Qardaşa qardaş məsləhəti...

Azərbaycanın hicablı uşaqların məktəbə getməsini qadağan etmək qərarı Bakı ilə Ankara arasında gərginliyə səbəb olub. Türkiyə geyim qaydalarına etiraz edənləri dəstəkləyib və qardaş ölkənin qadınların geyim azadlığına icazə verməyə çağırıb. Azərbaycan hakimiyyəti isə Türkiyədəki bəzi "qardaşlara" öz işləri ilə məşğul olmağı məsləhət görüb.

"Azərbaycanda hicablı qız şagirdlərin təhsil hüququnu məhdudlaşdırmaq qəbuledilməzdir! Dini səbəblərə görə başını örtən şagirdi məktəbin qapısında qoymaq vicdan və ədalətə necə uyğun ola bilər? Hicab maneə deyil, iman tələbidir! Təhsil hüququ heç bir ideoloji məcburiyyətə məruz qalmamalıdır! Biz Azərbaycanın bu yanlış siyasətdən ən qısa zamanda imtina etməsini gözləyirik. Gənclərin gələcəyə gedən yolunu bağlamamalı, əksinə, onlar üçün yeni imkanlar açmalıyıq. Bizim dövrümüzdə belə bir yanaşma qəbuledilməzdir!" - deyə Türkiyə Prezidentinin Baş müşaviri Oktay Saral bildirib.

Öz növbəsində, Türkiyə müxalifət lideri Kamal Kılıçdaroğlu "azərbaycanlı qardaş və bacıları" qadınları başını örtənlərə və örtməyənlərə bölməməyə çağırıb. "Mən Azərbaycana müraciət edirəm: qadınları azad buraxın, hər kəs özü üçün nə geyinəcəyini seçsin", - deyə o bildirib.

Cavab olaraq İlham Əliyevin cədri olduğu Yeni Azərbaycan Partiyası bəyanatında bildirib ki, türklərin və azərbaycanlıların iki dövlətdə yaşayan bir xalq olması fikri unudulmamalıdır. Biz məhz bir xalq və iki müstəqil dövlətdən danışırıq. Bu prinsip heç bir şəkildə bir dövlətə digərinin daxili işlərinə qarışmaq və ya öz siyasi və ideoloji yanaşmalarını onlara tətbiq etmək hüququ vermir... İslam dünyasında heç bir dövlətin öz iradəsini digər müsəlman xalqlarına diktə etmək, onların daxili işlərinə qarışmaq və ya özünü başqalarından üstün hesab etmək hüququ yoxdur. Təşkilatın mətbuat xidməti bildirib ki, Müsəlman dünyasının birliyinə xidmət etmək istəyi hegemonluq istəkləri ilə deyil, bərabər əməkdaşlıq və qarşılıqlı hörmətlə dəstəklənməlidir.

Bundan əlavə, Azərbaycan parlamentinin Azərbaycan və Türkiyə arasında parlamentlərarası əlaqələr üzrə işçi qrupu Türkiyə mediasını Bakıya qarşı "qərəzli informasiya kampaniyası" aparmaqda ittiham edib. "Azərbaycan və Türkiyə dostluq, qardaşlıq və strateji müttəfiqlik münasibətləri saxlayırlar. Azərbaycan müstəqil və suveren dövlətdir və daxili və xarici siyasətini milli maraqlarına və Konstitusiyasına uyğun olaraq müəyyən edir. Ümummilli Lider Heydər Əliyev tərəfindən formalaşdırılmış "bir millət, iki dövlət" prinsipi məhz iki müstəqil və suveren dövlətin mövcudluğunu nəzərdə tutur. Bu prinsipin mahiyyətini təhrif etmək, ondan Azərbaycanın daxili işlərinə müdaxilə üçün əsas kimi istifadə etmək və xarici siyasi və ideoloji yanaşmaları Azərbaycan cəmiyyətinə qəbul etdirmək qəbuledilməzdir", - deyə parlament üzvləri vurğulayıblar.

Atlas Siyasi Araşdırmalar Mərkəzinin rəhbəri Elxan Şahinoğlu hesab edir ki, bəzi türk siyasətçilərinin Azərbaycan hökumətinin məktəblərdə hicabı qadağan etmək qərarını tənqid etməsinin bir neçə səbəbi var. “Birincisi, hicab geyinmiş və məktəbə getməyə qadağa qoyulmuş qızların şəkillərinin internetdə geniş yayılması Türkiyə cəmiyyətinin bəzi sektorlarında etirazlara səbəb oldu və türk siyasətçiləri buna cavab vermək qərarına gəldilər. İkincisi, Türkiyədəki siyasətçilər və partiya liderləri açıqlamalar verərkən qarşıdan gələn prezident və parlament seçkilərində nə qədər əlavə səs qazanacaqlarını düşünürlər. Onlar Azərbaycan məktəblərində hicab geyinməyə qoyulan qadağanı tənqid etməyin daha çox səs toplayacağına inanırlar. Lakin bu açıqlamalar Azərbaycan və Türkiyə arasındakı strateji ittifaqa xələl gətirir”, - deyə Şahinoğlu verdiyi müsahibədə qeyd edib.

Onun sözlərinə görə, Türkiyədəki bir qrup siyasətçi və ekspert Azərbaycanın hicab qadağasını tənqid etməklə, mahiyyət etibarilə İrandakı anti-Azərbaycan qüvvələri ilə eyni mövqedən çıxış edir və etirazlar üçün şərait yaradırlar. Lakin Beynəlxalq Münasibətlər və Multikulturalizm Təhlili Mərkəzinin sədr müavini Fərhad Məmmədov hesab edir ki, Bakı ilə Ankara arasındakı münasibətlərdə heç bir fəlakət yoxdur. Onun sözlərinə görə, 1990-cı illərin sonlarında Türkiyə hicabı qadağan etdi və bu, bir çox türk üçün həssas məsələ olaraq qalır, ona görə də onlara izah edilməlidir ki, Azərbaycanda oxşar bir şey yoxdur.

"Əvvəla, hicab vəziyyəti ilə bağlı şərh verməyən Türkiyə hakimiyyəti idi. Türkiyə Prezidenti Rəcəb Tayyib Ərdoğanın müşaviri və Türkiyə parlamentinin bir neçə üzvü açıqlamalar verdi. Azərbaycanlı deputatlar cavab verdilər. Əlbəttə ki, hazırda gərginlik var və üçüncü ölkələr bundan istifadə etməyə çalışırlar, amma ümumilikdə Bakı ilə Ankara arasında münasibətlər yaxşı olaraq qalır. Eyni zamanda, Türkiyə nümayəndələrinə izah edilməlidir ki, bu, hicaba qadağa qoymaq deyil, məktəb geyim qaydalarının tətbiqi məsələsidir", - deyə Məmmədov vurğulayıb.

V.VƏLİLİ