“Ailədaxili problemlərin yaranmasına təsir edən amillər müxtəlifdir və bu prosesdə psixoloji, sosial və davranış faktorları mühüm rol oynayır. Mütəxəssislərin fikrincə, xarakter fərqləri, ünsiyyət çatışmazlığı, emosional gərginlik, qarşılıqlı anlaşmanın zəifləməsi, eləcə də ailə münasibətlərinə üçüncü şəxslərin müdaxiləsi konfliktlərin yaranmasına səbəb olan əsas amillərdəndir”.
Bu sözləri SİA -ya açıqlamasında psixoloq Gülər Məmmədova bildirib.
Onun sözlərinə görə, bundan başqa, məsuliyyət bölgüsündə yaranan narazılıqlar, maddi problemlər, qarşılıqlı gözləntilərin üst-üstə düşməməsi və ailə üzvlərinin çətin vəziyyətlərdə ortaq həll yolu tapa bilməməsi də münasibətlərdə gərginlik yaradır:
”Bəzi hallarda isə tərəflərdən birinin ailə öhdəliklərindən yayınmaq istəyi və ya fərdi maraqlarını ön plana çıxarması münasibətlərə mənfi təsir göstərir.
Psixologiyada ailədaxili konfliktlər təbii hadisə hesab olunur. Mütəxəssislər konfliktləri əsasən iki qrupa ayırırlar: konstruktiv (qurucu) və destruktiv (dağıdıcı) konfliktlər. Qurucu konfliktlər problemlərin müzakirə olunmasına, tərəflərin bir-birini daha yaxşı anlamasına və münasibətlərin möhkəmlənməsinə kömək edir. Dağıdıcı konfliktlər isə qarşılıqlı hörmətin azalmasına, emosional uzaqlaşmaya və ailə münasibətlərinin zəifləməsinə səbəb olur.
Ailə həyatında fikir ayrılıqlarının olması normaldır. Fərqli düşüncə tərzinə, həyat təcrübəsinə və xarakter xüsusiyyətlərinə malik insanların eyni mühitdə yaşaması müəyyən anlaşılmazlıqlar yarada bilər. Lakin sağlam ünsiyyət və qarşılıqlı hörmət sayəsində bu fərqlər münasibətlərin inkişafına da müsbət təsir göstərə bilər. Zaman keçdikcə tərəflər bir-birinin hisslərini, ehtiyaclarını və gözləntilərini daha yaxşı anlayır, bu isə münasibətlərin daha sağlam təməllər üzərində qurulmasına şərait yaradır.
Ailədaxili problemlərin həllində peşəkar psixoloji dəstəyin rolu böyükdür. Psixoloq tərəflərə emosiyalarını düzgün ifadə etməyə, problemlərin mənbəyini müəyyənləşdirməyə və daha effektiv ünsiyyət qurmağa kömək edə bilər. Buna görə də psixoloqa müraciət etmək zəiflik deyil, ailə münasibətlərini qorumağa yönəlmiş məsuliyyətli və yetkin addım kimi qiymətləndirilməlidir.
Bununla belə, bəzi hallarda münasibətlərdə davamlı zorakılıq, ciddi asılılıq problemləri və ya təhlükəli davranışlar mövcud ola bilər. Belə vəziyyətlərdə ailə mühitinin sağlam şəkildə davam etdirilməsi çətinləşir və tərəflərin, xüsusilə uşaqların rifahı prioritet məsələ kimi nəzərə alınmalıdır.
Mütəxəssislər hesab edirlər ki, ailə münasibətlərinin davamlı olması üçün emosional yetkinlik, qarşılıqlı anlayış, məsuliyyət hissi və problemlərə rasional yanaşmaq bacarığı vacibdir. Ailələr arasında fərqlərin əsas səbəbi də məhz tərəflərin şəxsiyyət xüsusiyyətləri, həyat təcrübələri və konfliktləri idarəetmə bacarıqları ilə bağlıdır”.
Bütün xəbərlər Facebook səhifəmizdə
USD
EUR
GBP
RUB