Ay ərzində dövlət sərhədini pozduqları üçün 35 halda 49 nəfər saxlanılıb, onların 18 nəfəri Azərbaycan, 10 nəfəri Özbəkistan, 9 nəfəri İran İslam Respublikası, 5 nəfəri Gürcüstan, 2 nəfəri Qırğızıstan, hər ölkədən 1 nəfər olmaqla Rusiya, Qazaxıstan, Türkmənistan, Moldova və Tacikistan vətəndaşı olub. Dövlət Sərhəd xidmətinin mətbuat mərkəzindən SİA-ya verilən məlumata görə, sərhəd rejim qaydalarını pozarkən yaşıl sərhəddə 8 halda 14 nəfər, Xəzər dənizində 34 halda 48 nəfər saxlanılaraq barələrində müvafiq tədbir görülüb.
Cinayətkarlığa qarşı mübarizə tədbirləri nəticəsində Azərbaycanın hüquq-mühafizə orqanları tərəfindən axtarışda olan 160 nəfər aşkarlanaraq aidiyyəti orqanlara təhvil verilib.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 11 halda 6 kiloqram 728 qram narkotik maddənin dövlət sərhədindən keçirilməsinin qarşısı alınıb. Aprelin 12-də Cəlilabad rayonunun Zəhmətabad kəndi ərazisində yerləşən sərhəd zastavasının xidməti sahəsində İran İslam Respublikasından Azərbaycana dövlət sərhədini pozmağa cəhd edən 2 nəfər naməlum şəxsin qarşısı alınıb, sərhəd pozucuları sərhəd naryadının qanuni tələblərinə tabe olmayaraq odlu silahdan atəş açıb, sərhəd naryadının cavab atəşindən sonra özləri ilə gətirdikləri 1 kiloqram heroini əraziyə ataraq geri qaçıblar.
İrandan Azərbaycana keçmiş şəxslər yoxlanılarkən "Biləsuvar" sərhəd nəzarət məntəqəsində 6 halda 821 qram, "Astara" sərhəd nəzarət məntəqəsində 3 halda 4 kiloqram 890,2 qram narkotik maddə aşkar olunaraq götürülüb.
Qaçaqmalçılıq fəaliyyətinə qarşı mübarizə çərçivəsində həyata keçirilən tədbirlər nəticəsində 74 halda ümumi dəyəri təqribən 594 min manat olan qaçaqmal, o cümlədən 6990 dollar ABŞ valyutası, 126.800 rial İİR valyutası, 923 ədəd müxtəlif markalı mobil telefon, 2881 ədəd mobil telefon aksesuarları, 4 ədəd tapança, 1 ədəd süngü bıçaq, 6 ədəd radiostansiya, 4 ədəd gizli izləmək üçün elektron vasitə, 5 ədəd planşet, 846 ədəd göz linzası, 2 ədəd motosikl, 8110 ədəd müxtəlif markalı siqaret, balıq tutmaq üçün 5400 metr tor, 11 ədəd qayıq, 2 ədəd qayıq mühərriki, müxtəlif növ dərman preparatları, spirtli içki, sənaye və kənd təsərrüfatı malları saxlanılıb.
Bütün xəbərlər Facebook səhifəmizdə
USD
EUR
GBP
RUB