Elm və Təhsil Nazirliyi, Məktəbəqədər və Ümumi Təhsil üzrə Dövlət Agentliyi, Respublika Uşaq-Gənclər İnkişaf Mərkəzi və Azərbaycan Respublikası Minatəmizləmə Agentliyinin (ANAMA) birgə təşkilatçılığı ilə “Minasız Azərbaycan” – uşaqların yaradıcı gücü ilə mina təhlükəsizliyi” adlı tədbir çərçivəsində “Minasız Azərbaycan” yaradıcılıq müsabiqəsinin final mərhələsi keçirilib.
SİA yerli mənbələrə istinadən xəbər verir ki, 4 Aprel – Beynəlxalq Mina Xəbərdarlığı və Mina Təhlükəsi ilə Mübarizəyə Yardım Gününə həsr olunan tədbirin əsas məqsədi uşaqlara mina təhlükəsizliyi barədə biliklərin aşılanması, onların təhlükəsizlik anlayışının formalaşdırılması və bu istiqamətdə yaradıcı potensiallarının inkişaf etdirilməsi olub.
“Minasız Azərbaycan” yaradıcılıq müsabiqəsi rəsm, heykəltaraşlıq, video və süni intellekt vasitəsilə yaradılan qrafik dizayn nominasiyaları üzrə keçirilib. Müsabiqəyə məktəblilər tərəfindən təqdim olunan 100-dən çox rəsm, heykəltaraşlıq, süni intellekt ilə yaradılmış qrafik dizayn, mina təhlükəsi ilə bağlı maarifləndirici vizual materiallar, fotoşəkil və digər yaradıcılıq nümunələri və innovativ yanaşmalar təqdim edilib.
Tədbirin yekun hissəsində mina təhlükəsizliyi mövzusunda maarifləndirmə işlərinin yaradıcı yanaşma ilə aparılmasının əhəmiyyəti bir daha vurğulanıb. Müsabiqəyə təqdim olunan işlər arasından dörd nominasiya üzrə I, II, III yerlərin qalibləri seçilərək, diplom və mükafatlarla təltif ediliblər. Daha sonra qonaqlar və tədbirin iştirakçıları seçilmiş əsərlərdən ibarət sərgi ilə tanış olublar.
Həmçinin bu tədbir çərçivəsində Məktəbəqədər və Ümumi Təhsil üzrə Dövlət Agentliyi, Respublika Uşaq-Gənclər İnkişaf Mərkəzi və 1 nömrəli 18 yaşınadək əlilliyi müəyyən edilmiş şəxslər üçün sosial xidmət müəssisəsinin birgə təşkil etdiyi sərginin hazırlıq mərhələsində uşaqlar peşəkar müəllim və metodistlərin rəhbərliyi ilə mina təhlükəsizliyi mövzusunda öz rəsm əsərlərini yaradıblar. Bu fəaliyyət onların öz fikirlərini ifadə etməsinə, sosial inteqrasiyasına və yaradıcılıq qabiliyyətlərinin inkişafına töhfə verib.
Gələcəyimiz olan uşaqların təhlükəsiz və firavan mühitdə yaşamaları, mina təhlükəsinə dair biliklərinin formalaşdırılması və mütəmadi şəkildə maarifləndirilmə tədbirlərinə cəlb olunmaları mina təhlükəsi ilə mübarizə istiqamətində vacib amillərdən biridir.
Bütün xəbərlər Facebook səhifəmizdə
.jpg)
USD
EUR
GBP
RUB