“27 sentyabr – Anım Günü Azərbaycanın müasir tarixində xüsusi yeri olan, xalqımızın taleyində mühüm dönüş mərhələsini ifadə edən tarixi gündür. Məhz 2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün və tarixi ədalətin bərpasına aparan Zəfər yolunun başlanğıcını qoydu”.
“Milli Məclisin 2026-cı il payız sessiyasının sentyabrın 30-da keçirilən ilk plenar iclasında 27 Sentyabr – Anım Günü ilə əlaqədar Milli Məclisin Bəyanatı qəbul edilib. Sənəddə 27 Sentyabr – Anım Gününün xalqın tarixi yaddaşında xüsusi yer tutduğu, milli birlik və həmrəyliyin rəmzi olduğu vurğulanıb. Bildirilib ki, bu tarix Azərbaycanın ərazi bütövlüyünün və suverenliyinin bərpasına gətirib çıxaran Zəfər yürüşünün başlanğıcı kimi mühüm əhəmiyyət daşıyır. Milli Məclis Vətən müharibəsi şəhidlərinin əziz xatirəsinə dərin ehtiramını ifadə edib, döyüşlərdə iştirak edən hərbçilərin fədakarlığını yüksək qiymətləndirib. Bəyanat səsverməyə çıxarılaraq qəbul edilib”
Bu sözləri SİA-ya açıqlamasında Milli Məclisin Aqrar siyasət komitəsinin sədri Tahir Rzayev bildirib.
Onun sözlərinə görə, bu tarix həm şəhidlərin əziz xatirəsinin ehtiramla yad edilməsi, həm də Azərbaycan xalqının milli iradəsinin, həmrəyliyinin və dövlətçilik əzminin təcəssümü baxımından mühüm əhəmiyyət daşıyır.
T.Rzayev qeyd edib ki, Azərbaycan uzun illər ərzində Ermənistanın işğalı altında qalan torpaqlarının sülh yolu ilə azad edilməsinə çalışıb. Onun sözlərinə görə, Azərbaycan Prezidenti, Ali Baş Komandan İlham Əliyev dəfələrlə bəyan edib ki, ölkəmiz müharibə istəmir, insanların həyatını itirməsinə və yaşayış məntəqələrinin dağıdılmasına tərəfdar deyil:
“Azərbaycanın mövqeyi beynəlxalq hüququn norma və prinsiplərinə əsaslanan sülh yolu ilə ərazi bütövlüyünün bərpasından ibarət olub. Lakin uzun illər davam edən danışıqlar prosesinin nəticəsiz qalması, işğal faktının aradan qaldırılmaması və Ermənistanın hərbi-siyasi təxribatları vəziyyəti daha da gərginləşdirirdi. 2020-ci ilin sentyabrında Ermənistan silahlı qüvvələrinin Azərbaycanın yaşayış məntəqələrinə və mövqelərinə genişmiqyaslı hücumu qarşısında Azərbaycan Ordusu əks-həmlə tədbirlərinə başladı. Beləliklə, 27 sentyabr tarixində başlayan Vətən müharibəsi Azərbaycan xalqının öz torpaqlarını müdafiə etmək və işğala son qoymaq iradəsinin real ifadəsinə çevrildi”.
Komitə sədri bildirib ki, 27 Sentyabr Zəfərini yalnız 44 günlük müharibənin nəticəsi kimi qiymətləndirmək hadisələrin mahiyyətini tam əhatə etmir.
“Çünki 2020-ci ilə qədərki dövrdə Azərbaycanın hərbi potensialının gücləndirilməsi, iqtisadi imkanların artırılması və müdafiə sənayesinin inkişaf etdirilməsi məqsədyönlü şəkildə davam etdirilmişdi. 2016-cı ilin Aprel döyüşləri və 2018-ci ildə Naxçıvan istiqamətində keçirilən hərbi əməliyyat Azərbaycan Ordusunun döyüş imkanlarının və yeni taktiki yanaşmalarının sınaq mərhələlərindən biri kimi yadda qaldı. 2020-ci il müharibəsində isə bu təcrübə daha müasir silah sistemləri, pilotsuz uçuş aparatları və yeni döyüş taktikaları ilə tamamlandı. Azərbaycan müharibə ərəfəsində daha müxtəlif və müasir raket, artilleriya və pilotsuz uçuş vasitələrinə malik idi və uzunmüddətli iqtisadi imkanlar bu hərbi modernləşmənin maliyyələşdirilməsinə şərait yaratmışdı. Bu baxımdan 27 sentyabrda başlayan proses təkcə döyüş meydanındakı hadisə deyil, uzun müddət ərzində formalaşan hərbi-strateji hazırlığın da nəticəsi kimi nəzərdən keçirilə bilər”, - deyə T.Rzayev vurğulayıb.
Onun sözlərinə görə, 44 gün davam edən müharibə Azərbaycan tarixində yeni mərhələnin əsasını qoyub.
“Azərbaycan Ordusunun hərbi əməliyyatlar zamanı nümayiş etdirdiyi peşəkarlıq, döyüş qabiliyyəti və qəhrəmanlıq nəticəsində ərazilərimizin böyük hissəsi işğaldan azad edildi. 10 noyabr 2020-ci il tarixli üçtərəfli bəyanatla hərbi əməliyyatların dayandırılması və digər rayonların Azərbaycana qaytarılması təmin olundu. Bununla da Azərbaycan xalqının uzun illər gözlədiyi tarixi Zəfərin əsas nəticələri rəsmiləşdirildi”,- deyə komitə sədri qeyd edib.
T.Rzayev vurğulayıb ki, bu Zəfərin əldə olunmasında Azərbaycan Prezidenti, Ali Baş Komandan İlham Əliyevin rəhbərliyi və siyasi iradəsi, Azərbaycan Ordusunun yüksək döyüş hazırlığı və qəhrəmanlığı, xalqımızın milli həmrəyliyi mühüm rol oynayıb. Bu Qələbənin ən ağır və müqəddəs səhifəsini isə Vətən uğrunda canından keçən şəhidlərimizin fədakarlığı təşkil edib.
“Minlərlə Azərbaycan vətəndaşı Vətən uğrunda canından keçərək şəhidlik zirvəsinə ucaldı. Buna görə də 27 Sentyabr ilk növbədə şəhidlərimizin xatirəsinin ehtiramla yad edildiyi gündür. Onların həyatını Vətənə həsr etməsi Azərbaycanın ərazi bütövlüyünün bərpası tarixinin ayrılmaz hissəsidir”, - deyə o əlavə edib.
Komitə sədrinin sözlərinə görə, Azərbaycanın müharibədən sonrakı siyasəti hərbi Zəfərin nəticələrinin möhkəmləndirilməsi, regionda dayanıqlı sülhün və təhlükəsizliyin təmin edilməsi, işğaldan azad olunmuş ərazilərin bərpası və keçmiş məcburi köçkünlərin öz doğma yurdlarına qayıdışının təmin olunması istiqamətində davam etdirilib.
T.Rzayev bildirib ki, 2023-cü ilin sentyabrında həyata keçirilmiş lokal xarakterli antiterror tədbirləri nəticəsində Azərbaycanın suverenliyinin ölkənin bütün ərazisində tam bərpası təmin edilib.
“Bu hadisə Azərbaycanın dövlət suverenliyinin və ərazi bütövlüyünün bərpası prosesinin məntiqi davamı oldu”, - deyə o qeyd edib.
Millət vəkili diqqətə çatdırıb ki, bu gün 27 Sentyabrın tarixi əhəmiyyəti yalnız 2020-ci ildə qazanılan hərbi Qələbə ilə məhdudlaşmır.
“Bu tarix, eyni zamanda, Prezident İlham Əliyevin uzaqgörən və ardıcıl siyasəti nəticəsində Azərbaycanın qarşısında açılan yeni inkişaf mərhələsinin başlanğıcı kimi xarakterizə olunur. Dövlət başçısının Zəfərdən dərhal sonra Qarabağ və Şərqi Zəngəzurun bərpasını əsas prioritetlərdən biri kimi müəyyənləşdirməsi hərbi Qələbənin dayanıqlı sülhə, sosial rifaha və iqtisadi inkişafa çevrilməsinə hesablanmış strateji yanaşmanın göstəricisidir. Bu gün həmin siyasətin nəticəsi olaraq işğaldan azad edilmiş ərazilərdə genişmiqyaslı quruculuq işləri həyata keçirilir, dağıdılmış şəhər və kəndlər yenidən qurulur, insanların doğma yurdlarına qayıdışı təmin edilir”.
Onun sözlərinə görə, Qarabağ və Şərqi Zəngəzurun bərpası Prezident İlham Əliyevin rəhbərliyi ilə həyata keçirilən uzunmüddətli dövlət siyasətinin praktiki nəticəsi kimi çıxış edir.
“Qısa müddət ərzində yaşayış məntəqələrinin salınması, məktəb, xəstəxana və digər sosial obyektlərin inşası, avtomobil və dəmir yollarının çəkilməsi, hava limanlarının istifadəyə verilməsi, tunel və körpülərin tikilməsi bu ərazilərin müasir və dayanıqlı inkişaf modelinə inteqrasiyasını təmin edir. Burada əsas məqsəd yalnız dağıdılmış infrastrukturu bərpa etmək deyil, Qarabağ və Şərqi Zəngəzuru müasir, təhlükəsiz və iqtisadi baxımdan fəal regiona çevirməkdir. İnsanların öz ata-baba yurdlarına qayıdaraq yeni həyat qurması isə bu siyasətin ən mühüm humanitar nəticələrindən biridir”, - deyə T.Rzayev vurğulayıb.
O bildirib ki, ən mühüm nəticələrdən biri insanların doğma torpaqlarına qayıdışıdır.
“Uzun illər məcburi köçkün həyatı yaşayan Azərbaycan vətəndaşlarının öz ata-baba yurdlarına qayıtması, burada yeni evlərə köçməsi, təsərrüfat fəaliyyəti ilə məşğul olması və həyatını yenidən qurması Zəfərin humanitar mahiyyətini daha aydın göstərir”, - deyə komitə sədri qeyd edib.
T.Rzayevin sözlərinə görə, Qarabağ və Şərqi Zəngəzurun bərpası eyni zamanda Azərbaycanın iqtisadi imkanlarının və dövlət idarəçiliyinin qarşısında duran böyük layihələrin həyata keçirilməsi baxımından da əhəmiyyətlidir.
“Yeni yolların, hava limanlarının, enerji və kommunikasiya xətlərinin yaradılması bu ərazilərin ölkənin iqtisadi sisteminə daha sıx inteqrasiyasına şərait yaradır. Bununla yanaşı, Qarabağ və Şərqi Zəngəzurda beynəlxalq tədbirlərin keçirilməsi həmin ərazilərin Azərbaycanın ictimai, iqtisadi və diplomatik həyatında artan rolunu nümayiş etdirir”, - deyə o əlavə edib.
Komitə sədri qeyd edib ki, 27 Sentyabr Azərbaycan tarixində yalnız bir müharibənin başlanma tarixi deyil.
“Bu tarix milli iradənin, dövlətçilik əzminin və Vətən uğrunda fədakarlığın simvoluna çevrilib. 27 sentyabrdan başlayan proses Azərbaycan xalqının həm hərbi, həm siyasi, həm də iqtisadi potensialını nümayiş etdirən mühüm tarixi mərhələ oldu”.
Onun sözlərinə görə, bu gün həmin Zəfərin ən böyük nəticəsi Qarabağ və Şərqi Zəngəzurun yenidən dirçəldilməsi, insanların doğma yurdlarına qayıtması və bu ərazilərdə yeni həyatın formalaşdırılmasıdır.
“Bir vaxtlar işğalın ağır nəticələrinin müşahidə olunduğu torpaqlarda bu gün məktəblər, xəstəxanalar, yaşayış kompleksləri, yollar və digər müasir infrastruktur obyektləri yaradılır.
27 Sentyabrın mahiyyətində həm ağrı, həm qürur, həm də gələcəyə inam dayanır. Şəhidlərimizin xatirəsinə ehtiramla yanaşı, bu tarix Azərbaycan dövlətinin qarşısında açılan yeni imkanların başlanğıcını da ifadə edir. Zəfər yolu yalnız hərbi meydanda qazanılan Qələbə ilə tamamlanmadı; bu yol bu gün quruculuq, qayıdış, inkişaf və yeni həyat mərhələsi ilə davam edir.
Məhz buna görə 27 Sentyabr - Anım Günü Azərbaycan xalqının yaddaşında həm şəhidlərimizin müqəddəs xatirəsi, həm də milli iradənin və tarixi Zəfərin başlanğıcı kimi yaşayacaq”, - deyə Tahir Rzayev qeyd edib.
Bütün xəbərlər Facebook səhifəmizdə
USD
EUR
GBP
RUB