dan İrana kritik danışıq təklifi - SON DƏQİQƏ")
.jpg "Rus əsgərləri Qovulu! - Nə Baş Verir?")
.jpg)
USD
EUR
GBP
RUB