Azərbaycan həmsədrləri aktiv olmağa çağırır

3 Mart 2012 12:00 | 728

Azərbaycan həmsədrləri aktiv olmağa çağırır. SİA-nın xəbərinə görə, Prezident Administrasiyasının (PA) Beynəlxalq əlaqələr şöbəsinin müdiri Novruz Məmmədov deyib ki, ATƏT-in Minsk Qrupunun həmsədrləri Ermənistanı danışıqlar masasında konstruktiv mövqeyə gətirmək üçün əllərindən gələni etməlidirlər: "Vasitəçilər Kazan görüşündən sonra yaranmış situasiyadan çıxış yolu tapmalıdırlar".

Minsk qrupunun vasitəçiliyindən imtina ilə bağlı təkliflə razı olmadığını deyən PA rəsmisi: "Düzdür, həmsədrlərin münaqişənin nizama salınmasında konkret nəticələr əldə edə bilməməsi Azərbaycanı da çox narahat edir. Biz bununla bağlı həmişə mövqeyimizi bildiririk. Azərbaycanda, eləcə də digər ölkələrdə həmsədrlərin dəyişdirilməsi ilə bağlı formalaşdırılan fikirlər isə yalnız mülahizədir", - deyə əlavə edib.

Fransa Senatında qondarma "erməni soyqırımı"nın inkarına görə cinayət məsuliyyətini nəzərdə tutan qanun qəbul olunduğunu, lakin Fransa Konstitusiya Şurasının bunu ləğv etdiyini xatırladan şöbə müdiri bunları deyib: "Biz hər hansı hadisə baş verən kimi tələsik addım atmamalıyıq. Beynəlxalq münasibətlərdə müxtəlif vəziyyətlər yaranır, Azərbaycanın nümayiş etdirdiyi mövqeyi göstərdi ki, biz düz yoldayıq".

ATƏT-in Minsk qrupu həmsədrlərinin regiona növbəti səfərinə münasibət bildirən N.Məmmədovun fikrincə, vasitəçilər Ermənistanı konstruktiv mövqe tutmağa vadar etmək üçün digər yollar axtarmalıdırlar: "Məsələ ondadır ki, Ermənistan Kazan görüşündə münaqişənin davamlı həllində maraqlı olmadığını bir daha nümayiş etdirdi. Ermənistan bu prosesi uzatmaq istəyir, buna görə də ATƏT-in Minsk qrupu həmsədrlərinin irəli sürdüyü təkliflər özünü doğrultmur. Düşünürəm ki, həmsədrlər regiona səfərləri zamanı Azərbaycan prezidenti ilə görüşdə bu məsələ ilə bağlı mövqelərini bildirdikdən sonra proseslərin hansı istiqamətdə getdiyini öyrənə biləcəyik".

Novruz Məmmədov həmçinin bildirib ki, Dağlıq Qarabağ münaqişəsinin tənzimlənməsi prosesində Avropa Birliyinin də səyləri öz nəticəsini verə bilər. Onun sözlərinə görə, Azərbaycan istəyir ki, Avropa Birliyi Dağlıq Qarabağ münaqişəsinin tənzimlənməsi prosesində fəal iştirak etsin. Çünki, Münaqişənin həllində beynəlxalq birliyin fəal iştirakı lazımdır. Qeyd edək ki, bu həftə Avropa Birliyinin Şurası Cənubi Qafqazla bağlı qətnamə qəbul edib. Qətnamədə deyilir ki, Avropa Birliyi Minsk Qrupunun fəaliyyətinə, eləcə də münaqişənin post-konflikt fazasında dəstək verməyə hazırdır.

WhatsApp-da Səs Media Qrupu kanalını izləyin