"Mövcud qlobal geosiyasi proseslər fonunda Azərbaycan–Çin münasibətlərinin strateji tərəfdaşlıq səviyyəsinə yüksəlməsi təsadüfi xarakter daşımır və bu əməkdaşlıq Azərbaycanın həm regional, həm də beynəlxalq mövqeyinin möhkəmlənməsi baxımından mühüm əhəmiyyət kəsb edir". Bu sözləri SİA-ya açıqlamasında politoloq Elşad Həsənov deyib.
Onun sözlərinə görə, son illərdə dünya siyasətində müşahidə olunan çoxqütblülük tendensiyası orta gücə malik dövlətlərin manevr imkanlarını genişləndirir və Azərbaycan bu reallığı düzgün qiymətləndirərək balanslaşdırılmış xarici siyasət xəttini uğurla davam etdirir: "Azərbaycan ilə Çin arasında qarşılıqlı etimad və hörmətə əsaslanan münasibətlər təkcə ikitərəfli çərçivə ilə məhdudlaşmır, eyni zamanda regional və qlobal miqyasda yeni əməkdaşlıq imkanları yaradır. Xüsusilə Orta Dəhliz və Trans-Xəzər Beynəlxalq Nəqliyyat Marşrutu çərçivəsində əməkdaşlıq Azərbaycanın Avrasiya məkanında mühüm nəqliyyat-logistika qovşağına çevrilməsi prosesini sürətləndirir. Bu isə ölkəmizin geoiqtisadi çəkisini artırmaqla yanaşı, onu Şərqlə Qərb arasında etibarlı tərəfdaş kimi mövqeləndirir. Enerji və bərpaolunan enerji sahəsində Çinlə əməkdaşlıq Azərbaycanın uzunmüddətli inkişaf strategiyasına uyğun olaraq iqtisadiyyatın şaxələndirilməsinə və yaşıl enerji hədəflərinin reallaşdırılmasına töhfə verir. Eyni zamanda sənaye, rəqəmsal transformasiya və texnoloji sahələrdə əməkdaşlıq ölkənin innovasiya potensialının güclənməsinə xidmət edir ki, bu da regional rəqabət mühitində Azərbaycanın üstünlüklərini artırır. Siyasi müstəvidə isə Azərbaycan–Çin əməkdaşlığı beynəlxalq təşkilatlar çərçivəsində qarşılıqlı dəstək mexanizmlərinin güclənməsi ilə müşayiət olunur. BMT, Qoşulmama Hərəkatı və digər çoxtərəfli platformalarda mövqelərin uzlaşdırılması Azərbaycanın beynəlxalq hüquqa əsaslanan prinsipial mövqeyinin daha geniş miqyasda dəstəklənməsinə şərait yaradır. Xüsusilə postmünaqişə dövründə bərpa-quruculuq və mina təhlükəsi ilə mübarizə sahəsində Çinin verdiyi dəstək humanitar diplomatiya baxımından mühüm siyasi mesaj kimi dəyərləndirilə bilər.
Ümumilikdə, Azərbaycan–Çin strateji tərəfdaşlığı Azərbaycanın qlobal siyasətdə daha çevik, balanslı və praqmatik aktor kimi çıxış etməsinə imkan yaradır. Bu əməkdaşlıq yalnız cari maraqlara deyil, uzunmüddətli sabitliyə və qarşılıqlı faydaya əsaslandığı üçün gələcək illərdə Azərbaycanın regional liderlik mövqeyinin möhkəmlənməsində və beynəlxalq nüfuzunun artmasında mühüm rol oynayacaq".
Bütün xəbərlər Facebook səhifəmizdə
USD
EUR
GBP
RUB
