Ümumdünya Statistika Günü Mingəçevirdə qeyd edilib

"Beynəlxaq Statistika Günü" münasibətilə Mingəçevir Şəhər Statistika İdarəsində tədbir keçirilib. SİA-nın verdiyi məlumata görə, tədbirdə Mingəçevir Şəhər Statistika İdarəsinin rəisi Kərimov Etibar, YAP Mingəçevir şəhər təşkilatının sədri Yusubov Cavanşir, Mingəçevir şəhər İcra Hakimiyyəti aparatının nümayəndələri Pirməmmədov İlqar və Dadaşov Zaur, Mingəçevir şəhər İcra Hakimiyyəti başçısının 1 nömrəli Sahə İnzibatı Ərazi Dairəsi üzrə nümayəndəsi Mikayıllı Rizvan, "Mingəçevir" qəzətinin baş redaktoru Daşdəmirov Mirsədi, "Mingəçevir İşıqları" qəzətinin baş redaktoru Nəbiyev Fərman və əməkdaşı Nəbiyeva Yeganə, Mingəçevir Dövlət Universitetinin "İqtisadiyyat kafedrası"nın baş müəllimi-iqtyisadçı Şəfaqətov Günəş, Mingəçevir Dövlət Universitetinin "İqtisadiyyat və idarəetmə fakultəsi"nin dekan müavini Niftəliyev Nazim, "MTV"nin telerepartyoru Məhərrəmov Hörmət iştirak ediblər.

Tədbiri giriş sözləri ilə açıq elan edən Etibar Kərimov iştirakçılara Ümumdünya Statistika günü ilə bağlı ətraflı məlumat verib, bu günün Azərbaycan tarixindəki rolu ilə bağlı məlumatları diqqətə çatdırıb: "Birləşmiş Millətlər Təşkilatının Baş Məclisi 2015-ci il 20 oktyabr gününü "Məlumatların keyfiyyətinin yüksəldilməsi, həyatın keyfiyyətinin yüksəldilməsi" şüarı altında ikinci Ümumdünya Statistika Günü elan etməyi qərara alıb. Qəbul olunmuş qətnamədə həmçinin deyilir ki, Ümumdünya Statistika Günü oktyabrın 20-də beş ildən bir qeyd olunacaq. Birinci Ümumdünya Statistika Günü 2010-cu ildə keçirilmişdir.

Baş Məclis "bütün üzv dövlətlərə, BMT sisteminin ixtisaslaşdırılmış idarələrinin üzvlərinə, təşkilatlarına, digər beynəlxalq və regional təşkilatlara, habelə vətəndaş cəmiyyətinin, o cümlədən, elmi-tədqiqat institutları, kütləvi informasiya vasitələri, bütün rəsmi statistika istehsalçıları və istifadəçiləri kimi qeyri-hökumət təşkilatlarının nümayəndələrinə Ümumdünya Statistika Gününü lazımi qaydada qeyd etməyi təklif edib."

Bu qətnaməni qəbul etməklə Baş Assambleya etibarlı statistika məlumatlarının hazırlanmasında milli statistika təşkilatlarının fundamental əhəmiyyətini rəsmi şəkildə təsdiq etmişdir.

BMT-nin baş katibi Pan Gi Мun dünyanın bütün dövlət başçılarına bu haqda müraciət edərək xahiş edib ki, Ümumdünya Statistika Gününün yüksək səviyyədə qeyd olunmasına kömək göstərsinlər. Son məlumata görə, 100-dən çöx ölkədə, habelə BMT və digər beynəlxalq təşkilatlar tərəfindən Ümumdünya Statistika Günü təntənəli şəkildə qeyd ediləcək.

Azərbaycan statistikləri üçün bu günün əhəmiyyətli olması həm də ondan ibarətdir ki, Azərbaycanda statistikanın təşkilindən 169 il keçir, rəsmi statistikanın isə 95 yaşı tamam oldu. Belə ki, 1920-ci il avqust ayının 19-da Azərbaycan İnqilab Komitəsi tərəfindən dövlət statistikası haqqında ilk əsasnamə təsdiq olunub. Azərbaycanda statistika orqanlarının bütün dövrlərdəki işi statistika orqanları qarşısında duran əsas vəzifələrin yerinə yetirilməsinə yönəldilib.

Bu gün Azərbaycanda beynəlxalq standartlara cavab verən statistika fəaliyyət göstərir. Dövlət Statistika Komitəsi 50-dən çox beynəlxalq təşkilat və ölkənin statistika orqanları ilə əməkdaşlıq edir və məlumat mübadiləsi aparır.

1994-cü il Azərbaycan statistikasının tarixində xüsusi il olmuşdur. Azərbaycan Respublikasının Prezidenti Heydər Əliyev tərəfindən 18 fevral 1994-cü ildə "Statistika haqqında" Azərbaycan Respublikasının Qanunu imzalanmışdır. Qanunda Avropa İqtisadi Komissiyasının 1992-ci il aprelin 15-də Cenevrədə keçirilən 47-ci sessiyasının qərarı ilə təsdiq edilmiş "Avropa İqtisadi Komissiyası regionunda rəsmi statistikanın əsas prinsipləri"nin bütün tələbləri nəzərə alınaraq, Azərbaycan Respublikasında təsərrüfatçılıq fəaliyyəti ilə məşğul olan subyektlərin Dövlət reyestrinin və beynəlxalq təsnifatlarla uzlaşdırılmış milli təsnifatların yaradılması, ölkə ərazisində dövlət statistika müşahidələrinin keçirilməsi, statistik sirr, dövlət statistika orqanları işçilərinin sosial müdafiəsi və s. xüsusi maddələr qeyd edilib.

Müstəqillik dövrü ərzində Azərbaycanda rəsmi statistikanın təkmilləşdirilməsi, bu sahədə islahatların başa çatdırılması və beynəlxalq standartlara uyğunlaşdırılması, cəmiyyətin daha geniş məlumatlandırılması və statistikanın dövlətin iqtisadi siyasətinə uyğun daha da inkişaf etdirilməsi, ölkənin sosial-iqtisadi inkişafı üzrə informasiya təminatının yaxşılaşdırılması, statistik göstəricilər sisteminin dünya standartları səviyyəsinə çatdırılması, iqtisadiyyatın dünya iqtisadiyyatına inteqrasiyasını səciyyələndirən yeni statistik məlumatların əldə edilməsi və onun beynəlxalq statistika standartları səviyyəsinə yüksəldilməsi diqqət mərkəzindədir. Bu məqsədlə, Dövlət Statistika Komitəsi tərəfindən statistika sahəsində islahatların aparılması və onun təkmilləşdirilməsi haqqında beşillik dövlət proqramları işlənib hazırlanmış və həyata keçirilmişdir. Bu illər ərzində 4 Dövlət Proqramı (1993-1997, 1998-2002, 2003-2007, 2008-2012-ci illəri əhatə edən) yerinə yetirilmiş, bu günə sonuncu 2013-2017-ci illəri əhatə edən Dövlət Proqramı ölkə Prezidentinin 2012-ci il 21 dekabr tarixli, 2621 nömrəli Sərəncamı ilə təsdiq edilmiş və yerinə yetirilməkdədir.

Proqramın məqsədi milli hesablar sisteminin təkmilləşdirilməsi, ölkənin sosial-iqtisadi inkişafını əks etdirən statistik istiqamətlərin və statistik təsnifatlar sisteminin inkişaf etdirilməsi, dövlət statistika orqanlarının vahid informasiya sisteminin inkişafı və təkmilləşdirilməsi, respondentlərə düşən statistik yükün azaldılması və s. həyata keçirilir.

Dövlət Proqramlarının yerinə yetirilməsi Dövlət Statistika Komitəsi üçün əsas vəzifə olmuşdur. Bu proqramların yerinə yetirilməsi Dövlət Statistika Komitəsinin beynəlxalq əlaqələrinin və əməkdaşlığının genişlənməsi şəraitində həyata keçirilib.

Ölkədə statistikanın yenidən qurulmasında müntəzəm olaraq beynəlxalq təşkilatların və xarici dövlətlərin milli statistika orqanlarının mümkün əməkdaşlığından geniş istifadə edilmişdir. Avropa Statistika Bürosu, Almaniya, Hollandiya, İsveç, Finlandiya, Polşa və Türkiyə Cümhuriyyəti Dövlət Statistika İnstitutu ilə sıx əməkdaşlıq yaradılıb.

Ümumiyyətlə, Azərbaycan müstəqillik əldə etdikdən sonra Dövlət Statistika Komitəsi BMT və onun regional iqtisadi komissiyaları, Avropa Birliyi, Beynəlxalq Valyuta Fondu, Beynəlxalq Əmək Təşkilatı, Dünya Bankı, Asiya İnkişaf Bankı, BMT-nin Ərzaq və Kənd Təsərrüfatı Təşkilatı, UNESKO, UNİSEF, İƏİT, İƏT, Beynəlxalq Nəqliyyat Forumu, Beynəlxalq Miqrasiya Təşkilatı, "21-ci yüzillikdə inkişaf üçün statistika sahəsində əməkdaşlıq" konsorsiumu, Ümumdünya Ticarət Təşkilatı, Beynəlxalq Yol Federasiyası, TRASECA, UNİDO, Beynəlxalq Energetika Agentliyi, Avropa İqtisadi Komissiyası, Avropa Statistika Bürosu, MDB Dövlətlərarası Statistika Komitəsi, Qara dəniz ölkələrinin Əməkdaşlıq Təşkilatı, Avropa Yenidənqurma və İnkişaf Bankı, Asiya və Sakit Okean Hövzəsi ölkələrinin İqtisadi-sosial Komissiyası, Avropa Sosial Xartiyası kimi beynəlxalq təşkilatlarla və dünyanın 40-dan çox ölkəsinin statistika orqanları ilə əməkdaşlıq edir və məlumat mübadiləsi aparır.

Azərbaycan xalqının Ümummilli lideri Heydər Əliyevin ölkə statistiklərinin yaddaşına həkk olunmuş "Bizim Dövlət Statistika Komitəsi var, çox düzgün statistika aparır..." məşhur kəlamı Statistika Komitəsinə verilən qiymətin bariz nümunəsidir.Hazırda Dövlət Statistika Komitəsi sistemi Mərkəzi Aparatdan, Naxçıvan MR Dövlət Statistika Komitəsindən, Bakı Şəhər Statistika İdarəsindən, 83 rayon (şəhər) statistika idarəsindən (şöbəsindən) və Dövlət Statistika Komitəsinin strukturuna daxil olmayan tabeliyindəki qurumlardan – Dövlət Statistika Komitəsinin Baş Hesablama Mərkəzindən, Statistik Məlumatların Elmi-Tədqiqat və Layihə-Texnoloji Mərkəzindən və Tədris Mərkəzindən ibarətdir.

Statistika orqanlarının əsas vəzifəsi ölkənin sosial-iqtisadi inkişafına dair elmi cəhətdən əsaslandırılmış statistika məlumatlarının vaxtında yazılması, işlənməsi və cəmiyyətin bütün təbəqələrinə çatdırılmasıdır.

Bu gün Azərbaycanda beynəlxalq stanlartlara cavab verən statistika fəaliyyət göstərir.

2013-cü ildə Dövlət Statistika Komitəsinin tikilib istifadəyə verilmiş Mingəçevir şəhər Statistika idarəsinin inzibati binasında kollektivin daha səmərəli və məhsuldar fəaliyyəti üçün bütün əlverişli şərait yaradılmışdır".

İdarə rəisi bütün uğurların dövlət tərəfindən göstərilən qayğının nəticəsi olduğunu diqqətə çatdıraraq, həmkarlarını təbrik edib: "Statistika sahəsində əldə olunan nailiyyətlər dövlətin və hökumətin yüksək qayğısı sahəsində mümkün olub. Mingəçevir şəhər Statistika idarəsinin kollektivini peşə bayramı münasibətilə təbrik edir, yeni uğurlar, bizimlə əməkdaşlığı daha da möhkəmləndirməyi arzulayırıq".