Martın 30-da “Bursa-2022” türk dünyasının mədəniyyət paytaxtı açılış mərasimi keçirildi. SİA bu barədə Türkiyə mətbuatına istinad edir.
İştirakçılar şəhərin mərkəzi küçələrindən keçərək Bursa mədəniyyət paytaxtının ofisinin yerləşdiyi meydana gəliblər. Onları yolboyu türk milli musiqisinin sədaları altında milli geyimdə olan oğlan və qızlar müşayiət ediblər.
Şəhərin mərkəzi meydanında Bursa şəhərinin TÜRKSOY-un mədəniyyət paytaxtı elan edilməsi ilə əlaqədar bədii hissə keçirilib.
Əvvəlcə Türkiyenin Dövlət Himni səsləndirilib. Bursa mədəniyyət mərkəzinin rəqs qrupu özfəaliyyət proqramı ilə çıxış edib.
Açılış mərasimində çıxış edən Bursa bələdiyyəsinin sədri Alinur Aktaş belə tədbirlərin türkdilli xalqların mədəni irsinin təbliği və tanıdılması, həmçinin bu xalqlar arasında mədəniyyət, incəsənət sahələrində əlaqələrin daha da inkişaf etdirilməsi baxımından əhəmiyyətini vurğulayıb.
Bələdiyyə sədri çıxışında Bursanın 2023-cü ildə estafeti Azərbaycanın mədəniyyət paytaxtı Şuşaya verəcəyini də açıqlayıb.
Sonra Novruz bayramının atributlarından olan tonqal qalanıb.
Xatırladaq ki, Bursa şəhəri TÜRKSOY tərəfindən 2022-ci il üçün “Türk dünyasının mədəniyyət paytaxtı” elan edilib. Bundan əvvəl bu missiyanı Özbəkistanın Xivə şəhəri yerinə yetirib. Bir vaxtlar Osmanlı imperiyasının paytaxtı olmuş və 2022-ci ildə türk dünyasının mədəniyyət paytaxtı elan edilən Bursada bu il 4-cü Dünya Köçəri Oyunları, 2-ci “Dədə Qorqud” Türk Dünyası Film Festivalı, 5-ci Türk Dünyası Əcdadlar İdman Festivalı, 3-cü Bursa Kitab Sərgisi, digər festival və tədbirlər keçiriləcək.
Bu arada, martın 31-də Türkiyenin Bursa şəhərində Beynəlxalq Türk Mədəniyyəti Təşkilatına (TÜRKSOY) üzv ölkələrin Mədəniyyət nazirlərinin Daimi Şurasının fövqəladə iclası keçiriləcək.
İclasın qərar və qətnamələri imzalanandan sonra nəticələrlə bağlı mətbuat konfransı olacaq.
Bursa türk dünyası mədəniyyət paytaxtı estafetini Özbəkistanın Xivə şəhərindən qəbul edib.
Bütün xəbərlər Facebook səhifəmizdə
USD
EUR
GBP
RUB