Beləliklə, gəlin bir daha bizə “qardaş” deyib, düşmənimizin xeyrinə kürəyimizdən xəncər saplayan İranın siyasi dairələrinin riyakar əməllərinə nəzər yetirək. Əslində, çox insanlarımız ağı-qaradan kifayət qədər seçməyi bacarır, fəqət hazırda Azərbaycanda oturub panfarsizm teokratiyasının tiryəkli sərxoşluğuna dalmış və bu sərxoşluğu müqabilində Azərbaycan Respublikasının vətəndaşları olduqlarını unutmuş bir qrup kütləyə anladacaq bəzi, hətta bir çox məsələlər var. Azərbaycanda dini etiqad azaddır və hər kəs istədiyi şəkildə öz ibadət funksiyalarını rahatlıqla yerinə yetirə bilər və kimsə həmin insanlara “nəyə görə ibadət edirsən?” sualını verə bilməz. Bu, vətəndaşlarımızın konstitusion hüquqlarıdır.
Ancaq son günlərdə, xüsusilə İranın bəlli siyasi məsələlərdə müsəlman Azərbaycana (!) qarşı dil uzatmasından sonra biz artıq bir “irançılar” olaraq adlandırılan panfarsizm teokratiyasının nökərlərinin baş qaldırdıqlarını müşahidə etməkdəyik. Bu, həmin ünsürlərdirlər ki, İranın mollakratiya rejiminin tiryəkli xütbələrindən meyxoş olaraq, vəcdə gələrək sivil, demokratik və dünyəvi Azərbaycanımızı “islam respublikasına çevirəcəkləri” ilə bağlı sərsəm, axmaq və mümkün olmayan iddialarını səsləndirməyə başlayıblar. Onların isə nə Nardaran hadisələrindəki, nə də Gəncə olaylarındakı xain, terrorçu yığnaqlarından heç bir fərqləri yoxdur. Daha dəqiq desək, onlar məhz həmin yığnaqların tör-töküntüləridirlər ki, Azərbaycanın həssas günlərində sözün əsl mənasında, ölkə, millət adına ləkə gətirirlər. Artıq onlarınkı nə ibadət, nə də iman deyil, onların əməlləri bilavasitə müstəqil dövlətimizin dayaqlarını sarsıtmağa hesablanmış satqınlıqdır. Və əlbəttə ki, Allah bu kimi əməlləri lənətləyir. Amma kimə deyirsən ki...(?!)
Bu gün Tehranın teokratiya rejimini idarə edən əyalət mollalarının təsirləri altına düşmüş insanlara nə qədər anlatsaq da ki, sizinki islamçılıq deyil, islamçılığa düşmənçilikdir, anlamayacaqlar. Çünki başlarını dumanlandırmış molla tiryəki artıq onların yollarını çoxdan azdırıb.
Bəs onlar hansı mollakratiya rejiminin qurbanlarına çevriliblər və hansı haqla 44 günlük Vətən müharibəsində torpaqlarının azadlığı uğrunda canlarını fəda etmiş oğullarımızın şəhid olmadıqlarını fars rejiminin baş mollalarının fətvaları ilə inkar etməyə başlayıblar? Demək belə çıxır ki, Azərbaycan 30 illik, sözün əsl mənasında, kafir işğalında qalmış dədə-baba torpaqlarını azad etməməliymiş? Yaxud, torpaqlarımızı işğal edərkən gorbagor edilən erməni qəsbkarları, daşnakları İranın əyalət mollaları tərəfindən “şəhid” statusuna mindirilərkən, bu ölkənin çörəyini yeyib, suyunu içən sözdə “islamçılar”, “hüseynçilər”, yaxud “bariz şiələr” əməldə isə radikal vəhhabidən də betər olan xainlər yığnağı ağaye Amulinin, ya da başqa islam düşmənlərinin “fətvaları” ilə razılaşmış olurlar?! Məgər ortaya belə nəticə çıxmırmı?!
Bəli, Azərbaycan müstəqil dövlətdir və milli, mənəvi, dini, mədəni dəyərlərini daim qoruyub-saxlayır, inkişaf etdirir, digər dünya ölkələrinə nümunə göstərir və ən əsası, hansı ölkələrlə dostluq edib-etməməsinə də kimlərinsə burun dürtmələrinə ehtiyac yoxdur. Xüsusilə, Tehran başbilənlərinin və onların Bakıdakı yığnaqlarının!
Və bu gün təkcə son bir-iki ildə İranın Azərbaycana qarşı törətdiyi xəyanətlərini incələyərsək, bir daha bu ünsürlərin hansı yuvanın quşları olduqlarını isbatlamış olarıq.
İran istər işğal dövrlərində, istərsə də son aylara qədər işğalçı Ermənistanı və separatçı rejimi yanacaqla təmin edib. Üstəlik, müharibə vaxtı Rusiyadan Ermənistana daşınan silah-sursat təyyarələrini öz hava məkanından buraxıb. Eləcə də quru yolunu açmaqla yük maşınlarının sürətli və rahat keçmələrinə şərait yaradıb.
İran tərəfi sərhədlərdə və Azərbaycanın müxtəlif bölgələrində vizual, eyni zamanda agentura, radioelektron kəşfiyyatını aparıb, əldə etdiyi informasiyaları erməni tərəfinə ötürüb. Özü də müharibə vaxtı və sonrakı bir il ərazində.
Xüsusilə, İran silahlı qüvvələri guya “su ehtiyatı anbarını qorumaq” bəhanəsi ilə Azərbaycanın ərazisinə keçib. Yekunda, bu həyasızlıq (!) nəticəsində Azərbaycan ordusunun əks-həmlə planının realizəsi gecikib və düşmən erməni ordusu buna qədər aldığı sarsıdıcı zərbələrdən sonra toparlanması üçün vaxt qazanıb, bu isə bizim üçün nə qədər can bahasına başa gəlib.
Bütün bunların ardınca, Tehranın “sionistlərə baza açırsınız” bəhanəsi ilə Bakıya diş qıcımaları, əzələ nümayişi sərgiləməsi, bütün bunları Ermənistana dəstək göstərmə fonunda baş verməsi...
Əlbəttə ki, qeyd edilənlər bir əyalət mollasının dediyi kimi, “İranın xidmətlərinin” hamısı deyil. Belə “xidmətlərin” hamısını bir yerə yığıb-qeydlərini aparsaq 1000 kitab bəs etməz. Belə olan halda bu gün İran teokratiyasının tiryək dozasından sərxoş olanlar hələ nə qədər vaxt varsa, ayılsınlar. Ayılsınlar və həqiqi islamın, müsəlmançılığın yoluna qayıdıb, Hz.Məhəmməd (s) peyğəmbərin “Vətəni sevmək imandandır kəlamını” dərk etsinlər.
Bütün xəbərlər Facebook səhifəmizdə
USD
EUR
GBP
RUB
