Eynulla Fətullayev "Azadlıq" qəzetini məhkəməyə verir. Bu barədə az sonra…
Əslində, "Azadlıq" qəzetinin məhkəməyə verilməsində elə də təəccüblü bir şey yoxdur. Çünki bu qəzetin səhifələrində demək olar ki, gündəlik şəkildə işıq üzü görən yalan və böhtanları son anda məhkəmə ilə sona çatır. Bir sözlə, bilavasitə AXCP sədri Əli Kərimlinin nəzarətində olan qəzet məhkəmələr "bumunda" batıb-gedir.
Lakin məsələnin ilginc tərəfi ondan ibarətdir ki, "Azadılq" hələ də öz köhnəlmiş, bezdirici və digər aşağı səviyyəli iddiaları ilə gündəmdə qalmağa çalışır. Məsələn, qəzet istənilən fiziki, yaxud da hüquqi şəxslər, eyni zamanda təşkilat və müəssisələr tərəfindən məhkəməyə verilərkən, dərhal öz günahlarını hakimiyyətin üzərinə atmağa cəhdlər edir.
Sən demə hakimiyyətin işi-gücü qurtarıb və qızıl kimi vaxtını "Azadlıq"ı məhkəmələrə verməyə sərf edir. Nə qədər absurd və nə nə qədər primitiv iddiadır, deyilmi cənablar? Demək, bu boyda məmləkət, bu boyda nəhəng siyasət yalnız və yalnız "Azadlıq"a görəymiş. Gülüncdür!
Nə isə, qayıdaq Eynulla Fətullayevin siyasətin sarı mətbuatına çevrilmiş "Azadlıq" qəzetini nəyə görə məhkəməyə verməsi məsələsinə.
Beləliklə, "Azadlıq" qəzeti bütün jurnalistika normalarını tapdalayaraq "haqqin.az" saytının direktoru Eynulla Fətullayevin adından yalan məlumat yayıb. Qəzet "haqqin.az" saytının daimi yazarı Rauf Kərimlinin məqaləsində istifadə olunan adi, heç bir qərəz olmayan "Məmmədovlar və Həsənovlar" ibarəsini guya E.Fətullayevin adından nüfuzlu dövlət xadimlərinə qarşı ittiham kimi qələmə verib.
E.Fətullayev isə öz növbəsində bildirib ki, "Azadlıq" qəzeti bütün yazılmış və yazılmamış jurnalistika normalarını pozaraq özlərini sadəcə olaraq düz aparmayıblar: "Onlar mənim adımdan yalan yazıblar. Öz təxəyyüllərini mənim adıma çıxıblar. Bu zaman qəzetin əməkdaşı heç mənə zəng edib bu informasiyanın nə dərəcədə doğru olduğunu soruşmağa da ehtiyac görməyib. Onlar bu məsuliyyətsiz mövqelərinə görə cavab verməli olacaqlar. "Azadlıq" qəzeti mənə məhkəməyə müraciət etməkdən başqa yol qoymadı".
İndi yerdə biz, göydə də Allah, burada "Azadlıq" qəzetinin birbaşa qəsdi-qərəzliyi, bötan və şantajçılığı göz qarşısında deyilmi? Məgər bir informasiyanı öz xoşu ilə dəyişdirərək, onu hər hansı şəxsə, yaxud şəxslərə qarşı istifadə etmək hansı etik normaya sığa bilər? Əlbəttə ki, heç birinə. Sadəcə bu qəzet Əli Kərimlinin inhisarı altında olduğuna görə bundan sonra da məhkəmələrdə sürünməyə məcbur qalacaq. Adını da qoyacaqlar ki, "hakimiyyət "Azadlıq"ı susdurmaq istəyir" və s.
Əgər nəzərə alsaq ki, Eynulla Fətullayev ümumiyyətlə, sərbəst, müstəqil jurnalistdir və onun heç bir hakimiyyət dairələrinə bağlılığı, aidiyyatı yoxdur, bu zaman "Azadlıq" qəzetinin sonrakı hay-küyü də heç nəyi dəyişməyəcək. Sağlam düşüncəli cəmiyyət yaxşı bilir ki, kim-kimdir və "Azadlıq"ın bu hoqqsı arxasında daha hansı qaranlıq məqamlar dayanıb. Ona görə də bu qəzeti istədiyi kimi idarə edən AXCP sədrinə bir sualımız var – bəlkə bunu da hakimiyyət elədi? Əgər "hə" desə, onda yüz faiz əmin olmalıyıq ki, bunların məqsədləri həqiqətən də normal insanlıq çərçivəsinə sığmayan əməllər törətməkdən başqa heç nə deyilmiş.
Bütün xəbərlər Facebook səhifəmizdə
USD
EUR
GBP
RUB