İnsan orqanizmi sağlamlıqda baş verən dəyişikliklər barədə müxtəlif siqnallar verir. Lakin gündəlik həyatın intensivliyi, iş yükü və stress səbəbindən bir çox insan bu siqnalları vaxtında qiymətləndirmir. Bu fikirləri SİA-ya açıqlamasında tibb üzrə fəlsəfə doktoru Abbas Bağırov bildirib.
Onun sözlərinə görə, əksər hallarda yorğunluq, halsızlıq, ağrılar və digər narahatlıqlar müvəqqəti hal kimi qəbul edilir, həkimə müraciət isə təxirə salınır: "Halbuki sadə görünən bəzi əlamətlər ciddi xəstəliklərin ilkin xəbərçisi ola bilər.
İnsanların ən çox laqeyd yanaşdıqları əlamətlərdən biri davamlı yorğunluq və halsızlıqdır. Çoxları bunu iş rejimi, yuxusuzluq və ya mövsümi dəyişikliklərlə əlaqələndirsə də, uzun müddət keçməyən yorğunluq qanazlığı, qalxanabənzər vəz xəstəlikləri, şəkərli diabet, ürək-damar problemləri və digər ciddi sağlamlıq pozuntularının göstəricisi ola bilər.
Diqqətdən kənarda qalan digər mühüm əlamətlərdən biri səbəbsiz çəki dəyişiklikləridir. Qidalanma və həyat tərzində ciddi dəyişiklik olmadan çəkinin sürətlə azalması və ya artması hormonal pozğunluqlar, maddələr mübadiləsi problemləri, eləcə də bəzi hallarda onkoloji xəstəliklərlə əlaqədar ola bilər.
Döş qəfəsində ağrı, ürəkdöyünmə və nəfəs darlığı da insanların çox vaxt ciddi qəbul etmədiyi şikayətlər sırasındadır. Xüsusilə fiziki fəaliyyət zamanı yaranan və ya təkrarlanan bu əlamətlər ürək-damar sistemi xəstəliklərinin ilkin xəbərdarlıq siqnalı ola bilər. Vaxtında müayinə olunmayan ürək problemləri gələcəkdə infarkt və ya insult kimi ağır nəticələrə səbəb ola bilər.
Baş ağrıları da əksər hallarda adi hal kimi qiymətləndirilir. Lakin tez-tez təkrarlanan, şiddəti artan və ya digər simptomlarla müşayiət olunan baş ağrıları yüksək arterial təzyiq, damar xəstəlikləri və sinir sistemi problemlərinin göstəricisi ola bilər.
Həzm sistemində baş verən dəyişikliklərə də tez-tez laqeyd yanaşılır. Uzun müddət davam edən qəbizlik, ishal, qarın ağrıları, iştahsızlıq və ya nəcisdə qan görünməsi mədə-bağırsaq sistemi xəstəliklərinin, hətta bəzi hallarda xərçəngin erkən əlaməti ola bilər. Bu səbəbdən belə halların həkim nəzarətində araşdırılması vacibdir.
Uzun sürən öskürək də diqqətdən kənarda qalmamalıdır. Bir neçə həftədən artıq davam edən öskürək tənəffüs yolları infeksiyaları, xroniki ağciyər xəstəlikləri və digər ciddi patologiyalarla əlaqəli ola bilər.
Sağlamlıqla bağlı bu və digər əlamətlərin vaxtında qiymətləndirilməməsi xəstəliklərin gec diaqnostika olunmasına gətirib çıxarır. Nəticədə müalicə prosesi çətinləşir, ağırlaşma riski artır və bəzi hallarda xəstənin həyat keyfiyyəti ciddi şəkildə pisləşir. Halbuki bir çox xəstəlik erkən mərhələdə aşkarlandıqda daha uğurla müalicə olunur və ağır fəsadların qarşısı alına bilir.
Mütəxəssislər hər bir insana orqanizmin verdiyi siqnallara diqqətlə yanaşmağı tövsiyə edirlər. Davamlı və ya təkrarlanan hər hansı narahatlıq hiss edildikdə özünü müalicə etməyə çalışmaq əvəzinə həkimə müraciət etmək, müntəzəm profilaktik müayinələrdən keçmək və sağlamlıq göstəricilərini nəzarətdə saxlamaq vacibdir.
Sağlamlıq insanın ən qiymətli sərvətidir. Bəzən kiçik görünən bir əlamətə vaxtında diqqət yetirmək böyük problemlərin qarşısını ala bilər. Buna görə də orqanizmin göndərdiyi xəbərdarlıq siqnallarına biganə qalmamaq hər kəs üçün mühüm əhəmiyyət daşıyır".
Lətifə Abdıyeva
Bütün xəbərlər Facebook səhifəmizdə
USD
EUR
GBP
RUB
