Beynəlxalq Türk Mədəniyyəti Təşkilatına (TÜRKSOY) üzv ölkələrin Mədəniyyət Nazirlərinin Daimi Şurasının Bursa şəhərində martın 31-də başlayan fövqəladə iclası davam edir. İclasın ikinci hissəsində Şuşa şəhərinin 2023-cü ildə türk dünyasının mədəniyyət paytaxtı seçilməsi məsələsi müzakirə olunacaq.
SİA-nın əldə etdiyi məlumata görə, iclasın gündəliyində təşkilatın ötən dövrdəki fəaliyyətinə dair hesabatı dəyərləndirmək, təşkilati və cari məsələlərin müzakirəsi təsdiqlənib.
Türkiyenin mədəniyyət və turizm naziri Mehmet Nuri Ersoyun sədrliyi ilə keçirilən iclasın rəsmi açılışında Türk Dövlətləri Təşkilatının Baş katibi Bağdad Amreyev, Beynəlxalq Türk Mədəniyyəti Təşkilatının (TÜRKSOY) Baş katibi Düsen Kaseinov, Bursa valisi Yakup Canpolat, Bursa Böyükşəhər bələdiyyəsinin sədri Alinur Aktaş, Azərbaycan mədəniyyət naziri Anar Kərimov, Qırğızıstan mədəniyyət, məlumat, idman və gənclər siyasəti naziri Azamat Camanqulov, Qazaxıstan mədəniyyət və idman nazirinin müavini Nurkissa Dauyeshov, Özbəkistan mədəniyyət nazirinin müavini Muradcan Məcidov, Şimali Kıbrıs (Kipr) Türk Respublikasının Baş nazirinin müavini, turizm, mədəniyyət, gənclər və ətraf mühit naziri Fikri Ataoğlu, TÜRKPA Baş katibi Mehmet Süreyya Er, Beynəlxalq Türk Mədəniyyəti və İrsi Fondunun prezidenti Günay Əfəndiyeva və Macarıstanın İstanbuldakı Baş konsulu Laszlo Kellerin protokol çıxışları dinlənilib.
Sonra Türkmənistanın mədəniyyət naziri Atagəldi Şamuradov və Moldova Respublikasının Qaqauz Yerinin mədəniyyət və turizm baş idarəsinin rəhbəri Marina Semionovanın onlayın çıxışları olub.
Rəsmi açılışdan sonra Macarıstan Prezidenti tərəfindən təltif edilən TÜRKSOY-un Baş katibi Düsen Kaseinova “Macar Ləyaqət nişanı” mükafatı təqdim edilib.
Azərbaycanın Şuşa şəhərinin bütün türk dünyasının mədəniyyət paytaxtı seçilməsi ilə bağlı təqdimatı səbirsizliklə gözləyirik. Azərbaycanın Zəfər rəmzi olan müqəddəs Şuşa şəhərinin 2023-cü ildə bütün türk dünyasının evi olacağından çox məmnunuq.
Bu fikirləri Beynəlxalq Türk Mədəniyyəti Təşkilatının Baş katibi Düsen Kaseinov martın 31-də TÜRKSOY-a üzv ölkələrin Mədəniyyət Nazirlərinin Daimi Şurasının fövqəladə iclasında söyləyib.
Türk dünyasını Novruzun gəlişi münasibətilə təbrik edən D.Kaseinov bütün türk dünyasına əmin-amanlıq arzu edib. O, Bursa şəhərinin bu kontekstdə öz vəzifəsinin öhdəsindən layiqincə gələcəyinə əminliyini bildirib.
Bütün xəbərlər Facebook səhifəmizdə
USD
EUR
GBP
RUB