““WUF13” beynəlxalq əməkdaşlıq, ideyaların qovuşduğu mühüm hadisə kimi yadda qaldı” - POLİTOLOQ DANIŞDI
”“World Urban Forum 13” tədbirinin Bakıda keçirilməsi Azərbaycanın beynəlxalq nüfuzunun və qlobal platformalardakı rolunun daha da gücləndiyini nümayiş etdirdi. Forum şəhərsalma, dayanıqlı inkişaf, innovativ texnologiyalar və müasir urban idarəetmə sahələrində dünyanın aparıcı ekspertlərini, dövlət nümayəndələrini və beynəlxalq təşkilatları bir araya gətirərək ölkənin bu istiqamətlərdə artan əhəmiyyətini ortaya qoydu”.
Bu sözləri SİA -ya açıqlamasında politoloq Polad Mehdiyev bildirib.
Onun sözlərinə görə, tədbir çərçivəsində aparılan müzakirələr Azərbaycanın son illərdə həyata keçirdiyi genişmiqyaslı infrastruktur layihələrinin və şəhərsalma siyasətinin beynəlxalq səviyyədə maraq doğurduğunu göstərdi:
” Prezident İlham Əliyevin rəhbərliyi ilə reallaşdırılan müasir nəqliyyat sistemləri, yeni yaşayış və ictimai məkanların yaradılması, ekoloji yanaşmaya əsaslanan şəhərsalma modelləri, rəqəmsal texnologiyaların tətbiqi və regionların inkişafına yönəlmiş layihələr ölkənin urban inkişaf sahəsində mühüm uğurlar əldə etdiyini təsdiqləyir.
Xüsusilə işğaldan azad edilmiş ərazilərdə aparılan bərpa və yenidənqurma işləri forum iştirakçılarının diqqət mərkəzində oldu. Bu ərazilərdə tətbiq olunan “ağıllı şəhər” və “ağıllı kənd” konsepsiyaları müasir texnologiyalarla dayanıqlı inkişaf prinsiplərinin vəhdətini nümayiş etdirərək Azərbaycanın gələcəyə yönəlmiş inkişaf modelini əks etdirdi. Həmin layihələr təkcə yeni yaşayış məntəqələrinin qurulması deyil, həm də innovativ idarəetmə sistemlərinin formalaşdırılması baxımından beynəlxalq təcrübə üçün maraqlı nümunə kimi qiymətləndirildi.
Forum eyni zamanda Azərbaycanın “yumşaq güc” potensialının genişlənməsinə mühüm töhfə verdi. Bakı bir daha müxtəlif ölkələr arasında dialoq, əməkdaşlıq və təcrübə mübadiləsi üçün etibarlı platforma olduğunu nümayiş etdirdi. Tədbir çərçivəsində yaradılan yeni tərəfdaşlıqlar, əməkdaşlıq imkanları və investisiya perspektivləri ölkənin iqtisadi və sosial inkişafına uzunmüddətli müsbət təsir göstərə biləcək amillər kimi dəyərləndirilir.
“World Urban Forum 13” Bakı üçün beynəlxalq əməkdaşlıq, innovasiya və dayanıqlı inkişaf ideyalarının qovuşduğu mühüm hadisə kimi yadda qaldı. Forum Azərbaycanın müasir şəhərsalma təcrübəsini dünyaya təqdim etməklə yanaşı, ölkənin qlobal urban inkişaf proseslərində fəal iştirak edən, innovativ yanaşmaları təşviq edən və beynəlxalq tərəfdaşlıqlara açıq olan etibarlı dövlət imicini daha da möhkəmləndirdi. Bu tədbir Bakının regionun aparıcı beynəlxalq tədbirlər mərkəzi statusunu gücləndirən və Azərbaycanın dünya miqyasında artan nüfuzunu nümayiş etdirən əlamətdar hadisələrdən biri kimi tarixə düşdü”.
Bütün xəbərlər Facebook səhifəmizdə
USD
EUR
GBP
RUB