“Mütəmadi nəzarətin aparılması gözəllik salonlarında təhlükəsiz xidmətin təminatıdır” -HƏKİM DANIŞDI
”Gözəllik salonlarında gigiyena və sterilizasiya qaydalarına riayət olunması müştərilərin sağlamlığının qorunması baxımından böyük əhəmiyyət daşıyır. Xüsusilə manikür, pedikür, qaş korreksiyası, tatuaj və dəri ilə birbaşa təmasda olan digər prosedurlar zamanı istifadə olunan alətlərin düzgün dezinfeksiya və sterilizasiya edilməməsi müxtəlif infeksiyaların yayılmasına səbəb ola bilər”.
Bu sözləri SİA -ya açıqlamasında həkim, terapevt Fidan Həsənli bildirib.
Onun sözlərinə görə, son illərdə bir çox gözəllik salonlarında gigiyena standartlarına diqqət artırılıb:
”İstifadə olunan alətlərin sterilizasiyası, birdəfəlik materiallardan istifadə və iş yerlərinin təmiz saxlanılması bu sahədə müsbət irəliləyişlər kimi qiymətləndirilir. Bununla belə, bəzi hallarda sterilizasiya qaydalarına tam əməl olunmaması infeksiya riskini artırır.
Xüsusilə qanla təmas ehtimalı olan prosedurlar zamanı hepatit B, hepatit C və digər yoluxucu xəstəliklərin ötürülmə riski nəzərə alınmalıdır. Bu səbəbdən həm xidmət göstərən personal, həm də müştərilər gigiyena qaydalarına ciddi yanaşmalıdırlar. Müştərilər istifadə olunan alətlərin steril olub-olmamasına diqqət yetirməli, salonlar isə sanitariya-gigiyena normalarına uyğun fəaliyyət göstərməlidirlər.
Mənim fikrimcə, gözəllik salonlarında mütəmadi nəzarətin aparılması, əməkdaşların maarifləndirilməsi və gigiyena qaydalarına ciddi əməl olunması infeksiyaların qarşısının alınmasında mühüm rol oynayır. Bu sahədə təhlükəsizlik tədbirlərinin gücləndirilməsi həm müştərilərin sağlamlığını qoruyur, həm də göstərilən xidmətlərin keyfiyyətini artırır.
Gözəllik salonlarında gigiyena və sterilizasiya qaydalarına riayət olunması yalnız estetik xidmətlərin deyil, həm də ictimai sağlamlığın vacib tərkib hissəsidir. Bu qaydalara əməl edilməsi infeksiya riskinin azalmasına və daha təhlükəsiz xidmət mühitinin formalaşmasına kömək edir”.
Bütün xəbərlər Facebook səhifəmizdə
USD
EUR
GBP
RUB