Bu gün, noyabrın 6-da Azərbaycanda televiziya və radio sahəsində çalışanların peşə bayramı – Azərbaycan Televiziyası və Radiosu Günü qeyd olunur. Bu tarix ölkənin media tarixində mühüm yer tutur. 2026-cı ildə Azərbaycan radiosunun yaranmasından 100, milli televiziyanın fəaliyyətə başlamasından isə 70 il ötür.
Azərbaycan radiosunun əsası 1926-cı il noyabrın 6-da qoyulub. Həmin gün Bakı şəhərində radiostansiyanın fəaliyyətə başlaması ilə ölkədə ilk radio verilişi yayımlanıb. Paytaxtın küçə və meydanlarında quraşdırılan reproduktorlardan səslənən “Danışır Bakı!” ifadəsi Azərbaycan media tarixində yeni mərhələnin başlanğıcı olub.
İlk illərdə radio yayımı məhdud texniki imkanlarla həyata keçirilsə də, zaman keçdikcə onun əhatə dairəsi genişlənib. Radio əhalinin operativ məlumatlandırılması, maarifləndirilməsi, milli musiqi və mədəniyyət nümunələrinin təbliği baxımından mühüm informasiya vasitəsinə çevrilib.
Azərbaycan televiziyasının tarixi isə 1956-cı il fevralın 14-dən başlayır. Həmin gün Bakı Televiziya Studiyası ilk dəfə efirə çıxıb. İlk televiziya yayımında tamaşaçılar görkəmli aktrisa Nəcibə Məlikovanı ekranda görüblər. O, çıxışına “Göstərir Bakı!” sözləri ilə başlayıb. Həmin gün televiziya vasitəsilə “Bəxtiyar” bədii filmi də nümayiş etdirilib.
Sonrakı illərdə televiziya yayımının texniki imkanları genişləndirilib, regionlarda televiziya stansiyaları yaradılıb. 1967-ci ildən Azərbaycanda rəngli televiziya yayımına keçid prosesi başlayıb. Bu yeniliklər televiziya sahəsinin inkişafında mühüm mərhələlərdən biri olub.
Ötən onilliklər ərzində Azərbaycan televiziya və radiosu cəmiyyətin məlumatlandırılmasında, ictimai fikrin formalaşmasında, milli-mənəvi dəyərlərin qorunmasında və təbliğində mühüm rol oynayıb. Tarixi hadisələrin, ictimai-siyasi proseslərin, mədəniyyət və incəsənət nümunələrinin geniş auditoriyaya çatdırılmasında bu sahənin xüsusi yeri olub.
Müasir dövrdə informasiya texnologiyalarının inkişafı televiziya və radio sahəsində də yeni imkanlar yaradıb. Rəqəmsal yayım, internet platformaları, onlayn radio və televiziya xidmətləri ənənəvi medianın fəaliyyət istiqamətlərini genişləndirib. Bununla yanaşı, operativlik, obyektivlik, dəqiqlik və peşəkarlıq jurnalist fəaliyyətinin əsas prinsipləri olaraq qalır.
Bu gün Azərbaycan Televiziyası və Radiosu Günü təkcə tarixi bir hadisənin ildönümü deyil, həm də cəmiyyətin informasiya təminatında, milli kimliyin və mədəni irsin qorunmasında əməyi olan media nümayəndələrinin fəaliyyətinə verilən dəyərin ifadəsidir.
Qeyd edək ki, noyabrın 6-sı hər il televiziya və radio işçilərinin peşə bayramı kimi qeyd olunur. Bu il isə Azərbaycan radiosunun 100, televiziyasının 70 illik yubileyi münasibətilə tariximizdə xüsusi əhəmiyyət daşıyır.
Bütün xəbərlər Facebook səhifəmizdə
.jpg)
USD
EUR
GBP
RUB
