Hər bir cəmiyyətin gələcəyi həmin ölkənin gəncləridir. Bu şüar deyil, elmi cəhətdən əsaslandırılmış dinamik bir prosesdir. Bunun üçün gənclərimizin potensiallarının daha da inkişaf etdirilməsinə və onların fəal vətəndaş kimi özünü təqdim edə bilməsinə şərait yaradılmalıdır. Bu baxımdan Gənclər üçün Təhsil Mərkəzi qeyd edilən dinamik prosesə öz töhfəsini vermək məqsədilə yeni bir proqramın icrasına başlayır.
Mərkəzdən SİA-ya verilən məlumata görə, "Region gənclərinin inkişafı naminə tərəfdaşlıq" adlanan proqramın əsas məqsədi ölkəmizin regionlarındakı gənclərin inkişafına dəstək vermək, onlarda yeni-yeni təşəbbüslərlə çıxış etməsinə şərait yaratmaq və ümumilikdə region gənclərinin inkişafı üçün dövlət və qeyri-dövlət qurumları arasında tərəfdaşlıq şəbəkəsi yaratmaqdır.
İlkin olaraq 3 il müddət üçün icra edilməsi planlaşdırılan proqramın əsas hədəfləri kimi gənclər mərkəzlərinin yaradılması, gənclər üçün pulsuz xidmətlərin təşkili, asudə vaxt imkanlarının artırılması, sağlamlığın qorunması, gənclərin müasir informasiya-kommunikasiya texnologiyalarına və bu sahədə biliklərə yiyələnməsi, regionlararası şəbəkələşmənin təmin olunması və s. nəzərdə tutulub.
Mərkəz rəhbərliyinin verdiyi məlumata əsasən proqram çərçivəsində əsasən region gənclərində yeni təşəbbüslərin formalaşmasına dəstək verilərək, onların iştirakı ilə yerlərdə müxtəlif kiçik layihələr həyata keçiriləcək. Bununla hər bir regionda mərhələli şəkildə aktiv gənclər qrupu formalaşdırılacaq.
Proqramın bir hissəsi olaraq, Avropa ölkələrinin birində region gəncləri ilə işləmək sahəsində nümunəvi təcrübə də öyrəniləcək.
Qeyd edək ki, proqram daxilində müvafiq dövlət qurumları, biznes və media qurumları, yerli və beynəlxalq QHT-lərlə əməkdaşlıq ediləcək.
Bütün xəbərlər Facebook səhifəmizdə
USD
EUR
GBP
RUB