“Azərbaycan-BƏƏ münasibətləri uzunmüddətli əməkdaşlıq prinsiplərinə əsaslanır” - MÜNASİBƏT BİLDİRİLDİ
“Azərbaycan Respublikasının Prezidenti tərəfindən həyata keçirilən bu səfər bir sıra siyasi, iqtisadi və diplomatik aspektlər baxımından xüsusi əhəmiyyət daşıyır”. Bu sözləri SİA-ya açıqlamasında millət vəkili Ceyhun Məmmədov bildirib.
Onun sözlərinə görə, bu dövlət başçısının Birləşmiş Ərəb Əmirliklərinə ilk səfəri deyil və bu fakt iki ölkə arasında formalaşmış davamlı və etibarlı tərəfdaşlığın göstəricisi kimi qiymətləndirilməlidir: “Azərbaycan ilə BƏƏ arasında mövcud olan münasibətlər qarşılıqlı hörmət, etimad və uzunmüddətli əməkdaşlıq prinsiplərinə əsaslanır.
Hazırkı mərhələdə Azərbaycan təkcə ərəb dünyası ilə deyil, eyni zamanda Afrika və Avropa ölkələri ilə də geniş və strukturlaşdırılmış siyasi-iqtisadi əlaqələr qurmuşdur. Bu əlaqələr dövlətlərarası əməkdaşlıqla yanaşı, xalqlar arasında qarşılıqlı anlayışın, dostluğun və mədəni yaxınlığın möhkəmlənməsinə xidmət edir. Bu kontekstdə Azərbaycan-BƏƏ münasibətləri regional və beynəlxalq əməkdaşlığın uğurlu modeli kimi çıxış edir.
İkitərəfli münasibətlərin mühüm istiqamətlərindən biri investisiya əməkdaşlığıdır. Birləşmiş Ərəb Əmirlikləri Azərbaycan iqtisadiyyatına qarşılıqlı əsasda sərmayələr yatırır və BƏƏ-ə məxsus bir sıra şirkətlər ölkəmizdə uğurla fəaliyyət göstərir. Xüsusilə alternativ və bərpa olunan enerji sahəsində həyata keçirilən layihələr strateji əhəmiyyət daşıyır və enerji təhlükəsizliyi, ekoloji davamlılıq baxımından yeni imkanlar yaradır. Bu sahədə formalaşan tərəfdaşlıq Azərbaycanın enerji strategiyasının diversifikasiyasına mühüm töhfə verir.
Bununla yanaşı, Azərbaycan ilə BƏƏ arasında mədəni, humanitar və sosial sahələrdə əməkdaşlıq da ardıcıl şəkildə inkişaf edir. Təhsil, mədəniyyət və humanitar təşəbbüslər xalqlar arasında qarşılıqlı etimadın möhkəmlənməsinə və əməkdaşlığın dərinləşməsinə şərait yaradır. Eyni zamanda Azərbaycanla bağlı birbaşa danışıqların məhz Abu Dabi şəhərində keçirilməsi ikitərəfli münasibətlərin yüksək səviyyəsini və BƏƏ-nin bu proseslərdə etibarlı tərəfdaş kimi çıxış etdiyini nümayiş etdirir.
Bu kontekstdə, bir çox beynəlxalq mərkəzlər mövcud olduğu halda, məhz Abu Dabinin danışıqlar məkanı kimi seçilməsi Azərbaycan-BƏƏ münasibətlərinin strateji xarakter daşıdığını və qarşılıqlı etimada əsaslandığını təsdiqləyir. Bu seçim iki ölkə arasında formalaşmış siyasi dialoqun dərinliyini və regional məsələlərdə əməkdaşlıq potensialını aydın şəkildə ortaya qoyur.
Azərbaycan Respublikasının Prezidenti tərəfindən həyata keçirilən bu səfər ikitərəfli münasibətlərin daha da möhkəmlənməsinə, yeni əməkdaşlıq imkanlarının formalaşmasına və Azərbaycanın beynəlxalq mövqelərinin güclənməsinə xidmət edən mühüm diplomatik hadisə kimi dəyərləndirilməlidir”
Bütün xəbərlər Facebook səhifəmizdə
USD
EUR
GBP
RUB