"Çexiya Respublikasının Baş naziri Andrey Babişin Azərbaycana rəsmi səfəri iki ölkə arasında münasibətlərin yeni mərhələyə keçdiyini göstərən mühüm hadisədir. Səfər çərçivəsində keçirilən həm təkbətək, həm də geniş tərkibli görüşlər, eləcə də verilən birgə bəyanatlar əməkdaşlığın siyasi, iqtisadi və enerji sahələrində genişləndirilməsinə yönəlib".
Bu sözləri SİA-ya açıqlamasında siyasi şərhçi Şakir Ağayev deyib.
Siyasi şərhçi sözlərinə belə davam edir: "Son dövrlərdə Avropa İttifaqı ölkələrinin Azərbaycana artan marağı açıq şəkildə müşahidə olunur. Bu marağın əsas səbəblərindən biri Azərbaycanın Avropanın enerji təhlükəsizliyində oynadığı roldur. Xüsusilə Rusiya–Ukrayna müharibəsi fonunda Avropa alternativ enerji mənbələrinə ehtiyac duyur və Azərbaycan bu baxımdan etibarlı tərəfdaş kimi ön plana çıxır.
Səfər çərçivəsində keçirilən biznes forumu da iqtisadi əməkdaşlığın dərinləşdirilməsi baxımından əhəmiyyətlidir. Çexiya tərəfinin Azərbaycana, xüsusilə işğaldan azad olunmuş ərazilərə investisiya qoymaq niyyəti qarşılıqlı iqtisadi maraqların mövcud olduğunu göstərir. Bu isə həm regionun bərpasına, həm də yeni iqtisadi əlaqələrin qurulmasına xidmət edir.
Ümumilikdə, bu səfər bir neçə vacib məqamı ortaya qoyur: Azərbaycan Avropa üçün strateji tərəfdaş kimi mövqeyini gücləndirir, enerji sahəsində əməkdaşlıq əsas prioritet olaraq qalır, iqtisadi və investisiya imkanları genişlənir, Azərbaycanın beynəlxalq nüfuzu artmaqda davam edir.
Çexiya ilə münasibətlərin inkişafı Azərbaycanın ümumilikdə Avropa məkanında mövqeyinin möhkəmlənməsinə xidmət edir və bu prosesin yaxın gələcəkdə daha da intensivləşəcəyi gözlənilir".
Bütün xəbərlər Facebook səhifəmizdə
USD
EUR
GBP
RUB
