"Türkmənistan Prezidenti Sərdar Berdiməhəmmədovun Azərbaycan Respublikasına dövlət səfəri, ölkələrimiz arasında imzalanmış sənədlər paketi və dövlət başçılarının bəyanatları iki qardaş dövlətin münasibətlərində yeni, strateji əhəmiyyətli bir dövrün başlanğıcını göstərir. Azərbaycan və Türkmənistan arasında iki ölkənin dövlətçilik ənənələrini və regional geosiyasi maraqlarını birləşdirən vacib bir platforma kimi çıxış edən bu əməkdaşlıq, sadəcə, ikitərəfli iqtisadi maraqlarla deyil, eyni zamanda regional sabitliyin və iqtisadi inteqrasiyanın möhkəmləndirilməsi ilə xarakterizə olunur".
Bu sözləri SİA-ya açıqlamasında deputat Bəhruz Məhərrəmov deyib.
Onun sözlərinə görə, sırf bu məğzi rəhbər tutsaq, əminliklə demək mümkündür ki, Azərbaycan və Türkmənistan arasında səhiyyə, sosial müdafiə, gömrük, kənd təsərrüfatı və digər sahələri əhatə edən anlaşma memorandumları əlaqələrin "spontan" deyil, "proqramlı" və sistemli şəkildə inkişafının hüquqi təminatıdır:
"Bu sənədlərin ratifikasiyası və icra mexanizmlərinin yaradılması, milli qanunvericiliklərimizin regional standartlarla ahəngdar şəkildə uyğunlaşdırılması üçün geniş imkanlar açması ikitərəfli münasibətlərin effektiv idarəetmə mexanizmləri ilə təmin olunduğunu göstərir. Məlumdur ki, iqtisadi əlaqələrin mühüm istiqaməti, nəqliyyat-logistika və iqtisadi kooperasiya münasibətlərinin strateji perspektivində Xəzərin hər iki sahili arasında rəqəmsal və hüquqi inteqrasiya ön plandadır. Daşınan mallar və nəqliyyat vasitələri ilə bağlı sənədlər Orta Dəhlizin ötürücülük qabiliyyətini artıraraq, Avrasiya məkanında Azərbaycan və Türkmənistanı əsas logistika qovşaqlarına çevirir. Habelə energetika sahəsindəki əməkdaşlıq və "Dostluq" tankerinin simvolik mənası enerji resurslarının ixracından daha çox, sənaye kooperasiyasına keçidin göstəricisidir. Qeyd olunanlar fonunda, 2026-2028-ci illər üçün sənaye sahəsində əməkdaşlıq proqramı dövlətlərin iqtisadi şaxələndirməyə verdiyi önəmi təsdiqləyir.
Azərbaycan və Türkmənistanın beştərəfli əməkdaşlıq çərçivəsində, xüsusilə Xəzər dənizi ilə bağlı məsələlərdə nümayiş etdirdiyi bərabərhüquqlu və qarşılıqlı faydalı yanaşma regionun kənar təsirlərdən müstəqil şəkildə öz təhlükəsizliyini qorumaq iradəsini əks etdirir. Dövlət başçılarının bəyanatları suveren hüquqların qarşılıqlı tanınmasına əsaslanan klassik diplomatiyanın uğurlu təcəssümüdür. Azərbaycanın Mərkəzi Asiya formatında fəallığı və mədəni inteqrasiya layihələri, münasibətlərimizin yalnız siyasi-iqtisadi deyil, həm də mənəvi-mədəni sütunlar üzərində yüksəldiyini nümayiş etdirir.
Bu strateji əməkdaşlıq regionun gələcək memarlığının formalaşdırılması prosesində Azərbaycan və Türkmənistanın lokomotiv rolunu daha da gücləndirir. İcra mexanizmlərinə parlament nəzarətinin təmin edilməsi və regional nəqliyyat dəhlizlərinin rəqəmsallaşdırılması bu sənədlər paketinin davamlı uğuruna zəmin yaradacaqdır. Çünki bizim üçün bu, sadəcə, ikitərəfli sazişlər toplusu deyil, regionun sabitlik və rifahı naminə atılan çoxşaxəli və sistemli dövlətçilik addımıdır".
Bütün xəbərlər Facebook səhifəmizdə
USD
EUR
GBP
RUB